“NA UN okashon Hesus a bisa su oyentenan: “Lo bai saka e gobernante di e mundu akí afó.” Mas despues el a bisa ku ‘e gobernante di mundu no tin poder riba dje’ i ku “e gobernante di e mundu akí a ser husgá.” (Huan 12:31; 14:30; 16:11) Di ken Hesus tabata papia?

En bista di loke Hesus a bisa tokante “e gobernante di e mundu akí,” ta opvio ku e no por tabata papia di su Tata, Yehova Dios. Ken anto ta “e gobernante di e mundu akí”? Kon lo e ser ‘saká afó,’ i den ki sentido el a ser “husgá”?

“E Gobernante di e Mundu Akí” Mes Ta Revelá Ken E Ta

Meskos ku un kriminal eksperto gusta broma ku su poder, Diabel tambe a hasi esei ora ku el a tenta Hesus, e Yu di Dios. Despues di a mustra Hesus “tur e reinonan” di mundu, Satanas a hasié e siguiente oferta: “Lo mi duna bo outoridat riba tur e reinonan akí i nan gloria, pasobra esei a keda entregá na mi, i mi ta dun’é na ken ku mi ke. P’esei, si bo adorá mi, tur esei lo ta di bo.”—Lukas 4:5-7.

Awor si Diabel tabata djis un konsepto di maldat, manera algun hende ta pensa, kon nos mester komprondé e tentashon ei? Akaso Hesus a ser tentá pa algun deseo òf konflikto interno ku kisas el a haña despues di su boutismo? Si esei tabata e kaso, dikon Beibel ta bisa ku “den dje no tin piká”? (1 Huan 3:5) Hesus no a nenga ku Diabel tabatin poder riba humanidat. Mas bien, el a konfirmá esei ora el a referí na Satanas komo “e gobernante di mundu.” Hesus a bisa tambe ku Satanas ta “un matadó” i “un gañadó.”—Huan 14:30; 8:44.

Mas ku 60 aña despues ku Diabel a tenta Kristu, apòstel Huan a kòrda e kristiannan kuantu influensia Diabel tin. El a bisa nan: “Henter mundu ta den poder di e Malbado.” Huan a bisa tambe ku e malbado ei “ta gaña henter e tera habitá.” (1 Huan 5:19; Revelashon 12:9) Ta klaru anto ku ora Beibel ta papia di “e gobernante di e mundu akí,” e ta referí na un persona invisibel, esta, un spiritu. Pero kuantu influensia e tin riba mundu?

E Gobernante di Mundu Ta Delegá Poder na Su Kompinchinan

Ora apòstel Pablo a skirbi tokante e lucha ku kristiannan tin pa keda firme den fe, el a mustra bon kla ken ta nan pió enemigunan. El a bisa: “Nos lucha no ta kontra karni i sanger, sino kontra gobièrnu, kontra outoridat, kontra gobernante di mundu di e skuridat akí, kontra forsanan spiritual di maldat den lugánan selestial.” (Efesionan 6:12) Pues, e lucha ku nos tin “no ta kontra karni i sanger” ma kontra “forsanan spiritual di maldat.”

Segun mayoria di tradukshon di Beibel, e “forsanan spiritual di maldat” ku e teksto akí ta papia di dje no ta referí na djis un konsepto di maldat sino na personanan malbado poderoso i invisibel. Algun vershon di Beibel ta papia di “spiritunan malu ku ta biba den e regionnan selestial” (Beibel na papiamentu koriente) òf di “spiritu málunan di laria” (E Testament Nobo). Pues, Diabel ta ehersé su poder pa medio di otro angelnan rebelde, kendenan a bandoná “nan propio lugá di biba” den shelu.—Hudas 6.

E buki profétiko di Daniel ta splika kon, for di antigwedat, ‘e gobernantenan’ akí ta ehersiendo nan outoridat. Daniel tabata masha  preokupá pa e hudiunan ku a sali for di eksilio na Babilonia i ku a bolbe Herúsalèm na aña 537 promé ku nos era. P’esei pa tres siman largu, el a hasi orashon pa nan. I Dios a manda un angel pa trankilisá Daniel, pero e angel a tarda. E angel a splika Daniel dikon el a tarda, bisando: “E prens di e reino di Persia tabata stroba mi bintiun dia largu.”—Daniel 10:2, 13.

Ken e ‘prens di Persia’ akí tabata? Opviamente e angel no tabata referí na Rei Siro di Persia, kende tabata na banda di Daniel i su pueblo. Ademas, kon un simpel rei humano lo por a stroba un angel pa tres siman largu, miéntras ku Beibel ta bisa ku ún angel so a yega di mata 185.000 guerero balente den ún solo anochi? (Isaías 37:36) E ‘prens di Persia’ hostil akí mester tabata un representante di Diabel, esta, un demoño kende Diabel a duna outoridat riba e Imperio di Persia. Segun e relato, e angel di Dios a bisa ku lo e mester a bolbe bringa ku “e prens di Persia” i tambe ku “e prens di Gresia,” esta un otro demoño.—Daniel 10:20.

Kiko nos por konkluí for di esaki? Ku poko palabra, ta eksistí ‘gobernantenan’ invisibel, esta, demoñonan kendenan ta goberná e mundu akí huntu ku nan lider Satanas, e Diabel. Pero ki meta nan tabatin semper?

E Gobernante di Mundu Ta Demostrá Ken E Ta di Bèrdat

Den e último buki di Beibel, esta Revelashon, apòstel Huan ta relatá kon Hesus, komo Miguel e arkangel, ta derotá Diabel i su demoñonan. Ademas, Huan a bisa ku e spiritunan malbado ei lo a ser ekspulsá for di shelu i ku esaki lo tabatin konsekuensianan teribel pa humanidat. Nos ta lesa: “Ai di tera . . . ya ku Diabel a baha bini serka boso yen di rabia, pasobra e sa ku a ked’é masha poko tempu.”—Revelashon 12:9, 12.

Kon Diabel ta demostrá ku e ta yen di rabia? Wèl, meskos ku hopi kriminal tin e lema di ‘reina òf ruiná,’ Diabel i su demoñonan tambe ta desididu pa hundi tera i su habitantenan huntu ku nan. Debí ku Diabel sa ku su tempu ta kòrtiku, e ta usa un elemento klave di sosiedat ku e tin bou di su kontròl—e sistema komersial—pa promové e mentalidat di kumpra kos pa loko. Esaki na su turno ta hiba na agotashon di rekursonan natural i na destrukshon di mundu su medio ambiente. Asina Satanas ta pone e eksistensia di e rasa humano na peliger.—Revelashon 11:18; 18:11-17.

For di kuminsamentu di historia humano, Diabel a reflehá su set pa poder pa medio di entre otro polítika i religion. E buki di Revelashon ta deskribí podernan polítiko komo bestianan salbahe ku Diabel a duna “gran outoridat.” Ademas, e buki ta mustra ku e relashon ku tin entre polítika i religion ta algu bergonsoso i repugnante; e ta yama esaki adulterio spiritual. (Revelashon 13:2; 17:1, 2) Pensa un ratu riba e opreshon, guera, sklabitut i konfliktonan étniko ku atraves di siglonan a eksigí miónes di bida. Tin un hende ku por bisa onestamente ku e susesonan spantoso i teribel ku a mancha historia humano ta aktonan normal di hende? Òf nan tabata resultado di e influensia di spiritunan malbado?

Beibel klaramente ta identifiká i desenmaskará esun ku ta manipulá lidernan humano i gobernantenan di potensianan mundial. Konsientemente òf nò, sosiedat humano ta reflehá e personalidat di su gobernante i ta apoyá su lema: ‘reina òf ruiná.’ Pero pa kuantu tempu humanidat lo sufri bou di e gobernashon di Diabel?

Diabel Ta Halando Su Último Rosea

E obranan ku Kristu a efektuá aki na tera durante e promé siglo a indiká ku Diabel i su demoñonan pronto lo ser destruí. Ora ku e disipelnan di Hesus a kont’é ku nan a saka demoño, Hesus a bisa nan: “Mi a mira  kaba kon Satanas a kai for di shelu manera werlek.” (Lukas 10:18) Ku e palabranan ei, Hesus a ekspresá e alegria ku lo e tabatin den futuro ora e vense e gobernante di mundu; esei lo a sosodé ora ku e tabata bèk den shelu komo Miguel e arkangel. (Revelashon 12:7-9) Un estudio profundo di profesianan bíbliko ta indiká ku Hesus a logra e viktoria ei na aña 1914 òf un poko despues ora el a saka Satanas i su demoñonan for di shelu. *

Desde e tempu ei, Diabel sa ku a ked’é masha poko tempu promé ku e ser destruí. I maske ‘henter mundu ta den su poder,’ tin miónes di hende awe ku e no por a gaña den su intentonan desesperá pa dominá nan. Beibel a laga nan sa ken Satanas ta realmente i kiko ta su trikinan. (2 Korintionan 2:11) I e palabranan ku Pablo a dirigí na su kompañeronan di fe ta duna nan speransa. Pablo a bisa: ‘E Dios ku ta duna pas pronto lo aplastá Satanas bou di boso pia.’ *—Romanonan 16:20.

Pronto Diabel lo hala su último rosea! Bou di e gobernashon di Kristu ku ta basá riba amor, hende hustu lo kombertí e banki simbóliko pa Dios su pia, esta tera, den un paradeis. Violensia, odio i golosidat lo disparsé pa semper. Beibel ta bisa ku “e kosnan di ántes lo no wòrdu rekordá mas.” (Isaías 65:17) Esei lo ta un gran alivio pa tur hende ku a libra nan mes for di e gara i dominio di e gobernante di mundu.

[Nota]

[Komentario di e plachi na página 9]

Bou di e gobernashon di Kristu ku ta basá riba amor, hende hustu lo kombertí tera den un paradeis