Mwakutsukwalisa, mu ndzidzi ukhali ine cifupi na pyaka 13 pyakubalwa, uxamwali wanga na Yahova watoma kufewa. Ine ndikhaona ninga andzanga akuxikola akhali na ufulu kakamwe, natenepa ndikhafunambo kukhala na ufulu unoyu. Ine ndikhaona mitemo ya anyakubalanga na midida Yacikristu ninga pinthu pyakunentsa kakamwe, pontho ndikhaona kulambira Yahova ninga ntolo. Ine ndikhakhulupira kuti Yahova alipo, mbwenye nee ndikhaona kuti ndinakwanisa kukhala na uxamwali wakuwanga na iye.

Mwandimomwene ine nee ndasiya kumwaza mphangwa, mbwenye nee ndikhacita pyenepi na ntima onsene. Ine nee ndikhakhunganyika ndingafuna kuenda kamwaza mphangwa, natenepa ndikhanentseka toera kutomesa makani. Na thangwi ineyi, nee ndikhalibve na maulendo akubwereza peno mapfundziro a Bhibhlya, pontho nee ndikhakomerwabve na basa yakumwaza mphangwa. Ine ndikhabvundzika: ‘Ndinakwanisa tani kupitiriza na basa ineyi masumana onsene peno miyezi yonsene?’

Pikhali ine na pyaka 17 pyakubalwa, ndaona kuti ndi pyadidi ndikhale ndekhene. Natenepa ndapaka mapasta anga mbandienda ku Australya. Anyakubalanga atsukwala kakamwe mu ndzidzi ukhabuluka  ine panyumba. Iwo adzudzumika, mbwenye anyerezera kuti ine mbandidapitiriza kutumikira Yahova.

Ku Australya, ine nee ndikhakwanisabve kucita pizinji m’basa ya Yahova. Ine ndatoma kudjomba misonkhano. Ndatoma kucita uxamwali na atsikana akuti camasiku akhaenda kumisonkhano mbwenye buluka penepo akhaenda kamwa mbabvina m’mabhare. Ndinganyerezera pya umaso wanga ndzidzi unoyu, ndisaona kuti ndikhali mu undimomwene mu ndzidzi ubodzi ene mbandicita khundu ya dziko, mbwenye nee ndikhatsandzaya na makhundu mawiri ene.

Cifupi na pyaka piwiri ntsogolo, ine ndadziwana na mulongo wakuti andiphedza toera kunyerezera umaso wanga. Ine ndikhakhala pabodzi na alongo axanu, pontho tacemera munyang’aniri wa cisa pabodzi na nkazace wakuti akhacemerwa Tamara toera akhale na ife sumana ibodzi. Mu ndzidzi wakuti mamunace akhatsalakana pinthu pya mpingo, Tamara akhacedza pabodzi na ife mwakutsandzaya. Ine ndikhakomerwa kakamwe na pyenepi. Iye akhali munthu wakudzolowereka na wakukhonda nentsa toera kucedza naye. Pyenepi pikhali pyakudzumatirisa kakamwe kuna ine kuona munthu wakuti ali na mabasa mazinji mbagawa ndzidzi toera kucedza na ife.

Mulongo Tamara akhali wakugalamuka kakamwe. Iye akhakomerwa na undimomwene na basa yakumwaza mphangwa. Iye akhakomerwa kakamwe na kucita pizinji m’basa ya Yahova, mbwenye ine ndikhali wakutsukwala thangwi nee ndikhacita pizinji m’basa ineyi. Makhaliro ace adidi na kutsandzaya kukhali na iye pyakhuya kakamwe umaso wanga. Citsandzo cace candicitisa kunyerezera undimomwene uyu wa m’Bhibhlya: Yahova asafuna kuti ife tonsene tintumikire ‘mwakutsandzaya’ na ‘mikhuwo yakutsandzaya.’—Masal. 100:2.

Ine ndikhafuna kukhala wakutsandzaya ninga mulongo Tamara, mbwenye toera kukhala na kutsandzaya kweneku ndikhafunika kucita macinjo makulu. Ine nee ndacita macinjo anewa mu ndzidzi ubodzi ene, mbwenye mwapang’ono na pang’ono ndatomambo kukhala wakutsandzaya. Ndatoma kukhunganyika mbandidzati kuenda kamwaza mphangwa, pontho midzidzi inango ndikhatumikira ninga mpainiya wakuphedza. Pyenepi pyandiphedza toera kukhonda  gopa pakumwaza mphangwa mbandikhala na cinyindiro thangwi ya pinthu pikhapfundzisa ine. Ine ndikhaphatisira kakamwe Bhibhlya mu utumiki, pontho pyenepi pikhandicitisa kutsandzaya na basa ineyi. Mwakukhonda dembuka, ndatoma kutumikira ninga mpainiya wakuphedza miyezi yonsene.

Ine ndatoma kucita uxamwali na abale na alongo a mathunga onsene akuti akhakomerwa kakamwe na undimomwene, pontho akhatsandzaya na kutumikira Yahova. Citsandzo cawo candiphedza toera kuikha pinthu pyakufunika pa mbuto yakutoma, pontho ndatoma kuleri Bhibhlya ntsiku zonsene. Ine ndatoma kutsandzaya kakamwe na kumwaza mphangwa, pontho mukupita kwa ndzidzi ndatoma kutumikira ninga mpainiya wa ndzidzi onsene. Unoyu ukhali ulendo wakutoma kukhala pontho wakusudzuka mbanditsandzaya pabodzi na abale na alongo mu mpingo.

Mukupita kwa ndzidzi, ine ndadziwana na Alex wakuti akhali munthu wadidi, wakuti asafuna Yahova, pontho asakomerwa na utumiki. Iye akhatumikira ninga ntumiki wakutumikira, pontho ninga mpainiya wa ndzidzi onsene mu pyaka pitanthatu. Iye atumikirambo mu ndzidzi ungasi ku Malawi thangwi mu dziko ineyi mukhafunika amwazi mphangwa azinji. Kweneko iye acita uxamwali na amisionaryo akuti akhali citsandzo cadidi kuna iye, pontho amuwangisa toera apitirize kuikha Umambo wa Mulungu pa mbuto yakutoma.

Mu caka ca 2003 ine na Alex tamanga banja, pontho tapitiriza kutumikira m’basa ya ndzidzi onsene. Ife tapfundza pinthu pizinji, pontho Yahova atipasa nkhombo zizinji kakamwe.

Mu caka ca 2009, tacemerwa toera katumikira ku Timor-Leste, dziko ing’ono yakuti iri cifupi na Indoneziya. Ife tadzumatirwa, kukomerwa na kugopa mu ndzidzi ubodzi ene. Pidapita miyezi mixanu, ife tafika mu nzinda ukulu wa dziko ya Timor-Leste unacemerwa Dili.

Umaso mu dziko ineyi ukhali wakusiyana kakamwe na mu dziko idabuluka ife. Ife tikhafunika kudzolowera makhaliro mapswa, cilongero cipswa, cakudya  na pinango. Mu utumiki, kazinji ene tikhagumana anthu akutcerenga, akukhonda pfundza kakamwe na anango akuti akhapondererwa. Kusiyapo pyenepi, taona anthu azinji akuti akhali akutsukwala thangwi ya nkhondo na uviyaviya. *

Pinthu pikhagumana ife m’basa ya m’munda pikhali pyakudzumatirisa kakamwe. Mwacitsandzo, ulendo unango ndagumanikana na ntsikana wa pyaka 13 anacemerwa Maria wakuti akhali wakutsukwala kakamwe. * Mai wace akhadalowa pyaka pingasi nduli, pontho iye nee akhadziwa kukhali pai wace. Ninga ana azinji a thunga yace, Maria nee akhadziwa pikhafuna kucita iye mu umaso wace. Ine ndisakumbuka ntsiku inango pidalira iye mbandipanga pinthu pikhali muntima mwace. Mbwenye ine nee ndabvesesa pikhalonga iye thangwi nee ndikhadziwa mwadidi cilongero cace. Natenepa ndacita phembero kuna Yahova toera ndikwanise kum’balangaza, buluka penepo ndaleri Malemba toera kum’balangaza. Pidapita pyaka pingasi, ine ndaona undimomwene mbucinja makhaliro na umaso wa Maria. Iye abatizwa, pontho cincino asacitisambo mapfundziro ace a Bhibhlya. Kusiyapo pyenepi, iye ali na abale na alongo pa dziko yonsene, pontho asaona kuti asafuniwa.

Yahova akupasa nkhombo basa yakumwaza mphangwa ku Timor-Leste. Maseze amwazi mphangwa azinji abatizwa pyaka khumi nduli, azinji asatumikira ninga apainiya, atumiki akutumikira na akulu a mpingo. Anango asaphata basa maofesi akuthumburuzira mabukhu a pilongero pya dziko ineyi. Ine ndatsandzaya kakamwe pikhaaona ine mbaimba pa misonkhano mwakutsandzaya, pontho pikhaaona ine mbathambaruka mwauzimu.

Umaso wathu wa ku Timor-Leste ukhali wakusiyana kakamwe na wa ku Australya, mbwenye ukhali wakutsandzayisa kakamwe. Midzidzi inango, ife tikhakwira xapa yakuti ikhadzala na anthu, pontho mwenemu mukhali na ntsomba zakuuma na masamba pidagula anthu kunsika. Ntsiku zinango, ife tikhacitisa pfundziro ya Bhibhlya n’nyumba ing’ono yakuti ikhapisa kakamwe, pantsi pace nee pakhali simenti, pontho nkhuku zikhathamanga-thamanga n’khundu mwathu. Mbwenye mwakukhonda tsalakana pinentso pyenepi, kazinji kene ine ndikhadzumatirwa kakamwe.

Ndinganyerezera umaso wanga nduli ndisapereka takhuta kakamwe kuna anyakubalanga thangwi yakundipfundzisa midida ya Yahova na kundiphedza ngakhale mu ndzidzi ukhali ine wakufewa mwauzimu. Pinthu pidacita anyakubalanga pisabverana na pinalonga Misangani 22:6. Baba na Mama asakomerwa kakamwe na ine pabodzi na Alex thangwi tisaphatisira umaso wathu toera kutumikira Yahova. Kutomera mu caka ca 2016 mamunanga asatumikira ninga muyang’aniri wa cisa cinayang’anirwa na Bheteli ya ku Australasia

Ndi pyakunentsa kutawira kuti pyaka pingasi nduli nee ndikhakomerwa na basa yakumwaza mphangwa. Cincino ndisakomerwa kakamwe na basa ineyi. Ine ndadzindikira kuti mwakukhonda tsalakana pinentso pinathimbana na ife mu umaso, kutsandzaya kwandimomwene kusagumanika tingatumikira Mulungu na ntima onsene. Pyaka 18 pidatumikira ine Yahova pabodzi na Alex pyakhala pyakutsandzayisa kakamwe kuna ine. Cincino ndisabvesesa undimomwene udalonga Dhavidhi kuna Yahova kuti: ‘Onsene anathawira kuna imwe anadzakhala akutsandzaya; iwo anadzakhuwa mwakukomerwa. . . . Pontho ale anafuna dzina yanu anadzatsandzaya thangwi ya imwe.’—Masal. 5:11.