Daanieeli 2:1-49
-
Moote Nabukadanatsoori haaqiiꞌrino haaqee lowo geeshsha yaachishshinosi (1-4)
-
Hayyoolete giddonni haaqee kula dandiinohu mittu manchino dino (5-13)
-
Daanieeli kaaꞌlo afiꞌrate alba Maganunniwa higino (14-18)
-
Fojo ikkino coye xawisinosi daafira Magano guwisiꞌri (19-23)
-
Daanieeli haaqee mootete kuli (24-35)
-
Haaqeete tiro (36-45)
-
Misile cancananno kincho (44, 45)
-
-
Moote Daanieeli ayirrisisi (46-49)
2 Nabukadanatsoori moohihunni layinki diro, duucha haaqee haaqiiꞌri; qoleno isi* lowo geeshsha yaadino daafira goxichu giwisi.
2 Konni daafira moote haaqiiꞌrino haaqee kultannosi gede, diginte loossanno kakkalaano, kiilaano, gojaammanna Keledoota* woshshinanni gede hajaji. Konnira insa eꞌe mootete albaanni uurritu.
3 Hakkiinni moote, “Haaqee haaqiiꞌroommo; haaqiiꞌroommo haaqee afa hasiꞌroommo daafira lowo geeshsha yaadoommo” yiinsa.
4 Keledootuno Aramaykete qaalinni* mootete togo yite qoltu: “Moote, hegerera heeꞌri. Ninke soqqamaanokki tirose kulleemmohena, haaqiiꞌrootto haaqee kulinke.”
5 Mooteno Keledootaho togo yee qoli: “Gumulote yooꞌya tenneeti: Haaqeeꞌya tironte ledo kultinanniekkiha ikkiro, bisoꞌne murmurranni; miniꞌneno dagate shuma mine* ikkanno.
6 Haaqeenna tirose kultiniero kayinni, baꞌraarsha, afanshanna lowo ayirrinye eemmoꞌne. Hakko daafira, haaqeenna tirose kulleꞌꞌe.”
7 Insano layinkimeeshsho togo yite qoltu: “Moote haaqiiꞌrino haaqee ninke soqqamaanosira kulonkena, ninkeno tirose kulleemmona.”
8 Mooteno togo yee qoli: “Gumulote yooꞌya affinoonni daafira, yanna keeshshiishate woꞌnaaltinanni heedhinoonnita seekke afoommo.
9 Haaqee kula hoogginiero, baalunku mittu gari qoricha adhitinanni. Kiꞌne kayinni coy soorrama geeshsha kapho kultinaeranna dogginaera sumuu yitinoonni. Konnira haaqiiꞌroommo haaqee kulleꞌꞌe; anino tirose kula dandiitinannieta tennenni afeemmona.”
10 Keledootu mootete togo yite qoltu: “Moote asse yiinore assa dandaannohu mittu manchino baattote* aana dino; korkaatuno, mittuno jawu moote woy gashshaanchi, togoore assi yee diginte loosanno kakkalaancho woy kiilaancho woy Keledicha xaꞌme diegennino.
11 Moote xaꞌmanni noo coy didandiinanniho; mannu mereero* heedhannokki maganna agurranna, tenne mootete kula dandaannohu mittuno dino.”
12 Hatte yannara moote hanqe fuu yii; Baabiloonete noo hayyoole baala shine gundanni gedeno hajaji.
13 Hajajo fultutanna hayyoole baala shine gundara kaꞌnita, Daanieelinna miillasino shitara hassu.
14 Hatte yannara Daanieeli, Baabiloonete hayyoole shaara fulinoha mootete agaraasine roorricha Ariyooki hayyotenni qorophe hasaawisi.
15 Isi moote wodhino gashshaancho Ariyooki, “Moote tenne kaajjado hajajo mayra fushshi?” yee xaꞌmi. Hakkiinni Ariyooki Daanieelira coye xawise kulisi.
16 Konni daafira, Daanieeli mootenniwa eꞌꞌe haaqeete tiro isira kulanno yanna uynannisi gede moote huucciꞌri.
17 Hakkiinni Daanieeli minisira haꞌre miillasira Hanaaniyara, Misaeeliranna Azaariyaasira tenne hajo kulinsa.
18 Qoleno Daanieelinna miillasi wole Baabiloonete hayyoole ledo shinanninsakki gede, gordu Magani maarannonsa gedenna tenne fojo xawise kulannonsa gede, huuccatto assitara kulinsa.
19 Hakkiinni hashsha Daanieelira fojo ajuujatenni kullisi. Konnira Daanieeli gordu Magano guwisi.
20 Daanieeli togo yii:
“Maganu suꞌmira hegere hegerera* guweenyu ikko;Hayyonna wolqa isi callitena.
21 Isi yannanna wogga soorranno;Mootoolla darginsanni hoolanno; qoleno woranno;Hayyoolete hayyo, wodanchitannorirano egenno aanno.
22 Murgo ikkinorenna maaxamino coye xawisanno;Isi tunsote noore afanno;Xawaabbuno ledosi heeꞌranno.
23 Annuwaꞌya Magano, atera galatanna guweenya uyiꞌreemmohe;Korkaatuno ati hayyonna wolqa oottoe.
Xa qolte huucciꞌnoommohe coye xawisoottoe;Moote yaachishino coyeno kuloottonke.”
24 Hakkiinni Daanieeli Baabiloonete hayyoole gudara moote shoominohuwa Ariyookiwa mare togo yii: “Baabiloonete hayyoole giddo mittono shitooti. Ane mootete albira massie; haaqeete tiro mootete ani kuleemmona.”
25 Ariyookino hakkawoyintenni Daanieeli mootete albira masse togo yii: “Qafadame daynohu Yihudu manni giddo haaqeete tiro mootete kula dandaannoha mitto mancho afoommo.”
26 Mooteno Bilxaasoori yinanniha Daanieeli, “Haaqiiꞌroommo haaqee tironte ledo addinta kulattoera dandaatto?” yee xaꞌmi.
27 Daanieeli mootete togo yee qoli: “Hayyoolete giddo, kiilaanote giddo, diginte loossanno kakkalaano giddo woy ayyaantote giddo, moote xaꞌmino fojo kulasira dandaannohu mittuno dino.
28 Ikkollana Fojo Xawisanno Magani gordoho no; isi goofimarchu barra ikkannore Moote Nabukadanatsoorira xawisino. Daallasikkira goxxe heedhe haaqiiꞌrootto haaqeenna laootto ajuuja kuriiti:
29 “Moote, daallasikkira goxxe heedhe albillitte ikkannore heddanni nootto; Fojo Xawisanno Maganino albillitte ikkannore kulinohe.
30 Anera tenne fojo xawinsoonniehu, mannu baalunnita roortino hayyo nooe daafira diꞌꞌikkino; hatteentenni wodanikkira noo hedo afa dandaatto gede, haaqeete tiro mootete kuleemmo gedeeti.
31 “Moote, seekkite laꞌanni heedhe mitte jawa misile* laitto. Hatti jawanna bilicci bilicci yitanno misile albakkiinni uurrite no; danano lowo geeshsha waajjishshannote.
32 Misilete umo filu culkinni, gagasonna cigile birrunni, godowanna giwooda camotenni,
33 mogole siwiilunni, hattono lekka gama darate siwiilunni gama darate dorunni* seekkinoonni.
34 Atino mittu kinchi mannu anga kissukkinni kae, siwiilunninna dorunni seekkinoonnita misilete lekka gane cancananna laitto.
35 Hatte yannara siwiilu, doru, camo, birru, culku, baalunku mitteenni hiiqqaqqami; qoleno arro ayiddummete gatanno galawi gede ikki; diilallono mitturino gatikkinni adhite hadhu. Misile gani kinchi kayinni jawa ilaala ikki; baatto baalano woꞌmi.
36 “Haaqee tenneeti; xa haaqeete tiro mootete kulleemmo.
37 Moote, ati mootoollate mooteeti; gordu Magani gashshoote, wolqa, jawaantenna ayirrinye uynohe;
38 qoleno ayewano heeꞌranno manna, dubbu moychonna iimi cea angakkira sayse uynohe; baalunkura gashshaancho assinohe; culku umi ate umokkiiti.
39 “Ikkollana ate gedensaanni, atenni ajinohu wolu gashshooti kaꞌꞌanno; hakkiinni baatto baala gashshannohu wolu sayikkihu camote gashshooti kaꞌꞌanno.
40 “Shoolki gashshooti kayinni siwiilu gede kaajjado ikkanno. Siwiilu baalankare cancanannonna buko buluulo assannonte gede, kuni gashshootino cancananno siwiili gede, kore gashshootubba baala cancananno hattono buko buluulo assanno.
41 “Lekkanna qubbuwa gama darate dorunni gama darate siwiilunni seekkinoonnita laittonte gede, gashshootuno bebbeehaminoha ikkanno; ikkollana siwiilu doru ledo karsame nooha laittonte gede, siwiilu gede mito geeshsha kaajjado ikkanno.
42 Qoleno lekkate qubbuwa gama darate siwiila gama darate dora ikkitinonte gede, gashshootuno gama darate kaajjado gama darate wolqiweelo ikkanno.
43 Siwiilunna doru karsame nooha laittonte gede, insano mannu* ledo karsantanno; ikkollana siwiilu doru ledo mitto ikkannokkinte gede, insano mimmitu ledo mitto diꞌꞌikkitanno.
44 “Hattenne mootoolla yannara gordu Magani horonta baꞌꞌannokki gashshoote xintanno. Konne gashshoote wole dagara diuynanni. Isino tenne gashshootubba baala cancananno hattono coꞌo asse hunanno; isi callu hegerera kaajje heeꞌranno;
45 mittu kinchi mannu anga kissukkinni ilaalu aaninni kae siwiila, camo, dora, birranna culka cancananna laittonte gede, hatto ikkanno. Jawu Magani albillitte ikkannore mootete leellishinosi. Haaqee halaaleho; tiroseno hawaqiꞌnannite.”
46 Hakkiinni Moote Nabukadanatsoori Daanieeli albaanni gombisame uwe, lowo ayirrinye uysi. Afanshanna hixaana shiqinshannisi gedeno hajaji.
47 Moote Daanieelira togo yii: “Addanko Maganiꞌne magannate Maganootinna mootoollate Mootichaati; qoleno Fojo Xawisanno Maganooti; korkaatuno ati tenne fojo xawisa dandootto.”
48 Hakkiinni moote Daanieeli gotti gotti assisi; batinye dancha afanshano uysi; qoleno Baabiloonete qoqqowi baalunkura gashshaanchonna Baabiloonete hayyoole baalate qara roorricha asse shoomisi.
49 Daanieeli kuleenna moote Sidiraaqi, Misaaqinna Abidinaago Baabiloonete qoqqowi gashshaasine asse shoominsa; Daanieeli kayinni mootete mine soqqamanno.
Lekkaalliidi Qaagiishshuwa
^ Noo gedeenni tirriro, “ayyaanisi.”
^ Kuri kiilohonna beeddahe kiirate fullakkino gaamooti.
^ Daanieeli 2:4b kayse 7:28 geeshsha umo borreessinoonnihu Aramaykete qaalinniiti.
^ “Ishine tunganniwa; fudu duuno” yaano ikkara dandaanno.
^ Woy “moola baatto.”
^ Noo gedeenni tirriro, “maalu ledo.”
^ Woy “Hegerenni hegere geeshsha.”
^ Woy “sumuda.”
^ Woy “giirroonni (suude fushshinoonni) dora.”
^ Woy “mannu sircho.” Mulla manna kultanno yaattooti.
