Daanieeli 10:1-21
10 Faarsi Moote Qiroosi moohihunni sayikki diro, Bilxaasoori yinannihura Daanieelira mitte ajuuja leellinshisi; tini sokka halaaleho; sokka jawu oli daafira kultannote. Isi tenne sokka huwatino; laino coyeno wodanchino.
2 Hatte yannara ani Daanieeli sase lamala woꞌma dadillanni keeshshoommo.
3 Hatti sase lamala gooffu geeshsha dancha sagale diꞌꞌitoommo; maalano ikko woyne diqamasoommo; bisohono zayte dibuudhoommo.
4 Umi aganira 24ki barra jawu lagira yaano Xegiroosi* gamira heeꞌre,
5 haxo gotti yee laeemmo woyte, shalaalatenni gannoonni uddano uddiꞌre, halloho Ufaazi culkinni seekkinoonni qawatto qodhinoha mitto mancho laummo.
6 Bisisi kirisooleti lawanno; albisi banqote gedeeho; illesi maashshi yaanno kiffala labbanno; angasinna lekkasi cala cala yitanno camo gedeete; huurosino lowo daga huuro gedeeti.
7 Ajuuja ani Daanieelilla laoommo; ledoꞌya noo manni ajuuja dilaino. Ikkollana insa lowo geeshsha massino daafira xooqqe maaxantu.
8 Hakkiinni ani callu gatummo; tenne jawa ajuuja laummo woyte, giddoꞌya wolqate yinanniri horo digatino; gaamaarreꞌyano baꞌu; wolqaꞌya baalano gooffu.
9 Hakkiinni isi coyiꞌranna macciishshummo; ikkollana isi coyiꞌranna macciishshanni heeꞌre, alba hige gombisame uwe, goxe baummo.
10 Hakkiinni mitte anga amammaddue; goxoommowiinni kayissuehu gedensaanni, angatenni baatto cuꞌmiꞌre, gulucho irkiꞌre kae uurreemmo gede assitue.
11 Hakkiinni isi togo yiie:
“Maganu lowo geeshsha baxannohehu* Daanieeli, kuleemmohe coye illachishi. Atewa sonkeennae dayommona xa kaꞌe uurri.”
Hatto yiieta, huxiꞌranni kae uurrummo.
12 Hakkunni gedensaanni togo yiie: “Daanieeli, waajjitooti. Konne coye huwatate lowo geeshsha hixamanyanna Maganikki albaanni umokki heeshshi assa hanafitto barrinni kayisse huuccattokki macciishshantino; anino atewa dayommohu iseraati.
13 Ikkollana Faarsi gashshooti roorrichi 21 barra ittisinoe. Gedensoonni kayinni qaru roorrooti* giddonni Mikaeeli* yinannihu kaaꞌlaera day; anino Faarsi mootoolla ledo hakko keeshshummo.
14 Ajuuja lowo diri gedensaanni woꞌmitannota ikkitino daafira, goofimarchu diro mannikkira iillannore kulammohera dayommo.”
15 Hatto yiieta, uulla hige dugunuunummo; coyiꞌrano hoogummo.
16 Hakkiinni manna lawannohu suumeꞌya amammadie; anino afoo faꞌne albaꞌyaanni uurre nooha togo yuummo: “Mootichaꞌya, ajuujatenni kainohunni huxiꞌranni noommo; wolqano dinoe.
17 Hakko daafira mootichiꞌya soqqamaanchi mootichiꞌya ledo hiitto ikke hasaawa dandaanno? Korkaatuno xa wolqate yinanniri dinoe; giddoꞌya gatino foolino dino.”
18 Manna lawannohu wirro amammade jawaachishie.
19 Hakkiinni isi togo yiie: “Maganu lowo geeshsha baxannohe mancho,* waajjitooti. Ikkattori dino. Jawaati; waajjitootina jawaati.” Isi hasaawisanni heeꞌreennae jawaate kae, “Jawaante oottoena mootichaꞌya coyiꞌri” yuummo.
20 Hakkiinni togo yiie: “Atewa dayommohu mayraatiro afootto? Xa Faarsi roorrichi ledo olamammora galagale haꞌreemmo. Ani haꞌrummohu gedensaanni Girikete roorrichi daanno.
21 Ikkirono halaalu borro giddo borreessinoonnire kuleemmohe. Konni coyra roorrichaꞌne Mikaeeli agurranna gari geeshsha* kaaꞌlannoehu dino.
