Judas 1:1-25
1 Siak, si Judas, ya aripen nen Jesu-Kristo tan agi nen Santiago, so nansulat ed sikayoran atawag, saray inad-aro a nikasakey ed Dios ya Ama tayo tan sasalimbengan parad si Jesu-Kristo:
2 Ondaak komon ed sikayo so panangasi, deen, tan panangaro na Dios.
3 Inararok ira, anggano gagawaen ko lay amin a nayarian ko pian isulat ed sikayo so nipaakar ed kilalaban ya iilaloan tayon amin, kaukolan ta kayo nin sulatan pian bilinen kayo a milaban ya impasya nisengeg ed pananisia ya aminpinsan ya impasabi ed saray masanto.
4 Say rason ko et walaray totoon akaloob ed limog tayo a manepeg ya ukomen unong ya impasakbay la nensaman na Kasulatan. Sarayan agmaridios a totoo et ginawa ran baraan so agnaparaan a kaabigan na Dios parad anggapoy-baing a kagagawa* tan ag-ira manmamatoor ed alenleneg ya Akankayarian ed sikatayo tan Katawan tayo, si Jesu-Kristo.
5 Labay ta kayon panonotan, anggaman amta yo la irayan amin a bengatla nensaman, ya anggano inliktar nen Jehova so totoo to ed dalin na Ehipto, dineral to ed kaunoran iramay andian na pananisia.
6 Tan saray anghel ya agnansiansia ed datin kipapasen da, a tinaynan da so manepeg ya ayaman da, so inggana to ed andi-anggaan a pakabalor diad makapal a kabilungetan anggad nasabi so pakaukom da diad baleg ya agew.
7 Ontan met, say Sodoma tan Gomorra tan saray syudad ed kaliberliber da so alablabas a nanggawa na pilalawanan* tan inunor day laman parad agmanepeg ya usar na satan, a singa ed ginawa met na saraman ya anghel. Saraya et onkanan pasakbay ed sikatayo diad panagmak na kadusa ed andi-anggaan ya apoy.
8 Mipadpara, sarayan totoo met a mankukugkugip et dudutakan day laman tan agda bibidbiren so pananguley tan mansasalita ra na mauges ed saray pinagalangan na Dios.
9 Balet sanen si Miguel ya arkanghel et akapisuppiatan ed Diablo nipaakar ed bangkay nen Moises, agto nanuleyan so pangukom ed sikato diad makapasakit iran salita, noagta inkuan to: “Baaten ka komon nen Jehova.”
10 Ingen sarayan totoo et mansasalita ra na mauges nipaakar ed amin a bengatlan agda amta. Singa ra andiay-kalakal ya ayayep lapud say amin a gagawaen da et saramay sipor labat a natatalosan da. Diad sarayan bengatla et dederalen day inkasikara.
11 Pakaskasi la ra, lapud tinumbok da so basbas nen Cain tan nansiglat ira ya angalig ed mauges a paraan nen Balaam makasengeg ed tumang. Tan aderal ira lapud rebelyoson panagsalita ra a singa si Kora!
12 Sikaray batobato ya akaamot ed dalem na danum diad saray panduroypo* yo legan iran midudungo ed sikayo, managpastol ira ya andiay takot a mamepesel ed inkasikara; lurelurem ya agmangipepelag na uran tan ipapalirpalir na dagem; kakiewan ya agmanbubunga no panaon da, ya amidua lan inatey, a binagot la;
13 agmakareen iran daluyon na dayat a mangibubura na saray sengegan na kababaingan da; bibitewen ya anggapoy direksion, a sikaray niganan manayam ya andi-anggaan diad sigpot a kabilungetan.
14 On, si Enoc, a komapito ed linya manlapud si Adan, so nampropesiya met nipaakar ed sikara sanen inkuan to: “Nia! Sinmabi si Jehova a kaiba iray samplon libolibo a masanton angheles to,
15 pian mangidapo na panangukom ed amin, tan mansentensia ed amin ya agmaridios nipaakar ed amin a mauges a ginawa ra, tan nipaakar ed amin a makapabigla iran bengatla a sinalita na saray agmaridios a managkasalanan sumpad sikato.”
16 Sarayan totoo et managmeremere, mareklamo ed kipapasen da ed bilay, manguunor ed saray dilin pilalek da, tan say bunga na sangi ra et panaglastog, legan ya irarayew da so arum a totoo parad dilin pakagunggonaan da.
17 Balet sikayoran inad-arok, nodnonot yo iray salitan imbalikas nensaman na saray apostol na Katawan tayon Jesu-Kristo,
18 a mabetbet dan inkuan ed sikayo: “Diad kaunoran a panaon et walaray managbalaw, ya uunoren da iray dilin pilalek da ya aliwan maridios.”
19 Manggagawa ra na sengegay pansisian, singa ra ayayep, andian ira na espiritu na Dios.
20 Balet sikayoran inad-arok, diad pamabiskeg yo ed inkasikayo ed sankasantosan a pananisia yo, tan pampikasi yo unong ed masanton espiritu,
21 mansiansia kayo ed aro na Dios, legan ya aalagaren yo so panangasi na Katawan tayon Jesu-Kristo a mangitonton ed bilay ya andi-anggaan.
22 Ontan met, itultuloy yon ipanengneng so panangasi ed saramay walaan na panduaruwa.
23 Isalba yo ra diad paningkat yo ed sikara manlapud apoy. Balet itultuloy yon ipanengneng so panangasi ed arum, ingen ta manalwar kayo, tan busol yo so anggan say akindalem a kawes ya amantsaan na laman.
24 Natan diad samay sakey a makayarin manalimbeng ed sikayo pian agkayo natiror tan agkayo namantsaan ed arap na gloria to tekep na baleg a liket,
25 diad alenleneg a Dios a Manangilaban tayo, diad panamegley nen Jesu-Kristo a Katawan tayo, so kawalaan komon na gloria, katagyan, pakapanyari tan pakauley manlapud gapoy gapo, natan, tan diad andi-anggaan. Amen.
Paimanod leksab
^ Jud 1:7
* Sayan salita et manutukoy ed amin a klase na agmanepeg a seksual a relasyon. Nengnengen so Apendise 4.
