Daanieeli 5:1-31
5 Moote Belshazaari kumu roorrootisira lowo jila jili; isino insa albaanni woyne aganni no.
2 Belshazaari dimbe heeꞌre, annisi Nabukadanatsoori Yerusaalamete noohu qullaawu mininni abbisiisinoha culkunna birru uduunne abbinanni gede hajaji; hatto assinohu isinna ayirraddisi, irkote meentisinna wolu meentisi hakkunni uduunninni woyne aganno gedeeti.
3 Hakkiinni Yerusaalamete Maganu mine noohu qullaawu darginni haaꞌnoonniha culku uduunne abbitu; mootenna ayirraddisi, hattono irkote meentisinna wolu meentisi hakkunni uduunninni agi.
4 Insa woyne agge culkunni, birrunni, camotenni, siwiilunni, haqqetenninna kinnatenni seekkinoonni maganna galaxxitu.
5 Hakkawoyintenni mannu anga leelte, mootete mine caabbicho worranni uduunnichira albaanni girgiddu aana borreessa hanaffu; mooteno borreessitanni noo anga lai.
6 Hatte yannara mootete albi wole ikki;* hedino coyno mase quubbi yaanno gede assisi; hallisi qece yii; gulubbasino huxidhu.
7 Moote lowo huuronni kiilaano, Keledootanna* ayyaanto woshshinanni gede hajaji. Moote Baabiloonete hayyoole togo yii: “Tenne borro nabbawe tirose kulannoehu aye manchino duume xiillitte* uddano uddiꞌranno; goowaho culku irra worrannisi; qoleno hakku manchi gashshootu giddo sayikkiha ikke gashshanno.”
8 Hakkiinni mootete hayyoole baala dagge eꞌu; ikkollana borro nabbawano ikko tirose mootete kula didandiitino.
9 Konnira Moote Belshazaari lowo geeshsha waajji; albisino wole ikki; ayirraddisirano yitannori bainsa.
10 Mootitte mootenna ayirraddisi coydhinore macciishshite jilu hara eꞌu. Ise togo yitu: “Moote, hegerera heeꞌri. Kuni coy waajjishoonkehe; albikkino soorramoonke.
11 Gashshootikki giddo qullaawa maganna ayyaani noosi manchi no.* Annikki waro, isira magannate hayyo gedee hayyo, wodanchanna egennote xawaabbi noosita anfoonni. Annikki Moote Nabukadanatsoori iso diginte loossanno kakkalaanora, kiilaanote, Keledootahonna* ayyaantote qara roorricha asse shoomino; moote, tenne assinohu annakkiiti.
12 Moote Bilxaasoori yee suꞌma fushshinohu Daanieeli haaqee xawisate, hibbonna raqaxamino qarra tirate* baxxino ayyaani, egennonna wodancha noosiho. Hakko daafira Daanieeli woshshinanni gede assi; isi tiro kulannohena.”
13 Konnira Daanieeli mootete albira abbini. Mooteno Daanieeli togo yee xaꞌmi: “Anniꞌya moote Yihudu gobbanni qafade abbinohu Yihudu manni giddo Daanieeli yinannihu ateeti?
14 Magannate ayyaani aanakki noota hattono egennote xawaabbi, wodanchanna baxxitino hayyo nooheta macciishshoommo.
15 Tenne borro nabbabbe tirose kultannoe gede, hayyoolenna kiilaano ane albira abbinoonni; insa kayinni sokkate tiro kultaera didandiitino.
16 Ati kayinni hibbo ikkino coyenna raqaxamino qarra tira* dandaattota macciishshoommo. Xa tenne borro nabbabbe kaꞌe tirose kula dandiittoero, duume xiillitte uddano uddiꞌratto, goowaho culku irra worrannihe, hattono gashshootu giddo sayikkiha ikkite gashshatto.”
17 Hakkiinni Daanieeli mootete togo yee qoli: “Afanshikki atera heeꞌrohena; baꞌraarshakkino woleho uy. Ikkollana borro mootete nabbaweemmo; tiroseno kuleemmosi.
18 Moote, Woꞌmunkura Aliidi Magani annikkira Nabukadanatsoorira gashshoote, bayirreenya, ayirrinyenna gaacheena uynosi.
19 Bayirreenya uynosi daafira, mannu baalu, daga baala, hattono babbaxxino qaale coydhanno gosa baala albasiinni waajjite huxidhanno. Isi hasiꞌriha shaanno woy lubbote heeꞌranno gede assanno; qoleno hasiꞌriha gotti gotti assanno woy shollishanno.
20 Ikkollana wodanisi naaxxeenna mokkookke booꞌnaleessa ikkita, gashshootisi zuufaanenni dirranno gede assinoonni; ayirrinyesino haaꞌne hoolloonni.
21 Isi mannu oosowiinni baxxe haꞌrino, wodanisi moychu wodanira soorramino, qoleno dubbu harre ledo heeꞌrannoha ikkino. Handate gede hayisso itino; gordu lojino bisosi shanshino; kuni ikkinohu isi Woꞌmunkura Aliidi Magani mannu gashshootira Gashshaancho ikkinotanna gashshooteno baxinohura aannota afa geeshshaati.
22 “Belshazaari, ati kayinni beettosi ikkootto daafira tenne baala afoottoha ikkirono, ateneeto heeshshi diassootto.
23 Hatteentenni gordu Mootera booꞌnitto; qoleno minisinni haaꞌnoonni uduunne abbisiisiꞌritto. Hakkiinni atinna ayirraddikki, hattono irkote meentikkinna wolu meentikki hakkunni uduunninni woyne aggine, mittoreno laꞌꞌa, mittoreno macciishshanna mittoreno afa dandiitannokkire birrunninna culkunni, camotenni, siwiilunni, haqqetenninna kinnatenni seekkinoonni maganna guwisidhini. Foolikkinna doogokki baala angasi noo Magano kayinni diayirrisootto.
24 Konni daafira tenne anga soynohu isooti; tini borro borreessantinohuno iseraati.
25 Borreessantino borro MIINI, MIINI, TIIQELI, FAARSIINI yitanno.
26 “Qaallate tiro tenneeti: MIINI yaa Maganu gashshootikki diro kiirino, gumulono iillishino yaate.
27 “TIIQELI yaa keenaasinchunni keenante shotte leellootto yaate.
28 “FIIRESI yaa gashshootikki beehamino; Medooninna Faarsi mannira aamamino yaate.”
29 Hakkiinni Belshazaari hajajo uy; Daanieelira duume xiillitte uddano uddisiissusi; goowahono culku irra wortusi; gashshootu giddo sayikkiha ikke shoomaminotano lallabbu.
30 Hakko hashshanni Keledicha moote Belshazaari shini.
31 Gashshooteno Medoonichu Daariyoosi amadi; isira hakkawoyte 62 diri balla ikkannosi.
Lekkaalliidi Qaagiishshuwa
^ Woy “mootete dani soorrami.”
^ Kuri kiilohonna beeddahe kiirate fullakkino gaamooti.
^ Noo gedeenni tirriro, “hamaraame.” Kuni kuuli biꞌree waro jirote, ayirrinyunna mootimmate ledo xaadooshshe afiꞌrinoho.
^ Woy “dandoo noosi manchi.”
^ Kuri kiilohonna beeddahe kiirate fullakkino gaamooti.
^ Noo gedeenni tirriro, “gurda tirate.”
^ Noo gedeenni tirriro, “gurda tira.”
