Daanieeli 4:1-37
4 “Moote Nabukadanatsoori, baatto woꞌmate heeꞌranno mannira, dagaranna babbaxxino qaale coydhanno gosa baalate soyno sokka: Keeru batiꞌroꞌne!
2 Woꞌmunkura Aliidi Magani leellishinoe maalalenna assinoeha dhaggete looso kuleemmoꞌne woyte tashshi yaannoe.
3 Maalalesi mageeshshi geeshsha jawate! Dhaggete loosisino mageeshshi geeshsha batiꞌraho! Mootimmasi hegere mootimmaati; gashshootisino ilamatenni ilamate geeshsha heeꞌrannoho.
4 “Ani Nabukadanatsoori mineꞌya deseꞌe yee, gashshootiꞌya mineno qawaaxxiꞌre heeꞌreemmo.
5 Mitto barra mitte waajjishshanno haaqee haaqiiꞌrummo. Daallasiꞌyara goxe heeꞌreenna, waajjishshanno misillanna ajuuja leeltue.
6 Hakko daafira haaqeete tiro kultannoe gede, Baabiloonete hayyoole baala anewa abbinanni gede hajajummo.
7 “Hakkiinni diginte loossanno kakkalaano, kiilaano, Keledootunna* ayyaanto anewa daggu. Haaqiiꞌroommo haaqee kulummonsata, insa tirose kultaera didandiitino.
8 Jeefoteno, maganiꞌya suꞌminni Bilxaasoori yine woshshinannihunna qullaawa maganna ayyaani noosihu Daanieeli ane albira shiqi; anino haaqiiꞌroommo haaqee kulummosi:
9 “‘Diginte loossanno kakkalaano roorricha Bilxaasoori, qullaawa maganna ayyaani ate aana nootanna tira dandaattokki fojo horo nookkita seekke afoommo. Hakko daafira haaqeetenni laummo ajuujanna tirose xawisie.
10 “‘Daallasiꞌyara goxe heeꞌre laoommo ajuujara, baattote mereero fultinota mitte haqqicho laummo; tini haqqicho hojja lowo geeshsha seedate.
11 Tini haqqicho lophite kaajjado ikkitu; guunxoseno gordo iillitu; qoleno baatto baalate qacce geeshsha leeltannota ikkitu.
12 Haqqicho daro biiffinote, lowo laalo afidhinote; qoleno baalunkura ikkitanno sagale aanase no. Dubbu moychi hundase caaꞌlanno; iimi ceano sinnasera heedhanno; kalaqamu baalu* isewiinni sagale afiꞌranno.
13 “‘Daallasiꞌyara goxe ajuuja laꞌꞌanni heeꞌre, qullaawa ikkinohu mittu agaraanchi gordunni dirranna laummo.
14 Isino lowo huuronni togo yii: “Haqqicho karre; sinnaseno murmurre; daroseno giggishshe; laaloseno billaallisse! Saada woriidisenni, ceano sinnase aaninni xooqqo.
15 Cifichose kayinni siwiilunninna camotenni xaaxxine xawoho hayissote mereero rumushshunku ledo baattote giddo agurre. Gordu loji shanshona; qeechisino baattote muꞌro mereero moychu ledo ikkona.
16 Wodanisi mannu wodaniwiinni soorramo; moychu wodana uynosi; hatto ikke heeꞌreenna lamalu diri saosina.
17 Konne coye agaraasine dudubbino; hirqitinorino qullaawootaho; kuni ikkinohu, Woꞌmunkura Aliidi Magani mannu ooso gashshootira Gashshaancho ikkinota, gashshootesi baxinohura aannotanna mannu baalu giddo mishaminoha gashshootisira shoomannota lubbote noori affanno gedeeti.”
18 “‘Ani Moote Nabukadanatsoori haaqiiꞌroommo haaqee tenneeti; Bilxaasoori, haaqeeꞌya tiro kulie; korkaatuno gashshootiꞌya giddo nooti wole hayyoole baala tirose kultaera didandiitino. Ati kayinni qullaawa maganna ayyaani aanakki noo daafira, kulattoera dandaatto.’
19 “Hatte yannara, Bilxaasoori yinannihu Daanieeli shiima yanna mase jalli yii; hedino coyno lowo geeshsha waajjishisi.
“Hakkiinni moote, ‘Bilxaasoori, haaqeenna tirose waajjishshoonkehe’ yiisi.
“Bilxaasoorino togo yee qoli: ‘Mootichaꞌya, haaqee gibbannoherira, tiroseno diinnakkira ikkito.
20 “‘Ati laitto haqqicho yaano lowo geeshsha lophite kaajjado ikkituti, guunxose gordo iillitinotinna baatto baalate leeltannoti,
21 biiffino daro, lowo laalonna baalunkura ikkitanno sagale nooseti, hundaseenni dubbu moychi heeꞌrannotinna sinnase aana iimi cea heedhannoti,
22 moote, hatti haqqicho ateeti; korkaatuno ati batiꞌranna jawaata ikkootto; gaamaarrekkino batidhe gordo iillitino; gashshootikkino baattote qacce geeshsha iillino.
23 “‘Qoleno moote, qullaawa ikkinohu mittu agaraanchi, “Haqqicho kartine hunne; cifichose kayinni siwiilunninna camotenni xaaxxine xawoho hayissote mereero rumushshunku ledo baattote giddo agurre. Gordu loji shanshona; qeechisino lamalu diri saꞌꞌa geeshsha moychu ledo ikkona” yaanni gordunni dirranna laino.
24 Moote, tirose tenneeti; Woꞌmunkura Aliidi Magani mootichiꞌyara mootete iillanno gede hirqino coy konneeti.
25 Mannuwiinni baxxite haꞌratto; dubbu moychi ledo heeꞌratto; handate gede hayisso itatto; gordu lojino shanshannohe; Woꞌmunkura Aliidi Magani mannu gashshootira Gashshaancho ikkinotanna gashshooteno baxinohura aannota afatto geeshsha lamalu diri saꞌꞌannohe.
26 “‘Ikkollana haqqichote cificho rumushshunku ledo agurre yinoonni daafira, gordoho gashshanni noohu Magano ikkinota afittohu gedensaanni, gashshootikki wirro ateha ikkanno.
27 Hakko daafira moote, amaaleꞌya macciishshi ballo. Cubbo loosa agurte, dancha coye assi; beebba assiꞌra agurte, buxane marari.* Miteekke qawaaxxidhe heeꞌratto diri lexxannoheha ikkannona.’”
28 Kuni baalu coy Moote Nabukadanatsoorira iillino.
29 Tonaalamu agani gedensaanni isi Baabiloonete noohu mootimmate mine, minu aanaanni seekkinoonni darga* kawanna kaꞌa haꞌramanni no.
30 Mooteno togo yii: “Tini mootete mine ikkitara, jawimmaꞌyaranna ayirrinyiꞌyara umiꞌya jawaantenninna wolqanni miꞌnoommota Batiꞌra Baabiloone diꞌꞌikkitino?”
31 Moote coyiꞌre nafa kaikkinni gordunni togo yitanno huuro daggu: “Moote Nabukadanatsoori, sonkoonnihe sokka tenneeti: ‘Gashshoote atewiinni hoolloonni;
32 mannu oosowiinni baxxite haꞌratto. Dubbu moychi ledo heeꞌratto; handate gede hayisso itatto; Woꞌmunkura Aliidi Magani mannu gashshootira Gashshaancho ikkinotanna gashshooteno baxinohura aannota afatto geeshsha lamalu diri saꞌꞌannohe.’”
33 Hakkawoyintenni kuni qaali Nabukadanatsoori aana woꞌmi. Isi mannu oosowiinni baxxe haꞌri; handate gedeno hayisso ita hanafi; gordu lojino bisosi shanshi; umu dananchisino lophe doowiru baalluwa gedeeha ikki; culunqasino ceannite gedeeta ikkitu.
34 “Hatti yanna gooffuta, ani Nabukadanatsoori gordu widira hige laummo; wodaniꞌyano darga higie; anino Woꞌmunkura Aliidi Magano guwisiꞌrummo; hegerera heeꞌranno Maganirano guweenyanna ayirrinye uummo; korkaatuno gashshootisi hegere gashshooteeti; mootimmasino ilamatenni ilamate geeshsha heedhanno.
35 Baattote aana heedhannore baala mulluri gede assine kiirranni; isi gordu olantoranna uullate aana heeꞌranno mannira fajjosi gede assanno. Ittisasira* woy ‘Togo mayra assitto?’ yee xaꞌmasira dandaannohu mittuno dino.
36 “Hatte yannara wodaniꞌya darga higie; gashshootiꞌya ayirrinyi, gaacheeniꞌyanna gaamaarreꞌya higgue. Qara gashshaasineꞌyanna ayirradu manniꞌya haja asse hasie; anino gashshootiꞌyawa higummo; albihunni roorino ayirrinyeno lendie.
37 “Xa ani Nabukadanatsoori, gordu Moote guwisiꞌranni, gotti gotti assanninna ayirrinye aanni noommo; korkaatuno loosisi baalu halaaleho; doogosino suwashshote; qoleno isi booꞌnaleeyye shollisha dandaanno.”
