Daanieeli 8:1-27
8 Moote Belshazaari moohihunni sayikki diro, ani Daanieeli, alba laummotano agurranna wole ajuuja laummo.
2 Tenne ajuuja laꞌꞌanni heeꞌre, aneneeto Eelaami qoqqowira Suusa mootete mine* noommoha afummo; anino hattee ajuuja laummo; noommohu Ulay way gadawi muleeti.
3 Ille kayse laeemmo woyte, kuneeti gadaweho albaanni geꞌrechu goci uurre no; isino lame buuda afiꞌrinoho. Lamunku buudi seeddaannaho; ikkollana mittu koꞌee roore seedaho; roore seedihu gedeꞌne fulinoho.
4 Hakku goci alba galchimira, aliyyeranna wodiidira hige qasanna laummo; albasiinni uurra dandiinohu mittu moychino dino; qoleno isiwiinni* gatisara dandiinohu mittuno dino. Hasiꞌrinore baala assi; isonootono gotti gotti assi.
5 Anino laꞌꞌanni heeꞌreenna, mittu meichu goci galchiminni* kae baatto kisikkinni uulla woꞌma tayse sae day. Kuni goci illuwasi qarrira mitto luphi yee leellanno buuda afiꞌrino.
6 Gocuno way gadawira albaanni uurre heeꞌreenna laummoha, lame buuda afiꞌrinoha geꞌrechu goco qasara day; lowo hanqinnino qoqqobbise mari.
7 Geꞌrechu gociwa shiqqi yaanna laummo; qoleno isira lowo geeshsha giiramino. Iso kibbe lamenka buudasi hiiqqi; geꞌrechu gocino iso gargadha didandiino. Hakko daafira geꞌrechu goco uulla kare kakkadi; isiwiinni* gatisasira dandiinohuno dino.
8 Hakkiinni meichu goci isonooto quwa sae gotti gotti assi; wolqaataamo ikkita kayinni, jawu buudisi hiiqqami; hakkiinni mittu buudi darga luphi yite leeltannori shoole buudda, shoole gordu bubbe widira* higge fultu.
9 Insa mereero mittu giddonni wolu shiimu buudi fuli; isino wodiidira, soojjaati* widiranna Biiffino Gobba* widira hige baasa lophanni haꞌri.
10 Lowo geeshsha lophe gordu olanto geeshsha iilli; olantote giddonninna beeddahete giddonni gama uulla ubbanno gede assi; hakkiinni insa kakkaxxi.
11 Olantote Roorrichira nafa booꞌni; barru barrunku Roorrichaho shiqinshanni kakkalono gattu; xinta kaajjinohu qullaawu dargisino diigame bai.
12 Loonsoonni saonni kainohunni, olanto barru barrunku shiqqanno kakkalo ledo buudaho sayinse uyni; isino halaale uullara tugi; hasiꞌrinoreno assi; qoleno qiniisi.
13 Qullaawootu giddonni mittu coyiꞌranna macciishshummo; wolu qullaawino coyiꞌranni nooha togo yii: “Barru barrunku shiqqanno kakkalorenna bao abbitanno sao daafira hattono qullaawu darginna olanto kakkadantannota kultanno ajuujara leelli coy mageeshsha keeshshanno?”
14 Isino togo yiie: “2,300 hashshinna soodimari saꞌꞌa geeshsha; qullaawu dargino biddi yee bashshosiwa higanno.”
15 Ani Daanieeli ajuuja laꞌꞌanninna huwatate woꞌnaalanni heeꞌre, hedeweelcho albaꞌyaanni mancho lawannohu uurre nooha laummo.
16 Hakkiinni Ulay mereero mitte manchu huuro macciishshummo; isino lowo huuronni, “Gebirieeli, kuni manchi lainore huwatanno gede kaaꞌlisi” yii.
17 Hakko daafira isi ani uurre noommowa shiqqi yii; ikkollana anewa dayta lowo geeshsha masoommo daafira, alba hige gombisame uwummo. Isino, “Manchi beetto, ajuuja woꞌmitannohu goofimarchu yannara ikkinota huwati” yiie.
18 Ani kayinni isi hasaawisanni heeꞌreennae, uwoommowa heeꞌrenni goxe baummo. Hakko daafira, isi amade umo uurre noommowa uurreemmo gede assie.
19 Hakkiinni togo yiie: “Kuneeti hanqu diri jeefora ikkannore kuleemmohe; korkaatuno ajuuja woꞌmitannohu hirqinoonnihu goofimarchu diriraati.
20 “Laittohu lame buuda afiꞌrinohu geꞌrechu goci Medooninna Faarsi mootoollara lawishshaho.
21 Ordaamu meichu goci Girikete mootera lawishshaho; illuwasi qarrira noohu jawu buudi qole umi mootera lawishshaho.
22 Buudu hiiqqameenna isi darga shoole buudda fultunte gede, dagasi giddonni kaꞌꞌannohu shoolu gashshooti heeꞌranno; ikkollana kurira isite geeshshi wolqa diheedhannonsa.
23 “Gashshootinsa diri jeefora, sao assitannori cubbi batiꞌre jeefo iillanno woyte,* danisi waajjishannohu, gurcheessanno coye huwatanno* moote kaꞌꞌanno.
24 Wolqasi batiꞌra ikkitanno; kayinni umisi wolqanni diꞌꞌikkino. Anfe egenninoonnikki bao* abbanno; assannori baalu qinaannosi. Wolqaataammunna qullaawootu aana bao abbanno.
25 Xagarrotenni lowo manna doganno daafira qinaannosi; wodanisinnino isonooto gotti gotti assanno; mannu deseꞌe yee noo yannara* batinyu manni aana bao abbanno. Wole agurina roorrootu Roorricha nafa hettisanno;* ikkollana mannu anga kissukkinni hiiqqamanno.
26 “Hashshunna soodimaru daafira ajuujatenni kulliri halaaleho; ati kayinni tenne ajuuja daheessi; lowo diri gedensaanni* ikkannore kultannotena.”
27 Ani Daanieeli daafure quubbi yuummo; boodu barri geeshshano xiwamummo. Hakkiinni kae mootete looso loosate higummo; laoommo coyinni kainohunni kayinni jingilli yee noommo; ajuuja huwata dandiinohu mittu manchino dino.
Lekkaalliidi Qaagiishshuwa
^ Woy “qiisho.”
^ Noo gedeenni tirriro, “isi anganni.”
^ Woy “arrishsho eꞌanno raginni.”
^ Noo gedeenni tirriro, “isi anganni.”
^ Woy “shoole raga.”
^ Woy “arrishsho fultanno raga.”
^ Woy “Seesu Gobba.”
^ Woy “ikkansa geeshsha.”
^ Woy “gano ganate fullahino.”
^ Woy “Waajjishshanno bao.”
^ “Qorophisiisikkinni” yaano ikkara dandaanno.
^ Woy “roorrootu Roorrichi aana nafa kaꞌꞌanno.”
^ Woy “konni kaꞌa.”
