Daanieeli 6:1-28
6 Daariyoosi gashshootisi woꞌmu giddo 120 qoqqowu gashshaasine shoomate hedi.
2 Qoleno insara aliidire asse sase qara gashshaasine shoomi; kuri giddo mittu Daanieeliiti; mootete woxi afimalannokki gede qoqqowu gashshaasine insa hunda heedhe loossanno.
3 Daanieeli baxxino ayyaani noosiha ikkino daafira, wole qara gashshaasinenninna qoqqowu gashshaasinenni roore ikkado ikkinota* loosisinni leellishi; mooteno isira gashshootu woꞌmu giddo ayirrado baycho aasira hedi.
4 Hatte yannara qara gashshaasinenna qoqqowu gashshaasine gashshootu* hajo lainohunni Daanieeli kassassanno faro hasidhanni no; ikkollana Daanieeli ammaꞌninanniha, xeꞌne nookkihanna qorophe loosannoha ikkino daafira, kassassannosita mitte soꞌro woy xeꞌne afiꞌra didandiitino.
5 Hakkiinni kuri mannooti togo yitu: “Maganisi seeri ledo xaadooshshe afiꞌrinore ikkiro ikkinnina, Daanieeli kassasa dandiineemmoti wole mitte doogono dino.”
6 Hakko daafira, kuri qara gashshaasinenna qoqqowu gashshaasine mitteenni gamba yite mootenniwa eꞌe togo yitu: “Moote Daariyoosi, hegerera heeꞌri.
7 Moote, 30 barri geeshsha ate agurranna wole magano woy wole mancho huucciꞌrannoha aye manchono doobbiyu balera tunganni gede hajajannoha mootete lallawa fushshinanni gedenna agambanni gede, gashshaasine, sooreeyye, qoqqowu gashshaasine, mootete amaalaasinenna gobbate gashshaasine baala amaalante sumuu yitino.
8 Konnira moote, shaaramannokkihu Medooninna Faarsi seeri garinni, soorramannokki gede konne lallawa kaajjishi; borrote aanano malaatisi.”
9 Hakko daafira, Moote Daariyoosi agawo amaddino borro aana malaatisi.
10 Ikkollana Daanieeli lallawaho malaate worre kaajjinshoonnita afiti hakkawoyintenni minisira ei; mineho aanaanni seekkinoonni dargisira,* alba Yerusaalamete widira higge noo maskootta faꞌnante no. Isi hakkunnira albaanni woꞌmanka woyte assannonte gede, barrunni sase hige guluphe huuccatto assiꞌri; Maganosino guwisiꞌri.
11 Mannootu waalcho dhoosse eꞌu woyte, Daanieeli Maganisi albaanni ayirrinye afiꞌrate huucciꞌranninna eeggifatanni nooha affu.
12 Konnira insa mootenniwa marte, “Moote, 30 barri geeshsha ate agurranna wole magano woy wole mancho huucciꞌrannoha aye manchono doobbiyu balera tunganni gede hajajannoha mootete lallawa malaatisse dikaajjishootto?” yite moote fushshino agawa qaagiissitusi. Mooteno, “Tini hajo shaaramannokkihu Medooninna Faarsi seeri garinni kaajjitinote” yee qoli.
13 Insano afiisinni qocce haadhe mootete togo yitu: “Moote, Yihudunni qafadante dagginori wido ikkinohu Daanieeli ateno malaatisse fushshootto lallawano diayirrisanno; hatteentenni isi barrunni sase hige huuccatto assiꞌranno.”
14 Moote tenne macciishshiti lowo geeshsha dadilli; qoleno Daanieeli gatisanno doogo heda hanafi; arrishsho eꞌa geeshshano iso gatisate dandiire baala assanni keeshshi.
15 Jeefoteno kuri mannooti mitteenni gamba yite mootenniwa eꞌe togo yitusi: “Moote, Medooninna Faarsi seeri garinni moote fushshinoha mitto agawano woy lallawano soorra dandiinannikkita habbooti.”
16 Hakko daafira moote hajajo uy; insano Daanieeli abbite doobbiyu balera tuggu. Hakkiinni moote Daanieeli, “Woꞌmanka woyte soqqamattohu Maganikki gatisannohe” yii.
17 Hakkiinni kincho abbite balete afiira tuꞌu; mooteno Daanieeli aana adhinoonni qaafo soorrantannokki gede, umisi cuuenninna ledosi gashshitannori cuuenni kinchu aana maattama gani.
18 Hakkiinni moote gashshootu minisira haꞌri. Qoleno qatume gali; mittu coyinnino boohaara giwi;* goxichuno giwisi.*
19 Jeefoteno moote duuꞌmo saaqquta, kae muddamanni doobbiyu balewa mari.
20 Isi balenniwa shiqqi yiiti dadillinohu mitu Daanieeli woshshi. Moote iso, “Heeshshote Magani soqqamaancho Daanieeli, woꞌmanka woyte soqqamattohu Maganikki doobbiyu afiinni gatisahera dandiino?” yee xaꞌmi.
21 Daanieelino hakkawoyintenni moote togo yii: “Moote, hegerera heeꞌri.
22 Maganiꞌya sokkaasinchosi soye doobbiyu afoo cufino; insano digawajjitinoe; korkaatuno albasiinni keeraancho ikke leelloommo; moote, ate aanano assoommo sao dino.”
23 Mooteno lowo geeshsha hagiidhe, Daanieeli balete giddonni fushshinanni gede hajaji. Daanieelino balete giddonni fushshini; isi Maganosi addaxxino daafira mittoreno digawajjamino.
24 Hakkiinni moote hajajeenna, Daanieeli kassassure* abbine oosonsanna meentinsa ledo mitteenni doobbiyu balera tungi. Insa balete hundira nafa iillitukkinni doobbiyu bibbidinsa; miqqansa baalano cancani.
25 Hakkiinni Moote Daariyoosi baatto baalate heeꞌranno manni baalaho, daga baalatenna babbaxxino qaale coydhanno gosa baalate togo yee borreessi: “Keeru batiꞌroꞌne!
26 Gashshootiꞌya baalu giddo heeꞌranno manni Daanieeli Magano waajje huxiꞌranno gede hajajoommo. Korkaatuno isi hegerera heeꞌrannoho heeshshote Maganooti. Mootimmasino horo dibaꞌannote; gashshootisino hegereho.*
27 Isi agarannoho hattono gatisannoho; isi gordohonna baattote dhaggenna maalale loosanno; korkaatuno isi Daanieeli doobbiyu afiinni* gatisino.”
28 Konnira Daanieelira Daariyoosi gashshooti giddonna Faarsichu Qiroosi gashshooti giddo baaluri qiniisi.
Lekkaalliidi Qaagiishshuwa
^ Woy “roore guunte noosita.”
^ Noo gedeenni tirriro, “mootimmate.”
^ Woy “sagannatesira.”
^ “Mittono muuziiqa gananno mancho isiwa diabbinoonni” yaano ikkara dandaanno.
^ Noo gedeenni tirriro, “goxichu isiwiinni xooqi.”
^ Woy “Daanieeli suꞌma hunture.”
^ Woy “aliidimmasino hegerete.”
^ Noo gedeenni tirriro, “anganni.”
