Jesuspa yachachisqanta uyarispa, wakin runasqa kasukorqanku, wakintajrí mana. Ajinamanta rikucherqanku imachus sonqonkupi kasqanta. Uj kuti, Galileamanta Simón sutiyoj fariseo, Jesusta wasinman invitarqa mikhunankupaj. Payqa Jesús milagrosta ruwasqanta yacharqa. Chayrayku payta astawan rejsiyta munarqa. Jesustaj Simonpa wasinman rerqa, ichapis Diosmanta chaypi kajkunaman willarinanpaj. Jesusqa uj kutipiña impuesteroswan, juchasapaswan ima mikhoj rerqa.

Jesús tiyakorqa chay lugarestaqa, Palestina sutiwan kunan rejsinchej. Jesuspa tiemponmanta runasqa, jukʼutasniyoj purisqankurayku chakisninkuta chʼichichakoj kanku. Chayrayku wasinkuman wajyarikojkunaqa, invitasqanku runaspa chakisninkuta qhasa yakituwan mayllaj kanku. Chantapis muchʼaykoj kanku, umantataj aceitewan jawiykoj kanku. Jinapis Simonpa wasinpeqa mana ajinatachu Jesusta atienderqanku. Chayqa may llakiy karqa.

Simonpa wasinpi mikhuna hora chayamojtin, tukuyninku mikhunankupaj tiyaykukorqanku. Mikhushajtinkutaj uj warmi chʼinsitullamanta chay wasiman yaykorqa. Chay warmeqa chay llajtapi “juchasapa warmi” jina rejsisqa karqa (Lucas 7:37). Tukuypis juchasapas kanchej, chayraykutaj pantanchej. Jinapis chay warmeqa ichá millay kausayniyoj karqa, ichapis khuchi warmi karqa. Payqa ichapis uyarerqa Jesuspa yachachiykunasninmanta, Jesús tukuy llasa qʼepiyojkunata samariyta tarinankupaj wajyarisqanmanta ima (Mateo 11:28, 29). Ichá chayrayku Jesusta maskʼaj rerqa.

Chay warmeqa wasa ladonmanta Jesusman qayllaykorqa. Jesuspa chakisnin chaypitaj qonqoriykukuspa waqarqa. Chantá waqayninwan Jesuspa chakisninta joqʼochaspa, chujchasninwan chʼakicherqa. Chantapis chakisninta muchʼaraspa perfumasqa aceitewan jawiykorqa. Simontaj chayta mana allinpajchu qhawarqa. Chayrayku sonqonpi nerqa: “Kay runachus profeta kanman chayqa, yachanmanchá imayna juchasapa warmichus payta llankhaykushasqanta”, nispa (Lucas 7:39).

Jesustaj Simonpa yuyasqanta yachaspa nerqa: “Simón, ujta nisqayki”, nispa. Simontaj nerqa: “Yachachejníy, nillaway”, nispa. Chantá Jesús nerqa: “Uj runaman iskay runas manu kasqanku. Ujnenqa 500 denario qolqe manu kasqa, ujnintaj 50. Paykuna ni imaynamanta kutichipuyta atejtinkutaj, qolqeta manoj runaqa iskayninkuta tukuy sonqo perdonasqa. Chay iskay runasmanta, ¿mayqentaj astawan munakonqa chay runata?”, nispa. Simontaj ichá mala ganalla kuticherqa: “Pichus aswan ashkha manuyoj karqa, chay runachá”, nispa (Lucas 7:40-43).

Jesustaj allinta kutichisqanta nerqa. Chantá chay warmita qhawarispa, Simonta nerqa: “¿Rikushankichu kay warmita? Wasiykiman yaykumorqani, manataj yakullatapis jaywawarqankichu chakisniyta mayllakunaypaj. Kay warmitajrí waqayninwan chakisniyta joqʼochawan, chujchasninwantaj chʼakichiwan. Qanqa mana muchʼawarqankichu, kay warmitajrí yaykumusqaymantapacha chakisniyta muchʼaspa mana saykʼunchu. Ni umaytapis aceitewan jawiwarqankichu, kay warmitajrí chakisniyta perfumasqa aceitewan jawiwan”, nispa. Jesusqa chay warmi sonqomantapacha pesachikusqanta rikorqa. Chayrayku Simonman nerqa: “Paypa juchasnenqa may chhika kajtinpis perdonasqa  kanku, mayta munakuwasqanrayku. Pisita perdonasqa kajrí, pisillatataj munakun”, nispa (Lucas 7:44-47).

Jesusqa mana nisharqachu, juchapi puriy allillan kasqanta. Jinapis millay kausayninkumanta pesachikojkunata khuyakorqa, payman risqankurayku. Chayrayku Jesusqa chay warmita nerqa: “Juchasniyki perdonasqaña kanku [...]. Creesqayki salvasunki, ama llakikuspa ripuy”, nispa (Lucas 7:48, 50). Chay warmeqa chayta uyarispa maytachá sonqochakorqa.