Lamentashon 3:1-66
-
Yeremías ta ekspresá su sintimentunan i su speransa
א [álef]
3 Ami ta un hòmber ku a mira hende sufri pasobra Dios a rabia masha pisá ku nos i kastigá nos.
2 Dios a kore ku mi i pone mi kana den skuridat, no den lus.+
3 Sí, henter dia, e ta saka su man pa kastigá mi.+
ב [bet]
4 El a pone mi kurpa kaba na nada, i el a pone mi kueru para seka.El a kibra mi wesunan.
5 Di tur banda, el a sera mi aden; el a rondoná mi ku amargura venenoso+ i ku problema.
6 El a obligá mi biba den lugá skur, manera hende ku a muri hopi tempu pasá.
ג [guímel]
7 El a traha un muraya rònt di mi pa mi no skapa.El a mara mi ku kadena pisá di koper.+
8 Anto ora mi grita pidi ousilio, e no ke skucha* mi orashon.+
9 El a blòkia mi kaminda ku baranka di piedra.El a hasié difísil pa mi sigui riba mi ruta.+
ד [dálet]
10 E ta drumi warda pa ataká mi, meskos ku un ber òf un leon skondí.+
11 E ta lastra mi for di riba kaminda i sker mi na pida pida.*El a laga mi bandoná.+
12 El a span su bog i mek su flecha riba mi.
ה [he]
13 El a bora mi nirnan ku e flechanan* di su baliña.
14 Mi a bira kos di hari pa tur e pueblonan. Henter dia, nan ta hasi chèrchi di mi den nan kantikanan.
15 Dios a pone mi kome kos marga, i el a pone mi bebe awa ku nan a trèk di mata marga.+
ו [waw]
16 El a pone mi kibra mi djente komiendo greis.E ta pone mi lastra abou di miedu den shinishi.+
17 Bo ta kita mi* pas; mi a lubidá loke ta felisidat.*
18 P’esei, mi a bisa den mi mes: ‘Mi no tin niun gloria mas, i mi a pèrdè speransa den Yehova.’
ז [zayin]
19 Kòrda ku mi ta sufri i ku mi no tin lugá di biba mas.+ Kòrda ku mi ta kome mata marga i venenu marga.+
20 Sin falta, lo bo* kòrda riba mi i sak abou pa yuda mi.+
21 Ta riba esei mi ta keda kòrda; p’esei lo mi warda ku pasenshi riba bo.+
ח [het]
22 Ta danki na Yehova su amor leal, nos no a kaba na nada,+pasobra nunka e no ta stòp di mustra miserikòrdia.+
23 Tur mainta di nobo,+ e ta mustra miserikòrdia; semper e ta konfiabel.*+
24 Mi a bisa:* “Yehova ta mi herensia.*+ P’esei, lo mi warda ku pasenshi riba dje.”+
ט [tet]
25 Yehova ta bon pa hende ku ta pone nan speransa den dje;+ sí, e ta bon pa hende* ku ta sigui buska su guia.+
26 Ta bon pa warda den silensio*+ riba e salbashon di Yehova.+
27 Ta bon pa un persona eksperensiá difikultat* den su hubentut.+
י [yod]
28 Laga e persona ei sinta su so i keda ketu ora Dios ta permitié eksperensiá e difikultat ei.*+
29 Lag’é bùig ku su kara te abou na suela.+ Kisas tin speransa ainda ku lo e ser salbá.+
30 Lag’é duna su banda di kara na un hende ku ta dal e wanta; lag’é aseptá insulto te kaminda ku e por wanta.
כ [kaf]
31 Pasobra Yehova lo no rechasá nos pa semper.+
32 Aunke el a kousa nos tristesa, lo e tene miserikòrdia di nos pa motibu di su gran amor leal.+
33 E no gusta kousa hende sufrimentu ni tristesa.+
ל [lámed]
34 Dios no ta tolerá pa hende trapa e prizoneronan riba tera sin miserikòrdia,+
35 ni pa hende trapa derecho di un persona dilanti di Dios Haltísimo,+
36 ni pa hende stroba un hòmber di haña hustisia den su kaso legal.Yehova no ta tolerá e kosnan ei.
מ [mem]
37 Akaso un hende por papia algu i laga esei sosodé sin ku esei ta Yehova su boluntat?
38 For di boka di Dios Haltísimono ta sali kos bon i kos malu pareu.
39 Pues, pakiko un persona* mester keha tokante e konsekuensianan di e pikánan ku el a kometé?+
נ [nun]
40 Laga nos pensa bon riba nos komportashon,+ i laga nos bolbe serka Yehova.+
41 Laga nos hisa nos mannan na laira pa resa na Dios den shelu ku un kurason sinsero,+ bisando:
42 “Nos a peka i nos a rebeldiá,+ i abo no a pordoná nos.+
ס [sámekh]
43 Bo a rabia, i bo no a skucha nos orashon.*+Bo a persiguí nos, i bo a mata nos sin tene kompashon ku nos.+
44 Ku un nubia, bo a stroba nos di aserká bo, pa asina nos orashonnan no yega serka bo.+
45 Bo a laga nos keda bentá entre e pueblonan, manera sushi i kos pa tira afó.”
פ [pe]
46 Tur nos enemigunan ta hasi chèrchi di nos.+
47 Tur ora bai, nos ta morto spantá.+ Nos ta sinti nos atrapá, i nos a keda bandoná i ruiná.+
48 Awa ta kore for di mi wowo manera un riu pa motibu di e destrukshon di mi yu muhé, mi pueblo.+
ע [ayin]
49 Ketu bai awa ta basha for di mi wowo; mi no ta stòp di yora+
50 te dia ku Yehova wak abou for di shelu i mira kiko ta pasando.+
51 Mi* ta keda masha tristu ora mi mira loke a pasa ku tur e yu muhénan di mi stat.+
צ [sadé]
52 Sin niun motibu, mi enemigunan a yag riba mi manera ta yag riba para.
53 Nan a benta mi den buraku pa purba di mata mi; nan a keda tira mi ku piedra.
54 Awa a tapa mi kabes, i mi a bisa: “Awor sí mi fin a yega!”
ק [qof]
55 O Yehova, for di profundidat di e buraku, mi a yama bo nòmber.+
56 Tende mi stèm. No sera bo orea pa mi gritunan di ousilio, pa mi sklamashon pa haña alivio.
57 Dia ku mi a yama bo, bo a hala serka. Bo a bisa mi: “No tene miedu.”
ר [resh]
58 O Yehova, bo a defendé mi kaso.* Bo a salba mi bida.+
59 O Yehova, bo a mira e malu ku nan a hasi ku mi. Por fabor, husga mi na un manera hustu.+
60 Bo a mira kon nan a tuma vengansa riba mi. Sí, bo a mira tur e kòmplòtnan ku nan a traha kontra mi.
ש [sin] òf [shin]
61 O Yehova, bo a tende kon nan ta insultá mi. Sí, bo a tende tur e kòmplòtnan ku nan ta traha kontra mi.+
62 Bo ta tende tambe kon henter dia mi opositornan ta papia riba mi i kon nan ta traha plan kuchikuchi kontra mi.
63 Wak nan ei! Sea ku nan ta sintá òf pará, nan ta hasi bofon di mi den nan kantikanan!
ת [taw]
64 O Yehova, abo lo paga nan pa loke nan a hasi.
65 Lo bo laga nan bira tèrko; asina lo bo maldishoná nan.
66 O Yehova, abo lo persiguí nan den bo rabia, i lo bo kaba ku nan for di riba tera.
Nota
^ Òf: “e ta stroba; e ta blòkia.”
^ Òf posiblemente: “i laga mi keda manera un kunuku bashí.”
^ Lit.: “yunan.”
^ Òf: “mi alma su.”
^ Lit.: “loke ta bon.”
^ Òf: “bo alma lo.”
^ Òf: “bo fieldat ta grandi.”
^ Lit.: “porshon.”
^ Òf: “Mi alma ta bisa.”
^ Òf: “e alma.”
^ Òf: “warda ku pasenshi.”
^ Òf: “Dios pone e yugo ei riba su garganta.”
^ Lit.: “hende bibu.”
^ Lit.: “Rabiá, bo a stroba nos di aserká bo.”
^ Òf: “Mi alma.”
^ Òf: “defendé e kasonan legal di mi alma.”
