Daanieeli 1:1-21
1 Yihudu moote Iyyoaaqeemi moohihunni sayikki diro, Baabiloonete moote Nabukadanatsoori Yerusaalame daye doyissi.
2 Yannate gedensaanni, Yihowa Yihudu moote Iyyoaaqeemi, halaalaanchu Magani minihu* gamu uduunni ledo angasira sayse uysi; isino haaꞌre Senaoori* gobbara noohu maganisi minira* massi. Isi uduunne maganisihu miinju mine wori.
3 Hakkiinni moote gama Israeele,* mootete ayiddinna ayirradu manni wido ikkitinori ledo abbanno gede, mootete miniha qara roorricha Ashifenaazi hajaji.
4 Insa mitte xeꞌneno nookkire, xumuulle, hayyo, egennonna wodancha noonsare, hattono mootete mine soqqama dandiitanno wedella* ikka hasiissannonsa. Keledootu borronna qaaleno rosiisannonsa gede hajajisi.
5 Hakkiinni saeno, moote barru sagalensa isi itannote dancha sagalenna isi aganno woyne aaninni haaꞌne uynanninsa gede hajaji. Insa sase diro qajeelsininsahu* gedensaanni, mootete soqqantannore ikkitanno.
6 Insa giddo mitu Yihudu gaꞌre* widooti; insano: Daanieeli,* Hanaaniya,* Misaeelinna* Azaariyaasiiti.*
7 Mootete minihu qaru roorrichi insara suꞌma* fushshinsa; Daanieelira Bilxaasoori, Hanaaniyara Sidiraaqi, Misaeelira Misaaqi, Azaariyaasira Abidinaago yee fushshi.
8 Daanieeli kayinni dancha mootete sagalenninna isi aganno woynenni battaawannokki gede wodanisinni murciꞌri. Hakko daafira konni garinni battaawannokki gede, mootete miniha qara roorricha fajjo xaꞌmiꞌri.
9 Halaalaanchu Maganino, mootete minihu qaru roorrichi Daanieelira shaqqannosi gedenna mararannosi* gede assi.
10 Ikkirono mootete minihu qaru roorrichi Daanieeli togo yiisi: “Ittinanninna agginanni sagale hajajinoha mootichaꞌya moote waajjoommo. Isi darawoꞌne ikkitinori wolu wedellinni* roore jaabbinoonnirella afi? Mootete albaanni ane* qarru giddo tugginaeraati.”
11 Ikkollana Daanieeli mootete minihu qaru roorrichi Daanieeli, Hanaaniya, Misaeelinna Azaariyaasi agarara shoomino mancho togo yii:
12 “Eeggatena, ninke soqqamaasinekki tonnu barri geeshsha fonqolte lainke; inteemmo akaakiltenna angeemmo waa uynonkena;
13 hakkiinni ninkenna dancha mootete sagale ittanno wedelloota* heewisiisse lai; hakkunni gedensaanni laootto garinni ninke soqqamaanokki baxittota assi.”
14 Isino yitinorira sumuu yee tonne barra fonqolinsa.
15 Tonnu barri jeefora, insa dancha mootete sagale ittanno wedellooti baalunni* roore dana biiffenna fayyuulle ikkite* leeltu.
16 Konni daafira agaraanchu insara hajanjoonnita dancha sagalenna woyne hoole akaakilte uyinsa.
17 Halaalaanchu Maganino kuri shoolunku wedellootira* duuchunku gari borronna hayyo huwattanno gede egennonna wodancha uyinsa; qoleno Daanieelira duuchunku gari ajuujanna haaqee huwatate dandoo uynoonnisi.
18 Moote wedella baalanka isi albira abbinara murino yanna iillituta, mootete minihu qaru roorrichi Nabukadanatsoori albira shiqishinsa.
19 Moote insa hasaawisi woyte, baalunku wedelli giddo Daanieeli, Hanaaniya, Misaeelinna Azaariyaasi gedeehu mittuno dino; insano mootete albaanni soqqantannore ikkitu.
20 Moote hayyonna wodancha hasiissanno hajo baala kayse xaꞌmi woyte, insa gashshootisi baalu giddo noore diginte loossanno kakkalaanonna kiilaano baala tonne ero roortu.
21 Daanieelino Moote Qiroosi gashshootihu umi diri geeshsha hakko heeꞌrino.
Lekkaalliidi Qaagiishshuwa
^ Woy “qullaawu minihu.”
^ Baabiloonete gobbaati.
^ Woy “galmira.”
^ Noo gedeenni tirriro, “Israeelete ooso.”
^ Noo gedeenni tirriro, “ooso.”
^ “Towaantinsahu” yaano ikkara dandaanno.
^ “Maganu Gedeehu Ay No?” yaa ikkara dandaanno.
^ “Yihowa Kaaꞌlino” yaate.
^ “Yihowa Ayirrinye Leellishino” yaate.
^ “Maganu Daanyaꞌyaati” yaate.
^ Noo gedeenni tirriro, “ooso.”
^ Baabiloonootu suꞌma yaate.
^ Woy “maarannosi.”
^ Noo gedeenni tirriro, “ooso.”
^ Noo gedeenni tirriro, “umoꞌya.”
^ Noo gedeenni tirriro, “ooso.”
^ Noo gedeenni tirriro, “ooso baalatenni.”
^ Noo gedeenni tirriro, “gujjo biiffenna keeꞌmite.”
^ Noo gedeenni tirriro, “oosora.”
