Sakaria 2:1-13
2 Ne mi opo mi ede, dan mi si wan man di ben abi wan t’tei na ini en anu fu marki sani.
2 Mi aksi en: „Pe yu e go?”
A piki mi: „Mi e go marki Yerusalem fu si o bradi èn o langa a de.”
3 Ne na engel di ben e taki nanga mi kmoto na mi sei èn wan tra engel kon miti en.
4 A taigi a tra engel: „Go es’esi na a yongu man drape, dan yu taigi en: ’„Yerusalem o abi so furu sma nanga meti taki a no o de fanowdu fu bow skotu lontu en.*
5 Mi o kon de leki wan skotu fu faya lontu en èn a glori fu mi o de drape”, na so Yehovah taki.’”
6 „Un kon! Un kon! Un lon gwe fu a kondre fu noordsei”, na so Yehovah taki.
„Mi panya unu go na ala sei pe den fo winti fu hemel e wai”, na so Yehovah taki.
7 „Kon Sion! Lon gwe, yu di e tan nanga na umapkin fu Babilon.
8 Bika Yehovah di e tiri den legre kisi glori èn now a seni mi go na den pipel di ben e teki ala den sani fu unu tyari gwe. A taki: ’A sma di e fasi unu e fasi a popki fu mi ai.*
9 Dati meki mi o opo mi anu fu naki den, dan den eigi srafu o teki ala den sani fu den.’ Na so unu o sabi taki na Yehovah di e tiri den legre seni mi.
10 Yehovah taki: ’Bari fu prisiri, umapkin fu Sion, bika mi e kon fu tan nanga yu.
11 Na a ten dati furu pipel o kon na mi, Yehovah. Den o tron mi pipel, dan mi o tan nanga yu, umapkin fu Sion.’ Na so unu o sabi taki na Yehovah di e tiri den legre seni mi kon na unu.
12 Dan Yehovah o teki Yuda gi ensrefi na tapu a santa pisi gron èn a o teki Yerusalem baka.
13 Meki ala sma tan pî na fesi Yehovah, bika a e kmoto fu en santa tanpresi fu du wan sani.”
