Kaykama Bibliapi yachakorqanchej, Diospa sutenqa Jehová kasqanta, may munakuyniyoj kasqantawan. Chantá yachakullarqanchejtaj imastachus ruwasqanta, imastachus tumpamantawan ruwananta ima. Jinapis Diosmanta wakillanta yachakunchej. ¿Yanapasunkimanchu Diosta astawan rejsiy?

Jehová Diosta “maskʼanki chayqa, pay tarichikusonqa” (1 Crónicas 28:9). Diosta astawan rejsispa, payman qayllaykunki (Salmo 25:14, Qheshwa Biblia). Paypa qayllanpi kaspataj, ashkha bendicionesta japʼinki.

Kusisqa kausakunki. Bibliaqa Jehová “kusikuyniyoj” Dios kasqanta nin (1 Timoteo 1:11). Payman qayllaykunaykipaj, pay jina kanaykipaj ima kallpachakunki chayqa, may kusisqa kanki. Chantapis mana anchata phutikunkichu, nitaj chhikata onqonkichu (Salmo 33:12). Mana chayllachu, millay kausaymanta librakunki, sumaj runa kanki, wajkunawanpis allinta kausakunki. Cheqamanta qanpis ninki: “Noqarí Diosman qayllakusaj. Noqapajqa chaymin aswan sumajqa”, nispa (Salmo 73:28).

Jehová Dios qanwanpuni kanqa. Payqa kamachisninman nin: “Yuyaychasqaykitaj mayqen ñantachus rinaykita”, nispa (Salmo 32:8). Jehová Diosqa sapa kamachinta sumajta rejsin, necesitasqantataj qon (Salmo 139:1, 2). Payman qayllaykunki chayqa, Diosqa ni jaykʼaj saqerparisonqachu.

Sumaj kausayta japʼinki. Jehová Diosqa mana kay tiempollapichu kusisqa kausakunaykipaj yanapasuyta munan. Payqa aswan qhepamanpis sumaj kausayta qoyta munasunki (Isaías 48:17, 18). Biblia nin: “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3). Diosninchej imastachus qonawanchejta niwasqanchejqa, “barco sayachina gancho jina”. Chaytaj kay llakiy tiempopi, “mana iskayrayaspa sinchʼita sayanapaj” yanapawasun (Hebreos 6:19).

Diosta rejsispa, payman qayllaykuspa ima, ashkha bendicionesta japʼiyta atinchej. Kaypi wakillanmanta parlarerqanchej. Astawan yachakuyta munanki chayqa, Jehovaj testigosninwan parlariy chayri Internetpi jw.org/qu nisqaman yaykuy.