Di Dos Karta di Pedro 1:1-21
1 Esaki ta un karta di ami, Simon Pedro, un esklabo i apòstel di Hesukristu. E karta akí ta dirigí na tur hende ku a bira kreyente i ku tin un fe mes presioso ku nos fe, danki na nos Dios i nos Salbador Hesukristu. Tantu Dios komo Kristu ta hustu.
2 Mi ta resa pidi Dios pa e mustra mas i mas bondat inmeresí na boso i pa e sigui yuda boso pa boso tin pas na abundansia pasobra boso a siña konosé Dios i nos Señor Hesus bon.+
3 Mi ta pidi Dios e kosnan ei pasobra Dios ta usa su poder pa duna nos* tur loke nos tin mester pa nos hiba un bida deboto na dje. Sí, Dios ta yuda nos siña konos’é bon pa nos por hiba un bida deboto na dje. Dios a skohe* nos+ pasobra e ta un Dios grandi i bondadoso.
4 El a primintí ku lo e bendishoná nos rikamente.+ Boso lo por bira spiritu, meskos ku Dios.+ Manera Dios a primintí boso, boso lo por risibí tur e bendishonnan ei, pasobra boso a hui bai laga e mundu malbado i degenerá akí, ku ta eksistí debí na deseo robes.
5 P’esei, awor ku boso tin fe, hasi tur boso esfuerso+ pa boso tin un bon kondukta,*+ konosementu,+
6 dominio propio,+ forsa pa perseverá i rèspèt profundo pa Dios.*+
7 Ademas, trata boso rumannan ku kariño i stima tur hende.+
8 Si boso ta hasi boso esfuerso pa desplegá e kualidatnan ei mas i mas, boso lo no sinta pòrnada i keda sin duna fruta.*+ Boso lo no keda sin aktua na armonia ku e konosementu eksakto ku boso ta atkerí tokante nos Señor Hesukristu.
9 Hende ku no ta desplegá e kualidatnan ei ta hende siegu pasobra nan ta sera nan wowonan pa nan no mira lus.*+ Nan ta lubidá ku nan a ser purifiká di e pikánan ku nan a kometé+ den pasado.
10 P’esei, rumannan, hasi tur boso esfuerso pa keda fiel pa boso no pèrdè e privilegio di forma parti di e grupo di hende ku Dios a invitá*+ i skohe. Si boso ta sigui desplegá tur e kualidatnan ei, boso lo no faya nunka.+
11 E ora ei, boso lo por drenta libremente den e Reino eterno+ di nos Señor i nos Salbador, Hesukristu.+
12 P’esei, lo mi sigui rekordá boso e kosnan akí maske boso sa nan kaba i maske boso ta kere firmemente den e bèrdatnan di Dios ku boso a siña.
13 Tòg, mi ta haña ku ta bon pa, tanten ku mi ta den e tabernakel akí,*+ mi sigui animá boso i duna boso algun rekordatorio.+
14 Mi sa ku pronto mi ta bai laga e tabernakel akí,* manera nos Señor Hesukristu mes a laga mi komprondé bon kla.+
15 P’esei, mi ta hasi tur mi esfuerso pa sigui rekordá boso e kosnan akí pa, despues ku mi muri, boso keda tene nan na mente.
16 Loke nos a revelá na boso tokante nos Señor Hesukristu, esta, loke nos a bisa boso tokante su poder i su binida, no ta informashon basá riba e kuentanan falsu i ingenioso ku hende a inventá. Nos a revelá e kosnan ei na boso pasobra nos mes wowonan a mira Kristu su gloria magnífiko.+
17 Kristu a risibí onor i gloria for di nos Dios i Tata. Por ehèmpel, na un okashon, nos Dios mahestuoso a dirigí e siguiente palabranan na dje:* “Esaki ta mi Yu stimá, kende tin mi aprobashon.”+
18 Sí, nos mes oreanan a tende e palabranan ei resoná for di shelu ora nos tabata huntu ku Kristu riba e seru santu.
19 E palabranan ei a yuda nos bira mas konvensí ku tur e profesianan ku Dios a laga proklamá lo haña kumplimentu. Ta bon pa boso presta atenshon na e profesianan. Nan ta manera un lampi+ ku ta lusa un lugá skur, esta, boso kurason (te ora di dia habri i un strea di mardugá+ sali).
20 Un kos boso sa sigur: Niun profesia di Skritura no ta pensamentu di hende.*
21 Ademas, no ta hende a bini ku e idea di profetisá e kosnan ku a ser profetisá.+ E profetanan* a profetisá loke Dios a revelá na nan pa medio di spiritu santu ku tabata guia nan.+
Nota
^ Òf: “pa duna nos gratuitamente.”
^ Lit.: “yama.”
^ Òf: “un kondukta birtuoso.”
^ Òf: “i hasi boso esfuerso pa hiba un bida deboto na Dios.”
^ Òf: “boso lo no ta inaktivo ni improduktivo.”
^ Òf posiblemente: “hende siegu i hende ku por mira loke ta serka so.”
^ Lit.: “yama.”
^ Òf: “tanten ku mi ta den e tènt akí; tanten ku mi ta na bida.” Aki, “tènt” òf “tabernakel” ta referí na kurpa humano.
^ Òf: “pronto lo mi muri.”
^ Òf: “na un okashon, stèm di un persona mahestuoso a resoná.”
^ Òf: “no a originá debí na interpretashon personal.”
^ Òf: “E hòmbernan ku tabata profetisá.”
