Sakaria 7:1-14
7 Na ini a di fu fo yari di Kownu Darius ben e tiri, Yehovah taki nanga Sakaria na a di fu fo dei fu a di fu neigi mun. Dati na a mun Kislef.*
2 Ne den sma fu Betel seni Sareiser, Reigem-Meilek nanga den man fu en fu go begi Yehovah meki a blesi den.
3 Di den go na den priester di ben de na a oso* fu Yehovah di e tiri den legre èn na den profeiti, den aksi: „San wi musu du? Wi musu krei èn faste* na ini a di fu feifi mun, soleki fa wi gwenti du someni yari kba?”
4 Ne Yehovah di e tiri den legre taigi mi:
5 „Taigi ala sma na ini a kondre nanga den priester: ’Seibitenti yari kba unu abi a gwenti fu faste èn fu krei na ini a di fu feifi mun èn na ini a di fu seibi mun. Ma na gi mi unu du dati?
6 Di unu ben e nyan èn di unu ben e dringi, unu ben e prakseri mi?
7 Di sma ben e tan na Yerusalem sondro brok’ede èn di den ben e tan na den foto lontu Yerusalem, na Negeb-sabana èn na Syefela, unu no ben wani arki di den fosten profeiti ben kon taigi unu san Yehovah taki.’”
8 Yehovah taigi Sakaria tu:
9 „Yehovah di e tiri den legre taki: ’Un musu koti krutu na wan reti fasi èn un musu sori bun-ati* nanga sar’ati gi trawan.
10 No bedrigi nowan uma di en masra dede kba, nowan pkin di no abi p’pa,* nowan trakondre sma di e tan na un mindri èn nowan pôtisma. No prakseri srefi fu du ogri nanga wan trawan.’
11 Ma a pipel ben weigri fu arki mi. Den tan kakafutu gi mi èn den tapu den yesi fu no yere san mi e taki.
12 Te mi ben meki mi yeye kon tapu den fosten profeiti èn den ben e taigi a pipel san Yehovah di e tiri den legre taki, dan den no ben wani arki. Den no ben wani hori densrefi na den wet* èn den ben meki den ati kon tranga leki ston.* Dati meki Yehovah di e tiri den legre kisi bigi atibron.”
13 „’Di mi* ben e kari den, den no ben wani arki. Dati meki mi no ben e arki den tu te den ben e kari mi’, na so Yehovah di e tiri den legre taki.
14 ’Leki wan bigi winti mi ben wai den go na ala sortu pipel di den no ben sabi èn nowan sma ben e tan moro na ini a kondre fu den. Nowan sma ben e waka psa na ini a kondre èn nowan sma ben drai kon baka. Den ben meki a moi kondre di ala sma ben wani, kon tron wan brokopresi pe nowan sma wani tan.’”
