အဘယ်စမ်းသပ်မှုမျိုးကိုမဆို ကျွန်ုပ်တို့ဖြေရှင်းနိုင်!
အဘယ်စမ်းသပ်မှုမျိုးကိုမဆို ကျွန်ုပ်တို့ဖြေရှင်းနိုင်!
သင်သည် လောလောဆယ် စမ်းသပ်ခံနေရပါသလော။ ဖြေမဆည်နိုင်လောက်အောင် စိတ်ပျက်နေပါသလော။ သင့်ပြဿနာသည် ကြီးမားလွန်း၍ မဖြေရှင်းနိုင်တော့ဟုပင် တစ်ခါတစ်ရံ စိုးရိမ်နေပါသလော။ သို့ဆိုလျှင် အားယူပါလေ! အဘယ်စမ်းသပ်မှုမျိုးကိုမဆို ရင်ဆိုင်ရပါစေ၊ ယင်းတို့ကို ဘုရားသခင်ဖြေရှင်းပေးနိုင်ကြောင်း သမ္မာကျမ်းစာက စိတ်ချစေသည်။
ဘုရားသခင်၏ကျေးကျွန်များသည် “အထူးထူးအပြားပြား စုံစမ်းနှောင့်ယှက်ခြင်းနှင့် တွေ့ကြုံ” ရမည်ဟု သမ္မာကျမ်းစာက ဆိုထားသည်။ (ယာကုပ် ၁:၂၊ ၃) “အထူးထူးအပြားပြား” (ဂရိလို ပိုင်ကီလို့စ်) ဟူသည့်စကားလုံးကို သတိပြုပါ။ ရှေးခေတ်အသုံးအနှုန်းအရ မူရင်းစကားလုံး၏အဓိပ္ပာယ်မှာ “အမျိုးမျိုး” သို့မဟုတ် “အရောင်အသွေးစုံ” ဖြစ်ပြီး “စမ်းသပ်မှုအမျိုးမျိုးအဖုံဖုံရှိခြင်း” ကိုအလေးပေးဖော်ပြသည်။ ထို့ကြောင့် ပုံဆောင်စကားအရ “အထူးထူးအပြားပြား စုံစမ်းနှောင့်ယှက်ခြင်း” ဟူသည် အရောင်အသွေးမျိုးစုံရှိသော စမ်းသပ်မှုများဖြစ်သည်။ သို့ဖြစ်စေကာမူ ယင်းတို့တစ်ခုစီကို ကျွန်ုပ်တို့ဖြေရှင်းနိုင်ရန် ယေဟောဝါထောက်မပေးနေကြောင်း အဘယ်ကြောင့် စိတ်ချနိုင်သနည်း။
‘ဘုရားသခင်၏ မခံစားထိုက်သောကြင်နာမှုကို နည်းမျိုးစုံဖြင့် ထင်ရှားပြ’
ခရစ်ယာန်များသည် “အထူးထူးအပြားပြားသော စုံစမ်းနှောင့်ယှက်ခြင်းကို ခံရ” ကြောင်း တမန်တော်ပေတရု ဖော်ပြ၏။ (၁ ပေတရု ၁:၇) နောက်ပိုင်းတွင် သူ၏မှုတ်သွင်းခံစာစောင်၌ ‘ဘုရားသခင်၏မခံစားထိုက်သောကြင်နာမှု’ ကို ‘နည်းမျိုးစုံဖြင့် ထင်ရှားပြသည်’ ဟုဖော်ပြခဲ့သည်။ (၁ ပေတရု ၄:၁၀၊ ကဘ) “နည်းမျိုးစုံဖြင့်” ဟူသောစကားစုသည် မူရင်းဂရိစကားလုံးပုံစံနှင့် ဆင်တူ၏။ ဤအသုံးအနှုန်းနှင့်ပတ်သက်၍ ကျမ်းပညာရှင်တစ်ဦး ဤသို့မှတ်ချက်ချ၏– “တကယ့်ကို မယုံနိုင်စရာ အယူအဆပဲ။ . . . ဘုရားသခင်ရဲ့ကျေးဇူးတော် [တစ်နည်းအားဖြင့် မခံစားထိုက်သောကြင်နာမှု] ကို ပိုင်ကီလို့စ်ဖြစ်တယ်လို့ ဆိုတဲ့အတွက် ဘုရားသခင့်ကျေးဇူးတော် မဖြေရှင်းပေးနိုင်တဲ့ အခြေအနေမျိုးမရှိဘူးလို့ ဆိုနေတာပဲ။ ဘုရားသခင့်ကျေးဇူးတော် မဖြေရှင်းနိုင်တဲ့၊ ဘုရားသခင့်ကျေးဇူးတော် အနိုင်မယူနိုင်တဲ့ အခြေအနေ၊ အကျပ်အတည်း၊ အရေးပေါ်အခြေအနေ ဒါမှမဟုတ် လိုအပ်ချက်ရယ်လို့ မရှိပါဘူး။ ဘဝမှာ ဘုရားသခင့်ကျေးဇူးတော် မဖြေရှင်းနိုင်တဲ့အရာ မရှိဘူး။ ဒါကြောင့် ကွင်းကွင်းကွက်ကွက်ပေါ်လွင်တဲ့ ပိုင်ကီလို့စ်ဆိုတဲ့ ဒီစကားလုံးဟာ အရာရာကိုတတ်နိုင်တဲ့ အရောင်အသွေးမျိုးစုံရှိတဲ့ ဘုရားသခင့်ကျေးဇူးတော်ကိုပဲ တန်းပြီးအမှတ်ရစေတယ်။”
စမ်းသပ်မှုများနှင့်လိုက်ဖက်သော ကြင်နာမှု
ပေတရု၏အဆိုအရ မခံစားထိုက်သောကြင်နာမှုကို ဘုရားသခင်ထင်ရှားပြသော နည်းတစ်နည်းမှာ ခရစ်ယာန်အသင်းတော်ကို ဖွဲ့စည်းထားသည့် လူအသီးသီးတို့အားဖြင့်ဖြစ်၏။ (၁ ပေတရု ၄:၁၁) ဘုရားသခင့်ကျေးကျွန်တစ်ဦးစီသည် စမ်းသပ်ခံနေရသူများအတွက် အားပေးမှုရင်းမြစ်ဖြစ်နိုင်သည့် ဝိညာဉ်ဆုကျေးဇူး သို့မဟုတ် စွမ်းရည်များ ပိုင်ဆိုင်ထားကြသည်။ (ရောမ ၁၂:၆-၈) သာဓကအနေနှင့် အသင်းတော်သားတချို့သည် ကျမ်းစာသွန်သင်ပေးရာတွင် ထူးချွန်ကြသည်။ ၎င်းတို့၏ ထိုးထွင်းသိမြင်မှုရှိသော စကားများက အခြားသူများကို ခံနိုင်ရည်ရှိရန် လှုံ့ဆော်ပေးသည်။ (နေဟမိ ၈:၁-၄၊ ၈၊ ၁၂) အခြားသူတို့မူ အကူအညီလိုအပ်နေသူများ၏ အိမ်သို့ မှန်မှန်လည်ပတ်ကြသည်။ ထိုသို့သော လည်ပတ်မှုများသည် “စိတ်နှလုံးသက်သာစေ” ၍အားရှိစေ၏။ (ကောလောသဲ ၂:၂) ကြီးကြပ်မှူးများသည် ထိုသို့ ယုံကြည်ခြင်းခိုင်ခံ့စေသော လည်ပတ်မှုများပြုလုပ်သည့်အခါ ဝိညာဉ်ဆုကျေးဇူး ပေးကမ်းကြ၏။ (ယောဟန် ၂၁:၁၆) စမ်းသပ်မှုများကြောင့် ဝမ်းနည်းပူဆွေးနေသော ယုံကြည်သူချင်းတို့ကို လှိုက်လှဲကြင်နာစွာ၊ နူးညံ့သိမ်မွေ့စွာ ဆက်ဆံတတ်သူများအဖြစ် လူသိများသူတချို့လည်း အသင်းတော်တွင်ရှိ၏။ (တမန်တော် ၄:၃၆; ရောမ ၁၂:၁၀; ကောလောသဲ ၃:၁၀) ထိုသို့မေတ္တာပြည့်ဝသော ညီအစ်ကို/မများ၏ စာနာမှုနှင့် အားတက်သရောကူညီမစမှုတို့သည် ဘုရားသခင့်မခံစားထိုက်သောကြင်နာမှု၏ ထူးခြားချက် သို့မဟုတ် “အရောင်အသွေး” ဖြစ်သည်။—သု. ၁၂:၂၅; ၁၇:၁၇။
“သက်သာခြင်းအမျိုးမျိုးတို့၏အရှင်”
ထို့ထက်ကား ယေဟောဝါသည် စိတ်နှလုံးကို သက်သာစေတော်မူ၏။ ကိုယ်တော်သည် “သက်သာခြင်းအမျိုးမျိုးတို့၏ အရှင်တည်းဟူသော . . . ဆင်းရဲခြင်းအမျိုးမျိုးတို့၌ . . . ငါတို့အား သက်သာစေ” သူဖြစ်တော်မူ၏။ (၂ ကောရိန္သု ၁:၃၊ ၄) သမ္မာကျမ်းစာပါဉာဏ်ပညာနှင့် သန့်ရှင်းသောဝိညာဉ်တော်မှရသော ခွန်အားတို့က ကျွန်ုပ်တို့၏ဆုတောင်းချက်များကို ယေဟောဝါဖြေကြားနေသည့် အဓိကနည်းလမ်းများဖြစ်သည်။ (ဟေရှာယ ၃၀:၁၈၊ ၂၁; လုကာ ၁၁:၁၃; ယောဟန် ၁၄:၁၆) တမန်တော်ပေါလုပေးခဲ့သော မှုတ်သွင်းခံကတိတော်က ကျွန်ုပ်တို့ကို အားတက်စေနိုင်သည်။ သူဤသို့ဆို၏– “သစ္စာနှင့်ပြည့်စုံတော်မူသည်ဖြစ်၍ သင်တို့မခံနိုင်သော စုံစမ်းနှောင့်ယှက်ခြင်းကို သင်တို့၌ ရောက်စိမ့်သောငှာ အခွင့်ပေးတော်မမူ၊ သင်တို့သည် ခံနိုင်မည်အကြောင်း စုံစမ်းနှောင့်ယှက်ခြင်းအရာနှင့်တကွ ထွက်မြောက်သောလမ်းကိုလည်း စီရင်ပြုပြင်တော်မူလိမ့်မည်။”—၁ ကောရိန္သု ၁၀:၁၃။
မှန်ပါသည်၊ ကျွန်ုပ်တို့ခံရသောစမ်းသပ်မှုသည် မည်သည့် “အရောင်အသွေး၊” မည်သည့်သဘောသဘာဝပင်ရှိပါစေ၊ ယင်းနှင့်လိုက်ဖက်သော ဘုရားသခင်၏ မခံစားထိုက်သောကြင်နာမှု “အရောင်အသွေး” သို့မဟုတ် ထင်ရှားဖော်ပြချက် အမြဲရှိပါလိမ့်မည်။ (ယာကုပ် ၁:၁၇) သွေးဆောင်မှုများနှင့် စိန်ခေါ်ချက်များ မည်မျှပင်အမျိုးစုံပါစေ၊ ယေဟောဝါသည် မိမိ၏ကျေးကျွန်များအတွက် သင့်တော်သောကူညီမစမှုကို အချိန်ကိုက်ပေးတော်မူခြင်းက “ဘုရားသခင်၏အထူးထူးအပြားပြားသော ပညာတော်” သာဓကတစ်ခုမျှသာဖြစ်သည်။ (ဧဖက် ၃:၁၁၊ သမ္မာ) အသင် သဘောမတူပေလော။
[စာမျက်နှာ ၃၁ ပါ ရုပ်ပုံများ]
ကျွန်ုပ်တို့၏စမ်းသပ်မှုများကို ယေဟောဝါ ကူညီဖြေရှင်းပေး