Daanieeli 9:1-27
9 Keledootu gashshootira moohinsoonnihu Medoonootu ilama wido ikkinohu, Ahaashiweroosi beetti Daariyoosi moohihunni umi diro,
2 ee, gashshootisihu umi diro, ani Daanieeli, masaalaanchu Ermiyaasira kulloonnihu Yihowa qaali garinni, Yerusaalame diigante keeshshitanno yanna 70 diro ikkitinota maxaaffatenni* huwatummo.
3 Konnira alba halaalaanchu Maganiwa Yihowawa hige, xoome, xidda uddiꞌrenna aanaho buluulo giggishshiꞌre eeggifate huucciꞌrummo.
4 Maganoꞌya Yihowa huucciꞌranninna cubbonkeno isira kulanni togo yuummo:
“Halaalaancho Magano Yihowa, ati baxxannoheriranna hajajokki agadhitannorira gondoorokki agadhattohonna ammanamino baxille leellishattoho, jawahonna waajjinanni Maganooti;
5 ninke cubbo loonsoommo; saonna bunshe assinoommo; finqilloommo; hajajokkinna wodhokkiwiinni wirri yinoommo.
6 Mootoollankera, roorrootinkera, albi annuwankeranna gobbate noo mannira baalaho suꞌmikkinni coydhinori soqqamaanokki masaalaano yitinore dimacciishshinoommo.
7 Yihowa, keeraanchimma atete; ninke kayinni Yihudu manni, Yerusaalamete heedhannori, muleno ikko xeertote noo gobbuwara billaallisoottohu Israeelete manni baalu, techo ikkinonte gede saala* duqqine heeꞌnoommo; korkaatuno insa atera diammanantino.
8 “Yihowa, ninke, mootoollanke, roorrootinkenna albi annuwanke ate aana cubbo loonsoommo daafira saala* duqqinoommo.
9 Maaronna gatona yaa Maganinke Yihowate; ninke isira finqilloommona.
10 Maganinke Yihowa qaalira dihajajammoommo; soqqamaanosi masaalaanote widoonni uynonke seerano diayirrinsoommo.
11 Israeelete manni baalu Seerakki diigino; qaalikkira hajajama giwe atewiinni shawwu yiino; konninni kainohunni, halaalaanchu Magani soqqamaanchi Muse Seeri giddo borreessinoonni rumonna xaaro ninke aana dirrisootto; korkaatuno ninke ate aana cubbo loonsoommo.
12 Ninke aana lowo bao abbe, ninkeranna gashshitinonke gashshaanora* coyiꞌrino qaale wonshino; Yerusaalamete ikkino gedee coy gordu woroonni horo ikke diegennino.
13 Muse Seeri giddo borreessinoonni garinni, tini bao baala ninke aana daggino; ninke kayinni bunshenke agurre hingenna halaalekki* hixamanyine, Maganinke Yihowa albaanni ayirrinye afiꞌrate dieegammoommo.
14 “Hakko daafira, Yihowa ille wore laꞌꞌanni keeshshihu gedensaanni ninke aana bao abbino; Maganinke Yihowa loosisi baalunkunni keeraanchohona; ninke kayinni qaalisira dihajajammoommo.
15 “Xaano wolqaataame angakkinni mannakki Gibitsete gobbanni fushshoottohunna techo barri geeshsha suꞌmikki egennamanno gede assootto Maganonke Yihowa, ninke cubbo loonsoommo; bunsheno assinoommo.
16 Yihowa, keeraanchimmate loosikki garinni, ballo hanqokkinna aarakki katamikki Yerusaalametenni yaano qullaawu ilaalikki aaninni hooli; korkaatuno cubbinkenninna albi annuwanke assitino saonni kainohunni, qooxeessinkera heedhanno daga baala Yerusaalamenna mannakki qacifattanni no.
17 Xaano Maganonke, soqqamaanchikki huuccattonna eegama macciishshi; Yihowa, suꞌmikkira yite diigaminohu qullaawu minikkiwa alba higi.
18 Maganoꞌya, maccakki kawa qolte macciishshi! Ballo illekki fante suꞌmikkinni woshshaminohu kataminke ikke diigame noo gara lai; huucciꞌneemmohehu keeraanchimmankenni ikkikkinni batiꞌra maarokkinni kainohunniiti.
19 Yihowa, macciishshi. Yihowa, gatona yii. Yihowa, macciishshite qaafo adhi! Maganoꞌya, suꞌmikkira yite keeshshitooti; katamikkinna mannikki suꞌmikkinni woshshaminohona.”
20 Ani coyiꞌranninna huuccatto assiꞌranni, cubboꞌyanna manniꞌya Israeelete cubbo isira kulanninna Maganiꞌyahu qullaawu ilaali daafira Maganoꞌya Yihowa huucciꞌranni heeꞌreenna,
21 ee, huuccatto assiꞌreno kaummokkinni, alba ajuujatenni laummo manchi Gebirieeli, ani daafure delecci yee heeꞌreenna hawarro kakkalo shiqinshanni yannara anewa day.
22 Isino togo yee wodancheemmo gede kaaꞌlie:
“Daanieeli, xa wodanchanna buuxa aammohera dayommo.
23 Ati huuccatto assiꞌra hanaffanni heedheennanni sokka daggue; anino kulammohera dayommo; korkaatuno ate Maganu lowo geeshsha baxannohe.* Konnira kuleemmohe coye illachishi; ajuujate tirono wodanchi.
24 “Sao hoolate, cubbo hunate, soꞌro agursiisate, hegere keeraanchimma abbate, ajuujanna masaalo* sumudate, hattono Qullaawa Holge buurate mannikkiranna qullaawu katamikkira 70 lamala* hirqinoonni.
25 Yerusaalame gatamaratenna wirro minate hajajo fultanno yannanni kayise, Massagaancho ikkinohu Buuramino Moote xawa geeshsha 7 lamalanna 62 lamala ikkannota afi hattono wodanchi. Yerusaalame gatamarranni, wirrono minnanni; gudumaalesenna huxxu gede ikkino gadaweseno wirro seekkinanni; kuni ikkannohu kayinni qarru yannaraati.
26 “Hatti 62 lamala saꞌuhu gedensaanni Buuramino Moote muramanno;* gatannosirino diheeꞌranno.
“Daanno massagaanchi olanto katamanna qullaawa darga huntanno. Gawalosino lolahu gede ikkitanno. Goofimarchu geeshsha olu heeꞌranno; bao dagganno gede hirqinoonni.
27 “Isino batinyu mannira yee gondooru mitte lamala keeshshanno gede assanno; lamalate mereerono kakkalonna fushshaate shiqinshannita hoolanno.
“Bao abbannohu, tiyyiꞌnanni coy qoolira ofolle daanno; qoleno bao dagga geeshsha hirqinoonni coy diigame noohu aana duꞌnamanno.”
Lekkaalliidi Qaagiishshuwa
^ Tini qullaawa borrooti.
^ Noo gedeenni tirriro, “albu saala.”
^ Noo gedeenni tirriro, “albu saala.”
^ Noo gedeenni tirriro, “yoo yitinonke daanyootira.”
^ Woy “ammanamakki.”
^ Woy “lowo waagi nooheho; lowo geeshsha ayirradoho.”
^ Noo gedeenni tirriro, “masaalaancho.”
^ Tini dirrate lamalaati.
^ Woy “shinanni.”
