1, 2. Ki guera real ta na kaminda, i kiko e sirbidónan di Dios lo no tin nodi di hasi durante e guera akí?

DIA 30 di òktober 1938, miónes di hende na Merka tabata skuchando un programa masha gustá na radio ku tabata presentá obranan teatral. E presentashon di e anochi ei tabata un adaptashon di un kuenta di siensia fikshon titulá Guera di e Mundunan (The War of the Worlds). Aktornan a hunga ròl di reportero i tabata duna informe di un invashon di un ehérsito di ekstraterestre ku a bini for di planeta Mars i ku tabata kousando destrukshon rònt mundu. Aunke nan a anunsiá di antemano ku e programa radial tabata un obra teatral, hopi oyente a kere ku e atake tabata real i a spanta. Tin di nan asta a tuma sierto medida pa protehá nan mes kontra di e ekstraterestrenan imaginario akí.

² Awe tin un guera di bèrdat na kaminda. Pero mayoria di hende no ta hasi nada pa prepará p’e. Ta trata di e guera di Armagedon, esta, e guera di Dios kontra e mundu malbado akí. Esaki no ta un guera di siensia fikshon, ya ku ta Beibel, Dios su Palabra inspirá, ta profetisá ku lo e tuma lugá. (Rev. 16:14-16) Durante e guera akí, e sirbidónan di Dios riba tera lo no tin ku bringa. Pero sin duda nan lo keda babuká pa motibu di e susesonan asombroso ku lo tuma lugá i di e manera impreshonante ku Dios lo usa su poder pa salba nan.

3. Ki profesia nos lo analisá, i dikon e ta importante pa nos?

³ Un profesia ku nos por lesa na Zakarías kapítulo 14 ta revelá hopi kos tokante e guera di Armagedon. Apesar ku e profesia akí a ser skirbí un 2.500 aña pasá, e ta masha importante pa nos awe. (Rom. 15:4) Gran parti di loke e ta bisa tin di hasi ku kosnan  ku a pasa ku e pueblo di Dios desde ku e Reino Mesiániko a keda establesé den shelu na aña 1914 i tambe ku susesonan emoshonante ku lo desaroyá den futuro serkano. Entre e kosnan mas notabel ku e profesia ta menshoná ta e formashon di “un vaye masha masha grandi” i “awanan bibu” ku lo kuminsá kore. (Zak. 14:4, 8) Den e artíkulo akí, nos lo siña kiko e vaye akí ta i kon e ta perkurá protekshon pa e sirbidónan di Yehova. Nos lo siña tambe kiko e awanan bibu ta i kon nos por benefisiá di nan. No solamente nos lo mira e importansia e ora ei di bebe di e awa akí, pero nos lo ke hasié tambe. Pues, laga nos presta atenshon na e profesia akí.—2 Ped. 1:19, 20.

4. (a) Na ki tempu e ‘dia pa Yehova’ a kuminsá? (b) Kiko e sirbidónan di Yehova tabata anunsiá dékadanan promé ku 1914, i kon e lidernan polítiko i e lidernan religioso a reakshoná?

⁴ E profesia di Zakarías kapítulo 14 ta kuminsá bisando: ‘Ta bini un dia pa Yehova.’ (Lesa Zakarías 14:1, 2.) Kiko e dia akí ta? E ta “e dia di Señor,” ku a kuminsá na aña 1914 ora ku Hesus a bira Rei di e Reino Mesiániko di Dios den shelu. (Rev. 1:10; 11:15) Dékadanan promé ku 1914, e sirbidónan di Yehova a anunsiá na e nashonnan ku fin di “e tempu stipulá di e nashonnan” lo a bini na e aña ei i ku un periodo di problema lo a kuminsá pa mundu manera nunka promé. (Luk. 21:24) Kon e nashonnan a reakshoná? En bes di presta atenshon na e spièrtamentu oportuno ei, lidernan polítiko i lidernan religioso a despresiá i persiguí e predikadónan ungí zeloso ei. Den un sentido, e lidernan ei a hasi bofon di Dios Todopoderoso, ya ku e ungínan ta embahadornan di Reino; nan ta representá “Herúsalèm selestial,” esta, e Reino Mesiániko.—Heb. 12:22, 28.

5, 6. (a) Manera Beibel a profetisá, kiko e nashonnan a hasi kontra “e stat” i su ‘siudadanonan’? (b) Ken tabata “e restu di e pueblo”?

⁵ Zakarías a profetisá kiko e nashonnan lo hasi: “E stat [Herúsalèm] lo wòrdu kapturá.” “E stat” ta simbolisá e Reino Mesiániko di Dios. E kristiannan ungí ku ainda ta riba tera ta represent’é komo su ‘siudadanonan.’ (Flp. 3:20) E stat a ser “kapturá” durante Promé Guera Mundial ora ku miembronan prominente di e organisashon di Yehova riba tera a ser arestá i enkarselá na Atlanta, Georgia, Merka. Enemigunan a trata e restu di kristiannan ungí inhustamente i ku krueldat. Nan a prohibí nan literatura i a purba di para nan aktividat di prediká e Reino. Tabata komo si fuera e enemigunan a ‘plùnder’ e kasnan di e stat.

⁶ E pueblo di Dios tabata un grupo relativamente chikí, i aunke nan enemigunan a gaña riba nan, oponé nan i persiguí nan, tòg nan no por a kaba ku adorashon berdadero. Tabatin kristiannan ungí ku a keda fiel. Segun e profesia di Zakarías, nan tabata “e restu di e pueblo” ku a nenga di “wòrdu kòrtá kitá for di e stat.”

7. Ki ehèmpel Testigunan di Yehova ungí a pone pa tur adoradó berdadero awe?

⁷ Akaso e profesia akí a kumpli kompletamente ora Promé Guera Mundial a terminá? Nò. E nashonnan lo a lansa mas atake kontra e restu ungí i nan kompañeronan leal ku tin e speransa di biba pa semper riba tera. (Rev. 12:17) Un prueba di esei ta e persekushon severo ku a tuma lugá durante Segundo Guera Mundial. E ehèmpel di fieldat di e Testigunan ungí ta animá nos awe pa wanta kualke prueba ku nos haña nos kuné, entre  otro, oposishon di famia ku no ta kreyente, di koleganan di trabou òf di kompañeronan di skol ku ta hasi bofon di nos fe. (1 Ped. 1:6, 7) No ta importá unda e adoradónan berdadero ta biba; nan ta mas determiná ku nunka pa “para firme den ún spiritu,” ‘sin laga esnan ku ta oponé nan hinka miedu den nan.’ (Flp. 1:27, 28) Pero unda e pueblo di Yehova por ta safe den un mundu ku ta odia nan?—Huan 15:17-19.

8. (a) Kiko seru sa simbolisá den Beibel? (b) Kiko e “Seru di Oleifi” ta representá?

⁸ Ya ku Herúsalèm—“e stat”—ta simbóliko den e profesia (representando Herúsalèm selestial), e “Seru di Oleifi, ku ta keda dilanti di Herúsalèm,” tambe mester ta simbóliko. Kiko e seru ei ta representá? Kon lo e “splet den dos” i bira dos seru? Dikon Yehova ta yama nan “mi serunan”? (Lesa Zakarías 14:3-5.) Den Beibel, seru tin biaha ta representá reino òf gobièrnu. Beibel sa bisa tambe ku bendishon i protekshon ta bini di e seru di Dios. (Sal. 72:3; Isa. 25:6, 7) Pues, e Seru di Oleifi riba kua Dios ta pará ta representá Yehova su soberania universal, es desir, su gobernashon riba tur su kreashon.

9. Den ki sentido e “Seru di Oleifi” ta splet den dos?

⁹ E profesia ta bisa ku e Seru di Oleifi “lo splet den dos.” Kiko esaki ta nifiká? E ta nifiká ku Yehova ta establesé un di dos gobernashon pa un propósito spesial. E gobernashon sekundario akí ta e Reino Mesiániko den man di Hesukristu. Komo ku tur e dos gobernashonnan akí ta di Yehova, e ta yama e dos serunan akí, ku a resultá for di e spletmentu di e “Seru di Oleifi,” “mi serunan.”—Zak. 14:4, 5.

10. Kiko e “vaye masha masha grandi” entre e dos serunan ta representá?

¹⁰ Ora e seru simbóliko splet den dos—mitar den direkshon nort i mitar den direkshon zùit—Yehova su pianan ta keda para riba ámbos seru. E splet akí ta forma, òf krea, “un vaye masha masha grandi” bou di Yehova su pia. Kiko e vaye simbóliko akí ta? E ta representá Dios su protekshon. Meskos ku un vaye literal entre dos seru ta duna hende protekshon, asina e sirbidónan di Yehova ta safe bou di su soberania universal i bou di e Reino Mesiániko di su Yu. Yehova lo sòru pa adorashon puru no ser eliminá nunka. Na ki tempu e Seru di Oleifi akí a splet? Esei a sosodé na 1914 ora ku e Reino Mesiániko a keda establesé den shelu na fin di e tempu stipulá di e nashonnan. I na ki tempu e pueblo di Yehova a kuminsá hui bai na e vaye simbóliko akí?

11, 12. (a) Na ki tempu e pueblo di Dios a kuminsá hui bai na e vaye simbóliko? (b) Kiko ta duna prueba ku Yehova su brasa poderoso ta protehando su pueblo?

¹¹ Hesus a spièrta su siguidónan: “Tur nashon lo odia boso pa motibu di mi nòmber.” (Mat. 24:9) Desde 1914, ora ku e último dianan a kuminsá, e odio ei a bira mas grandi. Apesar ku enemigu a persiguí e restu di kristiannan ungí kruelmente durante Promé Guera Mundial, nan no por a kaba ku e grupo fiel akí. Na aña 1919, e pueblo di Dios a ser librá for di e gara di Babilonia e Grandi, e imperio mundial di religion falsu. (Rev. 11:11, 12) * Esei ta e tempu ku nan a kuminsá hui bai na e vaye di e serunan di Yehova.

 ¹² For di 1919, Yehova a sigui protehá su adoradónan berdadero na tur parti di mundu. Atraves di dékadanan, hopi gobièrnu a purba di stòp Testigunan di Yehova di prediká òf a prohibí nan literatura bíbliko. Te awe esei ta tuma lugá den algun pais. Pero ni maske kuantu e nashonnan purba, nunka nan lo por kaba ku adorashon berdadero! Yehova su brasa poderoso lo sigui protehá su pueblo.—Deu. 11:2.

13. Kiko nos mester hasi pa keda den Yehova su vaye di protekshon, i dikon awor ta mas importante ku nunka pa keda den e vaye ei?

¹³ Si nos pega na Yehova i para firme den e bèrdat, nos lo keda den su vaye di protekshon. Yehova i su Yu Hesukristu, na nan turno, lo hasi nan parti; Dios lo no permití nada ni ningun persona ‘ranka nos for di Su man.’ (Huan 10:28, 29) Yehova ta kla pa duna nos tur e yudansa ku nos tin mester pa nos por obedes’é komo Soberano di universo i keda súpditonan leal di e Reino Mesiániko. Awor ta mas importante ku nunka pa nos keda den Yehova su vaye di protekshon, ya ku e tribulashon grandi ta aserkando rápidamente i nos lo bai tin gran mester di Dios su yudansa.

14, 15. Riba e dia ku Yehova lo bringa kontra di su enemigunan, kiko lo ta e situashon di esnan pafó di e vaye?

¹⁴ Segun ku fin di e mundu malbado akí ta yega mas serka, Satanas su atake kontra e sirbidónan di Yehova lo bira mas fuerte. Pero pronto Satanas lo lansa su último atake. E ora ei, Yehova lo sali pa “bringa” kontra di e enemigunan di su pueblo. Riba e “dia di bataya” ei, e Soberano di universo lo demostrá mas kla ku nunka promé ki Guerero glorioso e ta.—Zak. 14:3.

¹⁵ Kiko lo ta e situashon di esnan ku no tin e protekshon di Yehova, esta, esnan pafó di e vaye, riba e dia ku Yehova sali pa bringa? Segun e profesia, nan “lo no tin lus,” es desir, nan lo no tin e aprobashon di Dios. Riba e binidero dia di bataya ei, “kabai, mula, kamel, buriku, i tur e bestianan di kria”—símbolonan di e ekipo militar di e nashonnan—lo ser afektá pa plaga. Esaki ta nifiká ku tur arma i ekipo ku nan ta usa den guera lo no sirbi mas. Zakarías a bisa tambe ku Yehova lo usa un “plaga,” òf malesa, pa kastigá su enemigunan. Riba e dia ei, ‘nan wowo i nan lenga lo putri.’ Nos no sa si esaki lo ta un plaga literal, pero en todo kaso lo e silensiá nan menasanan spantoso. E enemigunan ei lo no por hasi nos daño ni nan lo no por papia kontra Dios. (Zak. 14:6, 7, 12, 15) Tur “e reinan di tera i nan ehérsitonan” lo tuma parti pa Satanas, pero ningun lo skapa destrukshon. (Rev. 19:19-21) “Esnan ku SEÑOR mata riba e dia ei lo keda bentá tur kaminda, for di esun ekstremo di mundu te na e otro.”—Yer. 25:32, 33.

16. Mirando ku Yehova su dia di bataya ta aserkando, kiko nos mester puntra nos mes for di awor, i kiko nos lo tin ku hasi?

¹⁶ Ora tin guera, tur hende ta sufri, asta esnan ku finalmente sali ganá. Por tin skarsedat di kuminda. Propiedatnan por bai pèrdí. Nivel di bida por baha drástikamente. Hende por pèrdè sierto libertat ku nan tabatin. Si nos haña nos ku e difikultatnan akí, kon nos lo reakshoná? Nos lo drenta pániko? Nos lo stòp di sirbi Yehova? Nos lo pèrdè tur speransa i bira desanimá? Durante e tribulashon grandi, lo ta masha importante pa nos mantené nos fe den Yehova su poder di salba nos i keda den su vaye di protekshon!—Lesa Habakuk 3:17, 18.

17, 18. (a) Kiko e “awanan bibu” ta? (b) Kiko e “laman di pariba” i e “laman di pabou” ta representá? (c) Segun ku bo ta wak dilanti na futuro, kiko ta bo determinashon?

¹⁷ Despues di Armagedon, “awanan bibu lo kore” nònstòp for di e Reino di Kristu. E “awanan bibu” akí ta representá tur loke Yehova a perkurá pa hende por biba pa semper. Den e profesia di Zakarías, e “laman di pariba” ta referí na Laman Morto, i e “laman di pabou” na Laman Mediteráneo. Tur dos ta referí na hende. E Laman Morto ta representá esnan ku ta drumí den graf. Laman Mediteráneo ta yen di bida, pues e ta un bon representashon di e “multitut grandi” ku lo sobrebibí Armagedon. (Lesa Zakarías 14:8, 9; Rev. 7:9-15) Ámbos grupo ta sasia nan set ku e awanan bibu simbóliko, e “riu di awa di bida.” Ku ki benefisio? Nan lo ser librá for di e kondena di morto ku nan a heredá for di Adam, i nan lo bira perfekto i biba pa semper.—Rev. 22:1, 2.

¹⁸ Bou di e protekshon di Yehova, nos lo sobrebibí e fin di e mundu malbado akí i drenta den su hustu mundu nobo. Apesar ku tur nashon di e mundu akí ta odia nos, nos ta firmemente determiná pa keda leal na e Reino di Dios i keda den Yehova su vaye di protekshon.