Daanieeli 3:1-30
-
Moote Nabukadanatsoori uurrisinota culku misile (1-7)
-
Misilete kumbuullanni gede hajanji (4-6)
-
-
Sase Ibiraawoota hajajama gibbino yine kassansi (8-18)
-
‘Magannakkira disoqqammeemmo’ (18)
-
-
Wala yitanno giira giddo tunginsa (19-23)
-
Giirate giddonni maalaletenni gattu (24-27)
-
Moote Ibiraawootu Magano gotti gotti assi (28-30)
3 Moote Nabukadanatsoori hojja 60 cigilenna* godowa 6 cigile* ikkitannota culku misile* seekkisiisiꞌri. Tenne misile Baabiloonete qoqqowi giddo Duura xawira uurrisi.
2 Hakkiinni Moote Nabukadanatsoori qoqqowu gashshaasine, sooreeyye, gobbate gashshaasine, amaalaasine, miinju mini sooreeyye, daanyootu, seeru egennaamminna qoqqowubbate gashshaasine baala Moote Nabukadanatsoori uurrisino misile maassora gamba yitanno gede sokka soy.
3 Konni daafira qoqqowu gashshaasine, sooreeyye, gobbate gashshaasine, amaalaasine, miinju mini sooreeyye, daanyootu, seeru egennaamminna qoqqowubbate gashshaasine baala Moote Nabukadanatsoori uurrisino misile maassora gamba yitu. Nabukadanatsoori uurrisino misile albaannino uurritu.
4 Lallawaanchuno lowo huuronni togo yee lallawi: “Kiꞌne addi addi daga giddonni dagginoonnirinna babbaxxino qaale coydhinanni gosa, togo assitinanni gede hajanjoonniꞌne:
5 Xurumbu, suusullete, kirre afiꞌrinohu muuziiqu uduunni, sase midaado afidhino gingilaate, ogoro afidhino suusullenna wolu muuziiqu uduunni baalu huuro macciishshitinanni woyte, uulla gombisantine Moote Nabukadanatsoori uurrisinote culku misilera kumbuulle.
6 Gombisame kumbuulannokkiha aye manchono hakkawoyintenni wala yitanno giira giddo tunganni.”
7 Konnira addi addi daga giddonni dagginorinna babbaxxino qaale coydhanno gosa baala xurumbu, suusullete, kirre afiꞌrinohu muuziiqu uduunni, sase midaado afidhino gingilaate, ogoro afidhino suusullenna wolu muuziiqu uduunni baalu huuro macciishshituti, uulla gombisante Moote Nabukadanatsoori uurrisinote culku misilera kumbuultu.
8 Hatte yannara Keledootu giddo mitootu alba higge dagge Ayhudoota kassassu.*
9 Insa Moote Nabukadanatsoori togo yitu: “Moote, hegerera heeꞌri.
10 Moote, ati xurumbu, suusullete, kirre afiꞌrinohu muuziiqu uduunni, sase midaado afidhino gingilaate, ogoro afidhino suusullenna wolu muuziiqu uduunni baalu huuro macciishshannohu aye manchino, uulla gombisame culku misilera kumbuulanno gede hajajootto;
11 qoleno uulla gombisame kumbuulannokkihu aye manchino, wala yitanno giirara tugamanno yootto.
12 Ikkollana Baabiloonete qoqqowira gashshaasine assite shoomoottori Sidiraaqi, Misaaqinna Abidinaago yinanni Ayhudooti no. Moote, kuri mannooti ate horo diayirrissannoreeti. Insa magannakkira disoqqantanno; uurrisoottote culku misilerano kumbuula gibbino.”
13 Hatte yannara Nabukadanatsoori hanqe fuu yee Sidiraaqi, Misaaqinna Abidinaago haaꞌne abbinanni gede hajaji. Hakko daafira, insa mootete albira haaꞌne abbini.
14 Nabukadanatsoori insa togo yii: “Sidiraaqi, Misaaqinna Abidinaago, magannaꞌyara soqqama gibbinoonni yinannitinna uurrisoommo misilera kumbuula gibbinoonniti addinta nooreeti?
15 Xa xurumbu, suusullete, kirre afiꞌrinohu muuziiqu uduunni, sase midaado afidhino gingilaate, ogoro afidhino suusullenna wolu muuziiqu uduunni baalu huuro macciishshitinanni woyte, uulla gombisantine seekkoommo misilera kumbuultiniro, danchaho. Kumbuula gibbiniro kayinni hakkawoyintenni wala yitanno giirara tunganniꞌne. Angaꞌyanni gatisaꞌnera dandaanno magani ayeti?”
16 Sidiraaqi, Misaaqinna Abidinaago mootete togo yite qoltu: “Nabukadanatsoori, konni coyra atera dawaro qola dihasiissannonke.
17 Giirate giddo tugammeemmoha ikkiro, soqqammeemmohu Maganinke wala yitanno giiranni gatisankera dandaanno; moote, angakkinnino gatisannonke.
18 Ikkollana isi gatisa hooginkero nafa, moote, magannakkira soqqammeemmokkitanna uurrisoottote culku misilera kumbuulleemmokkita afi.”
19 Hatte yannara Nabukadanatsoori Sidiraaqira, Misaaqiranna Abidinaagora lowo geeshsha hanqi; albisino wole ikki;* giirano albinni roore lamala ero bubbanno gede hajaji.
20 Hakkiinni olantosi giddo noori wolqaataammu mannooti Sidiraaqi, Misaaqinna Abidinaago usurte wala yitanno giira giddo tugganno gede hajaji.
21 Hakko daafira kuri mannooti uddano uddidhino gedeenni, yaano aaniidi uddanonsa, koffiyyinsanna wolu uduunni baalu aanansa heeꞌreenna usurte wala yitanno giira giddo tuggunsa.
22 Mootete hajajo lowo geeshsha kaajjado ikkitino daafiranna giirano quwa saꞌe wala yitino daafira, Sidiraaqi, Misaaqinna Abidinaago massitu mannooti giirate buwani iteenna reytu.
23 Ikkollana kuri sasu mannooti yaano Sidiraaqi, Misaaqinna Abidinaago usurantino gedeenni wala yitanno giira giddo ubbu.
24 Hakkiinni Moote Nabukadanatsoori ofollinowiinni mase kubbe kai; qara gashshaasinesino, “Usurre giirate giddo tungummo mannooti disaseho?” yee xaꞌmi. Insano mootete, “Ee, moote” yite qoltu.
25 Isino togo yee qolinsa: “Kuneeti usurantinokkiri shoolu mannooti giirate mereero millissanna laꞌꞌanni noommo; giirano diꞌꞌittinonsa; shoolkihu qole magannate beetto lawanno.”
26 Nabukadanatsoori wala yitanno giira waalchiwa shiqqi yee togo yii: “Woꞌmunkura Aliidi Magani soqqamaasine Sidiraaqi, Misaaqinna Abidinaago, fultine kawira amme!” Sidiraaqi, Misaaqinna Abidinaagono giirate giddonni fultu.
27 Hakko gamba yite noori qoqqowubbate gashshaasine, sooreeyye, gobbate gashshaasinenna mootenniri qara gashshaasine giira bisonsa gawajjitinokkita,* uminsa dananchi mittuno giiraminokkita, aaniidi uddanonsa dana mittoreno soorrantinokkita, wole agurina giirate fooli nafa aanansa nookkita laꞌu.
28 Hakkiinni Nabukadanatsoori togo yii: “Sokkaasinchosi soye soqqamaanosi gatisinohu Sidiraaqi, Misaaqinna Abidinaago Magani galatamo. Insa iso addaxxitino daafira mootete hajajo adha gibbino; qoleno uminsa Magano agurranna wolu maganira soqqamantenni woy wole magano magansiꞌrantenni reyo doodhitino.*
29 Konni daafira Sidiraaqi, Misaaqinna Abidinaago Maganira bushare coydhannoti aye dagano woy aye qaale coydhanno gosano murmurantanno gedenna mininsano dagate shuma mine* ikkanno gede hajajoommo; korkaatuno isi gede gatisa dandaannohu wolu mittu maganino dino.”
30 Hakkiinni moote Sidiraaqira, Misaaqiranna Abidinaagora Baabiloonete qoqqowi giddo biilloonye ledinsa.
Lekkaalliidi Qaagiishshuwa
^ Mite 27 meetire ikkitanno. Guwuursha B14 lai.
^ Mite 2.7 meetire ikkitanno. Guwuursha B14 lai.
^ Woy “sumuda.”
^ Woy “Ayhudootu suꞌma huntu.”
^ Woy “akatisi soorrame wole ikkinsa.”
^ Woy “bisinsa aana wolqa afidhinokkita.”
^ Woy “bisonsa sayisse uytino.”
^ “Ishine tunganniwa; fudu duuno” yaano ikkara dandaanno.
