Genese 4:1-26
4 Adama a robala le mosali oa hae Eva eaba oa ima.+ Ha Kaine+ a hlaha, Eva a re: “Jehova o nthusitse ho ba le* mora.”
2 Hamorao Eva a ba le mora e mong e leng Abele,+ ngoan’abo Kaine.
Abele ea e-ba molisa ’me Kaine ea e-ba molemi.
3 Ka mor’a nako e itseng, Kaine a tlisetsa Jehova nyehelo ea lijo tse tsoang masimong.
4 Abele eena a tlisa matsibolo a liphoofolo tsa hae,+ a etsa mahlabelo ka tsona hammoho le mafura a tsona. Jehova o ile a amohela Abele le nyehelo ea hae+
5 empa ho hang ha aa ka a amohela Kaine le nyehelo ea hae. Kaine a halefa haholo ’me a utloa bohloko.*
6 Jehova a re ho Kaine: “Ke hobane’ng ha u halefile hakaale ebile u utloile bohloko?*
7 Haeba u ka fetoha ’me oa etsa se setle, na nke ke ka u amohela?* Empa haeba u sa fetohe, sebe se u emetse monyako e le hore se u laole. Na u tla se hlola?”
8 Kaine a re ho ngoan’abo Abele: “A re ee naheng.” Ha ba ntse ba le naheng, Kaine a hlasela ngoan’abo Abele ’me a mo bolaea.+
9 Hamorao, Jehova a re ho Kaine: “Ngoan’eno Abele o hokae?” A re: “Ha ke tsebe. Na ke ’na mohlokomeli* oa hae?”
10 Molimo a re: “U entse’ng? Utloa mali a ngoan’eno a tšolletsoeng fatše+ a llela ho ’na.
11 U rohakiloe ’me ke u leleka sebakeng sena seo u bolaetseng ngoan’eno ho sona.*+
12 Ha u lema, mobu o ke ke oa hlahisa letho.* U tla lelera lefatšeng ’me u be ’malehi.”
13 Kaine a re ho Jehova: “Kotlo eo u mphang eona ka lebaka la phoso eo ke e entseng ea nkimela ’me ha ke khone ho e mamella.
14 Kajeno u nteleka sebakeng sena ’me ke tla ba hole le uena. Ke tla lelera lefatšeng, ke be ’malehi ’me mang kapa mang ea mphumanang o tla mpolaea.”
15 Jehova a re ho eena: “Ka lebaka leo, mang kapa mang ea bolaeang Kaine o tla fuoa kotlo ka makhetlo a supileng.”
Jehova a behela Kaine letšoao* la hore mang kapa mang ea mo fumanang a se ke a mo bolaea.
16 Kaine a tloha ka pel’a Jehova a e’o lula naheng ea Botlamuoa* e ka bochabela ho Edene.+
17 Kaine a robala le mosali oa hae+ eaba oa ima ’me o tsoala Enoke. Kaine a haha motse ’me a o rehella ka mora oa hae Enoke.
18 Enoke a ba le mora ea bitsoang Irade. Irade a ba le mora ea bitsoang Mehujaele, Mehujaele a ba le mora ea bitsoang Methushaele ’me Methushaele a ba le mora ea bitsoang Lameke.
19 Lameke a nyala basali ba babeli. Lebitso la mosali oa pele e ne e le Ada ’me oa bobeli e le Tsilla.
20 Ada a tsoala Jabale. Jabale ke eena motho oa pele oa ho lula litenteng le ho rua liphoofolo.
21 Lebitso la ngoan’abo e ne e le Jubale. Ke eena motho oa pele oa ho letsa harepa le phala.*
22 Tsilla a ba le mora ea bitsoang Tubale-kaine ea neng a etsa lithulusi tsa mefuta-futa tsa koporo le tšepe. Khaitseli ea Tubale-kaine e ne e le Naama.
23 Lameke a re ho basali ba hae, e leng Ada le Tsilla:
“ ’Mameleng, lona basali ba Lameke,Le utloe seo ke se buang:
Ke bolaile monna hobane a ntemalitse,Kannete ke bolaile mohlankana hobane a nkotlile.
24 Haeba motho ea bolaeang Kaine o tla fuoa kotlo ka makhetlo a supileng,+Ea bolaeang Lameke eena o tla fuoa kotlo ka makhetlo a 77.”
25 Adama a boela a robala le mosali oa hae. Eva a ba le mora ’me a mo reha Setha*+ hobane o ile a re: “Molimo o mphile mora* e mong bakeng sa Abele kaha Kaine o mo bolaile.”+
26 Setha a ba le mora ’me a mo reha Enoshe.+ Ka nako eo, batho ba qala ho bitsa lebitso la Jehova.
Linaletsana
^ Kapa: “ho tsoala.”
^ Kapa: “a hlonama.”
^ Kapa: “u hloname?”
^ Kapa: “na u ke ke oa phahamisoa?”
^ Kapa: “molebeli; molisa.”
^ Kapa: “ke u leleka lefatšeng le ileng la bula molomo oa lona ho amohela mali a ngoan’eno letsohong la hao.”
^ Ka Seheberu: “oa ba le matla.”
^ E ka ’na eaba ena e ne e le taelo e neng e lemosa batho.
^ Kapa: “naheng ea Node.”
^ Kapa: “lekolilo.”
^ E bolelang “Ea Khethiloeng; Ea Behiloeng; Ea Hlomamisitsoeng.”
^ Ka Seheberu: “peo.”
