Daanieeli 7:1-28
7 Baabiloonete Moote Belshazaari moohihunni umi diro, Daanieeli daallasisira goxe heeꞌre haaqeenna ajuuja lai. Hakkiinni laino haaqee borreessi; isi laino coye baala tittire borreessino.
2 Daanieeli togo yee odeessi:
“Hashsha laoommo ajuujara, shoolenti gordu bubbe lowo baara hembeelsitanna laummo.
3 Hakkiinni baaru giddonni shoolu jajjabbu moychi fuli; mittu mittunku addi addireeti.
4 “Umihu doobbiicho lawanno; qoleno allamurchu qoola afiꞌrino. Ani laꞌꞌanni heeꞌreenna qoollasi tattaꞌu; konne moycho baattote aaninni iima qolle kayinse mannu gede lame lekkanni uurranno gede assini; mannu wodanano uynisi.
5 “Kuneeti layinki moychi dibi yinanni moycho lawanno. Kuni moychi mittu midaadinni uurre no; afiisira hinkosi mereero sasu midashshu miqichi no; hakkiinni ‘Kaꞌe, lowo maala iti’ yinisi.
6 “Konni gedensaannino laummo; kuneeti daguncho lawannohu wolu moychi no; ikkollana badhete shoole ceate qoola afiꞌrino. Kuni moychi shoole umo afiꞌrinoho; gashshanno gedeno biilloonye uynisi.
7 “Hakkunni gedensaanni hashsha laoommo ajuujara, waajjishannoha, masisannohanna baxxitino wolqa afiꞌrinoha shoolki moycho laummo; jajjabba siwiilu hinko noosiho. Kuni moychi itanninna cancananni, gatinohano lekkatenni kakkaxxanni no. Isira albaanni noohu wolu moychi baalunni baxxinoho; qoleno tonne buuda afiꞌrino.
8 Buuddasi laꞌꞌanni heeꞌreenna, kuneeti wolu shiimu buudi mereeronsa fuli; umi buuddasi giddo sasu albasiinni luqqisante fultu. Kuneeti konni buudira mannu ille labbanno illuwa no; qoleno booꞌne* coyiꞌranno afii noosi.
9 “Ani laꞌꞌanni heeꞌreenna, zuufaanna qixxeessini; Biꞌre Birqiiqihuno ofolli. Uddanosi kaadete gede waajjote; umisi dananchino coꞌitte geꞌreewu orda lawanno. Zuufaanesi giirate buwanooti; qallasino bubbanno giiraati.
10 Giirate xashshi albisinni burqanninna lolahanni no. Kume higge kumu soqqantanni noosi; tonne kume higge tonnu kumino* albasiinni uurrite no. Shilootu hanafi; maxaaffano faꞌnantu.
11 “Hatte yannara, buudu booꞌne* coyiꞌranni noo daafira sammi yee laummo; ani laꞌꞌanni heeꞌreenna, hakkonne moycho shini; reeshshasino giirame baꞌꞌanno gede wala yitanno giira giddo tungi.
12 Wole moychubba biilloonyeno haaꞌne hoolli; ikkollana mite yannanna wogga geeshsha heedhanno gede agurrinsa.
13 “Xaano hashsha laoommo ajuuja laꞌꞌanni heeꞌreenna, manchu beetto lawannohu gordu gomichi ledo day; Biꞌre Birqiiqihu noowa eanno gedeno fajjinisi; isi albirano shiqinshisi.
14 Addi addi daganna babbaxxino qaale coydhanno gosa baala soqqantannosi gede, biilloonye, ayirrinyenna gashshoote uynisi. Biilloonyisi gawalo nookkihonna hegereho; gashshootisino baꞌꞌannokkiho.
15 “Ani Daanieeli laoommo ajuuja waajjishshinoe daafira, lowo geeshsha yaadummo.*
16 Hakko uurrite noori giddo mittunniwa shiqqi yee, konni coyta halaalaancho tiro kulannoe gede xaꞌmummo. Isino dawaro qolie; konni coy tirono kulie.
17 “‘Kuri shoolu jajjabbu moychi uullate aaninni kaꞌannote shoole mootoollaati.
18 Ikkollana Woꞌmunkura Aliidi Magani qullaawooti, gashshoote adhitanno; gashshooteno hegerera, ee, hegere hegerera ragidhanno.’
19 “Hakkiinni wolu moychi baalunni baxxinohu shoolki moychi daafira lede afa hasiꞌrummo; kuni moychi lowo geeshsha waajjishannoho; siwiilu hinkonna camote culunqa noosiho; qoleno itanninna cancananni, gatinohano lekkatenni kakkaxxanni no;
20 qoleno umisira noote tonne buudda daafira hattono gedensoonni hige fulihunna sasu albasiinni ubbuhu wolu buudi daafira yaano illenna booꞌne* coyiꞌranno afoo afiꞌrinohunna geeshsha woloota rooranno buudi daafira afa hasiꞌrummo.
21 “Ani laꞌꞌanni heeꞌreenna, hakku buudi qullaawootu aana ola kaysi; qoleno wolqisinsa;
22 kuni ikkinohu Biꞌre Birqiiqihu daa geeshshaatinna Woꞌmunkura Aliidi Magani qullaawootira dancha yoo yinansa geeshshaati; qullaawootu gashshoote ragidhannoti hirqinoonni yannano iillitu.
23 “Isino togo yii: ‘Shoolki moychi uullate aana kaꞌꞌannoho shoolki gashshooteeti. Kuni gashshooti wolu gashshooti baalunni baxxinoha ikkanno; baatto gudise hunanno, kakkadanno, hattono cancananno.
24 Tonne buudda, hakkunni gashshooti giddonni kaꞌannote tonne mootoollaati; insa gedensaannino wolu kaꞌꞌannohu no; isi umirinni baxxinoha ikkanno; sase mootoollano shollishanno.
25 Woꞌmunkura Aliidi Magano hettise coyiꞌranno; Woꞌmunkura Aliidi Magani qullaawootano xaa xaa waadanno. Dironna seera soorrate kaꞌꞌanno; insano sase dironna darate* angasira sayinse uynanni.
26 Ikkollana Shilootu hanafi; biilloonyesino haadhe hooltu; hakkiinni iso coꞌo assite huntu.
27 “‘Gordu woroonni noo gashshoote, biilloonyenna gashshootu gaacheena baala Woꞌmunkura Aliidi Magani qullaawoota ikkino mannira uyni. Gashshootinsa hegere gashshooteeti; gashshootu baaluno soqqamannonsa hattono hajajamannonsa.’
28 “Konni coy gumulo tenneeti. Ani Daanieeli hedoommo coy lowo geeshsha waajjishie; hakko daafira albiꞌya wole ikki;* konne coye kayinni wodanaho wodhummo.”
