Atumangan so Arawdawin Impanbiahe Ra

DIAD Demokratikon Republika na Congo, wala so report nipaakar ed san-atsi a denesidi ray manbiahe ed arawdawin lugar ya atabek na bakal pian onatendi ed “Igloria so Dios” a Distriton Kombension ed Lisala. Nilikud ed espiritual ya instruksion tan Makristianon panlilimog ya inilaloan dan panggayagaan diad kombension, pinirawat da met a napinengnengan iray manangilaman na sangan opisina na saray Tasi nen Jehova ed Kinshasa. Lapud guerra sibil ya agawa ed bansa, pigay taon ya anggapon balot so apinengnengan da a nanlapud sangan opisina, kanian inanamot da itan a pankanawnawa.

Manlapud mismon baley da a Basankusu, say san-atsi so nambiahe panamegley na baloto, odino paraw, ya amaarap ed Lisala, a manga 300 kilometro kaarawi, a sikaray dinmalan ed katakelan tan binmaliw ed duaran ilog. Taloy simba iran nambiahe. Lapud pareho ran walad sigpot-panaon a ministeryo, a 3 taon imay sakey tan 19 taon imay sananey, inanamot da so impanbiahe ra pian ikayat so maong a balita na Panarian. Akapangusar ira na 110 ya oras ed impanpulong ed saraman so nabet da ed dalan, tan akapangipalima ira na 200 a tract tan 30 a magasin.

Diad ilog a kaukolan dan baliwan et walaray hippopotamus tan buwaya a mabetbet a nanenengneng diad satan a rehyon. Ag-ira nayarin ombaliw ed ilog no labi lapud mapeligro itan! Dinmalan met ira ed dakel a checkpoint na militar.

Anggaman arawdawi tan makapakesaw iyan impanbiahe, maliket a nansagpot iyan san-atsi. Sikara so misalsalamat tan malikeliket lapud impakaatendi ra ed kombension ed Lisala. Say kapusoan da so napnapno na entusiasmo parad katuaan, tan sikaray apaseseg diad impakapilimog ed 7,000 ya agagin inmatendi. Kayari na kombension, onman lamet kairap so dinalan da a pasempet, ingen ta asabian da so pamilya ra a maligeligen.