Sakaria 5:1-11
5 Dan mi kisi wan tra fisyun. Mi si wan bukulolo di e frei.
2 Na engel aksi mi: „San yu e si?”
Mi piki: „Mi e si wan bukulolo di e frei. A langa sowan neigi meter èn a bradi sowan fo nanga afu meter.”*
3 Dan a taigi mi: „Na a wan sei, a bukulolo disi abi den fluku gi den sma di e fufuru èn na a tra sei a abi den fluku gi den sma di e meki sweri aladi den e lei. A e frei na heri grontapu fu tyari fluku kon na tapu den sma disi no kisi strafu fu den ogri di den du.
4 ’Na mi seni en’, na so Yehovah di e tiri den legre taki. ’A musu go na ini na oso fu den fufurman èn na ini na oso fu den sma di e sweri na ini mi nen aladi den e lei, dan a musu tan na ini den oso. A musu pori den oso, den postu fu den oso nanga den ston fu den oso.’”
5 Dan na engel di ben e taki nanga mi, kon na fesi èn a taigi mi: „Grantangi, opo yu ede, dan yu luku san e kon.”
6 Ne mi aksi: „San na en?”
A piki: „Na wan baki fu marki sani, e kon.”* A taki tu: „Na so den ogrisma na heri grontapu de.”
7 A deksel fu a baki ben lontu èn a ben de fu loto. Ne mi si a deksel e opo èn wan frow ben e sdon na ini a baki.
8 Na engel taki: „A frow disi na Ogridu.” Ne a pusu a frow go baka na ini a baki èn a trowe a deksel fu loto baka na tapu a baki.
9 Dan mi opo mi ede èn mi si tu frow e kon. Den ben abi frei leki den di fu wan ooievaar* èn a winti ben e tyari den. Ne den teki a baki èn den opo en fu grontapu go na loktu.
10 Mi aksi na engel di ben e taki nanga mi: „Pe den e tyari a baki go?”
11 A piki mi: „Den e tyari en go na a kondre Sineyar* pe den o bow wan oso gi a frow. Te den kba bow en, dan den o poti a frow drape na a presi pe a musu de.”
