Daanieeli 11:1-45
11 “Anino Medoonichu Daariyoosi moohihunni umi diro, iso jawaachishammoranna kaajjishammora* uurre noommo.
2 Xa kuleemmohe coy halaaleho:
“Kuneeti wole sase mootoolla Faarsi gobbara mookkanno;* shoolkihu wolootunni roore lowo jiro duuꞌnanno. Isi jirosinni kainohunni batiꞌranno woyte, baalankare Girikete gashshooti aana kaysanno.
3 “Hakkiinni mittu wolqaataamu moote kaꞌꞌanno; gashshootisino halaꞌlado ikkanno; isino hasiꞌrire baala assanno.
4 Ikkollana isi kaꞌꞌanno woyte, gashshootisi diigamanno; qoleno shoole gordu bubbe widira hige beehamanno; kayinni oososira* disaꞌꞌanno; insa gashshooti isihu gedeeha diꞌꞌikkanno; korkaatuno gashshootisi buqqisamanno; insa gedensaannino wolootaho saꞌꞌanno.
5 “Wodiidi moote yaano gashshaasinesi giddo mittu wolqaataamo ikkanno; ikkollana mittu isira wolqisanno; qoleno koꞌiihunni roorino biilloonyinni gashshanno.
6 “Boodu diri gedensaanni, insa elle amaddanno; wodiidi moote beettono sheemaate eꞌara aliyye mootewa dagganno. Ikkollana cigilese wolqa noo gedeenni diheedhanno; qoleno isino cigilesino kaajjite diheedhanno; iseno sayinse uynanni; isenna abbinose manna, ilinosehanna hatte yannara ise jawaata assinoseha sayinse uynanni.
7 Rumuddasenni fulanno ciiri giddo mittu isi darga kaꞌꞌanno; isino olantonniwa daanno; qoleno aliyye moote qiisho qasanno; insa aana qaafo adhanno, hattono qeelannonsa.
8 Hakkiinni saeno magannansa, siwiilu misillansa,* birrunninna culkunni seekkinoonniha dancha* uduunnensa, hattono qafadamino manna haaꞌre Gibitse daanno. Mitu diri geeshsha aliyye mootewiinni xeertiꞌre keeshshanno;
9 aliyye moote wodiidi moote gashshoote horranno; ikkollana agure gobbasi higanno.
10 “Labballi oososino olaho qixxaabbanno; qoleno kiirre tunqannikkita jawa olanto gamba assidhanno. Isi alba hige jiganno; qoleno lolahu gede uulla feyanni saꞌꞌanno. Ikkollana agure badhera higanno; hattono qiishosi iilla geeshsha qasanni haꞌranno.
11 “Wodiidi mooteno hanqe fule isi ledo yaano aliyye moote ledo olamanno; kunino jawa olanto adhe fulanno; ikkollana olantosi koꞌii angara sayinse uynanni.
12 Olantono coꞌo yite hadhanno. Wodanisino booꞌnanno; tonnu kuminni kiirranni manna gudanno; afiꞌrinota dancha faro kayinni dihoroonsiꞌranno.
13 “Aliyye moote wirro higanno; umita roortino olantono gamba assiꞌranno; mite yanna yaano boodu diri gedensaanni, seekkite qodhitinota jawa olanto adhe daanno.
14 Hatte yannara batinyu manni wodiidi moote aana kaꞌꞌanno.
“Mannikki mereero noohu finqilu* mannino kaꞌꞌanno; ajuuja woꞌmitanno gede assateno woꞌnaalanno; ikkirono gufiꞌranno.
15 “Aliyye mooteno daanno; qoleno bushsha duune qiishote katama amadanno. Wodiidi cigileno* ikko doorantino bagadaasinesi hooꞌlite diaffanno; gargadhitanno wolqano diheedhannonsa.
16 Iso qasara daannohu hasiꞌrire baala assanno; albasiinni uurra dandaannohu diheeꞌranno. Isino Biiffino Gobbara* uurranno; hunanno wolqano angasi heedhanno.
17 Gashshootisi giddo noo olanto gudise adhe daara alba higanno; isi ledono sheemaate eanno; qaafono adhanno; meentu beettono hunanno gede fajjinannisi. Iseno kaajjite diaffanno; isita ikkiteno diheedhanno.
18 Isino alba baaru qaccuwawa hige batinye baycho amadanno. Mittu hajajaanchi isi duhisiisinosi saala aanisinni hooꞌlanno; hakkunni gedensaanni saalisi baꞌꞌanno. Isino saala koꞌonnira qolanno.
19 Hakkiinni galagale gobbasira noo qiishowa alba higanno; gufiꞌre uwanno; qoleno dianfannisi.
20 “Isi darga kaꞌꞌannohu, maalaꞌlinanni gashshootisi giddoonni hige saꞌꞌannoha gabbarsiisanno* mancho soyanno; ikkollana hanqunni woy olunni ikka hoogirono shiimu barri giddo hiiqqamanno.
21 “Isi darga mishaminohu* kaꞌꞌanno; isira mootimmate ayirrinye diuytannosi; mannu deseꞌe yee noo yannara* daanno; gashshooteno hayyotenni* amadanno.
22 Lolahu cigilla* isinni kainohunni feyamante hadhanno; qoleno hiiqqantanno; gondooru Massagaanchino hiiqqamanno.
23 Insa ledosi elle amaddino daafira, isi dogasi diaguranno; qoleno kaꞌꞌanno; shiima daga widoonni wolqaataamo ikkanno.
24 Mannu deseꞌe yee noo yannara* qoqqowu giddo durooꞌmino* baycho eanno; qoleno annuwasinna annuwasi annuwa assitinokkire assanno. Saaminore, qafadinorenna jajja mannu mereero beehanno; qiishote dargirano gano gananno; kuni ikkannohu kayinni mite yanna geeshshaatilla.
25 “Isino batiꞌra olanto gamba assiꞌre, wodiidi moote qasara wolqatenninna mitte giddonni kaꞌꞌanno; wodiidi mooteno lowo geeshsha batiꞌranna wolqaataame olanto gamba assiꞌre olaho qixxaawanno. Insa gano gantannosi daafira, kaajje uurra didandaanno.
26 Dancha sagalesi ittannori uwanno gede assitannosi.
“Olantosi feyamante* baꞌanno; batinyu mannino reye waxaaxanno.
27 “Tenne lame mootoollara wodaninsa bushare assate widira hige dooanno; insa mittu xarapheessira ofolte mimmito dogganno. Ikkollana goofimarchu hirqinoonni yannara daannoha ikkino daafira, mitturino diqinaannonsa.
28 “Isino lowo jajja gudhe gobbasi higanno; wodanisino qullaawu gondoori aana kaꞌꞌanno. Qaafo adhanno; gobbasino higanno.
29 “Hirqinoonni yannara galagale higanno; wodiidi aanano kaꞌꞌanno. Ikkollana tenne yannara albi gede diꞌꞌikkanno;
30 korkaatuno Kitiimi markaawubba iso qassara dagganno; isino shollanno.
“Galagale badhera higanno; qullaawu gondoorira hanqe kaꞌꞌanno;* qaafono adhanno; agure badhera hige qullaawa gondooro agurtinore illachishanno.
31 Isiwiinni fultanno cigilla* uurritanno; insano qiisho yaano qullaawa mine batteessitanno; barru barrunku shiqqanno kakkalono hooltanno.
“Bao abbannoha battete coye dargaho wortanno.
32 “Bunshe assitannorenna gondooro diiggannore doge* kaadaasine assanno. Maganonsa afino manni kayinni jawaatanno; hattono qaafo adhanno.
33 Mannu mereero wodancha noonsari, batinyu manni wodancha afiꞌranno gede assitanno. Insano boode barra bisetenni, giiratenni, hattono qafadamatenni ubbanno; jajjansano saammanni.
34 Ikkollana ubbanno yannara shiima kaaꞌlo afidhanno; batinyu mannino goowi alita* insa wido ikkanno.
35 Goofimarchu yanna geeshsha, insanni kainohunni filate, keereensatenna xalashshate looso loosate, wodancha noonsari giddo mitootu ubbanno gede assinanni; korkaatuno kuni hirqinoonni yanna geeshsha keeshshanno.
36 “Mooteno hasiꞌrire baala assanno; isonooto maganna baalatenni roore gotti gotti assanno; hattono booꞌnanno; magannate Maganirano waajjishannore coyiꞌranno. Hanqu yanna gooffa geeshshano qinaannosi; korkaatuno hirqinoonni coy woꞌma hasiissannosi.
37 Annuwasi Magano diayirrisanno; meentu hasattono ikko wole aye maganono dinaadanno; ikkollana baalunku aleenni isonooto gotti gotti assanno.
38 Hatteentenni* qiishote maganira ayirrinye aanno; annuwasi egentinokki maganira culkunni, birrunni, dilqa kinnanninna ayirradu* coyinni ayirrinye aanno.
39 Wole gobba magani ledo kaaꞌlame kaajjado qiisho aana qaafo adhanno. Ayirrissannosirira* lowo ayirrinye aanno; lowo manni mereerono mookkanno gede assanno; baattono woxeho beehanno.
40 “Goofimarchu yannara isinna wodiidi moote mimmito xiibbanno;* aliyye mooteno saragallu, faradaasinetenna batinye markaawe ledo wodiidi mootera hambabalattete gede ikke daannosi; duucha gobba eanno; qoleno lolahu gede hayishshe adhe saꞌꞌanno.
41 Qoleno Biiffino Gobba* eanno; batinye gobbano ubbanno. Ikkollana Edoomi, Moaabi, hattono Amooni gobba giddo qara ikkino widiidi angasinni gate fulanno.
42 Angasi lowo gobba widira diriirsanno; Gibitsete gobbano digattanno.
43 Isino maaxantino jirora, culkaho, birrahonna Gibitsennihu ayirradu* coyra baalaho annatanno. Liibiyunna Itiyophiyu dagano hoodesi hadhanno.
44 “Ikkollana soojjaati raginninna* aliyye raginni daanno duduwi uurra ofolla hoꞌlannosi; isino hunatenna lowo manna coꞌo asse gudate lowo hanqinni fulanno.
45 Mootimmate* dunkaannasi jawu baarinna biifadu qullaawu ilaali mereero qasiꞌranno; jeefote isino baꞌꞌanno; kaaꞌlannosihuno diheeꞌranno.
Lekkaalliidi Qaagiishshuwa
^ Woy “qiisho ikkammosira.”
^ Woy “kaꞌanno.”
^ Woy “sirchisira.”
^ Woy “daashshine seekkinoonni hawultensa.”
^ Woy “ayirrado.”
^ Woy “mulqiꞌraanote ooso.”
^ Woy “olantono.”
^ Woy “Seesu Gobbara.”
^ “Gabbarsiisanno” yaanno qaali giwire woy qaraxo gamba assanno mancho kulannoha ikkara dandaanno. Woy “illaallisannoha.”
^ Woy “gimbannihu.”
^ “Qorophisiisikkinni” yaano ikkara dandaanno.
^ Woy “xagarrotenni.”
^ Woy “olanto.”
^ “Qorophisiisikkinni” yaano ikkara dandaanno.
^ Noo gedeenni tirriro, “hardino.”
^ Woy “lolahunni hayishshante.”
^ Woy “hanqosi qullaawu gondoori widira qolanno.”
^ Woy “olanto.”
^ Woy “doge jaje; goowi alita naade.”
^ Woy “doge jaje.”
^ Woy “Isi darga.”
^ Woy “muxxe.”
^ “Ayirrisannorira baalaho” yaano ikkara dandaanno.
^ Woy “mimmitu ledo giwantanno.”
^ Woy “Seesu Gobba.”
^ Woy “muxxe.”
^ Woy “arrishsho fultanno raginni.”
^ Woy “Hoola yinoonni.”
