1. Ġeħova x’għamel għalik?

INT kif sirt taf bil-​verità? Forsi l-​ewwel darba li smajt “l-​aħbar tajba” kien mingħand il-​ġenituri tiegħek, mingħand xi ħadd fuq il-​post tax-​xogħol jew l-​iskola, jew meta x-​Xhieda ġew iħabbtulek id-​dar. (Mk. 13:10) Imbagħad, xi ħadd għamel sforz u qattaʼ ħafna ħin jistudja l-​Bibbja miegħek. Matul l-​istudju, int sirt tħobb lil Ġeħova u tgħallimt li hu jħobbok ukoll. Ġeħova ġibdek lejn il-​verità u issa minħabba li int dixxiplu taʼ Ġesù Kristu, għandek l-​opportunità li tgħix għal dejjem. (Ġw. 6:44) Bla dubju, int tapprezza li Ġeħova uża lil xi ħadd biex jgħallmek il-​verità u li issa sirt wieħed mill-​qaddejja tiegħu.

2. X’se niddiskutu f’dan l-​artiklu?

² Issa li nafu l-​verità, għandna l-​opportunità li ngħinu lil oħrajn jingħaqdu magħna biex jgħixu għal dejjem. Jistaʼ jkun faċli għalik biex tipprietka lin-​nies, imma taf issibha diffiċli biex toffri jew tikkonduċi studju tal-​Bibbja. Jekk tħossok hekk, f’dan l-​artiklu se niddiskutu xi suġġerimenti li se ssibhom t’għajnuna. Se niddiskutu wkoll għala nkunu rridu nagħmlu dixxipli. U se naraw kif nistgħu negħlbu sfidi li jaf qed iżommuna lura milli nikkonduċu studju tal-​Bibbja. Imma l-​ewwel, ejja naraw għala m’għandniex biss nippritkaw imma nkunu għalliema tal-​aħbar tajba wkoll.

3. Aħna għala nippritkaw?

³ Meta Ġesù kien fuq l-​art lid-​dixxipli tiegħu tahom xogħol li kien jirrikjedi żewġ affarijiet. L-​ewwel, Ġesù mhux biss qalilhom li għandhom jippritkaw il-​messaġġ tas-​Saltna imma anki wriehom kif. (Mt. 10:7; Lq. 8:1) Pereżempju, Ġesù qal lid-​dixxipli tiegħu x’għandhom jagħmlu meta n-​nies jisimgħu l-​aħbar tajba u meta ma jaċċettawx il-​messaġġ. (Lq. 9:2-​5) Hu spjega wkoll li d-​dixxipli tiegħu kienu se jagħtu “xiehda lill-​ġnus kollha.” (Mt. 24:14; Atti 1:8) Sew jekk in-​nies kienu se jaċċettaw il-​messaġġ tas-​Saltna u sew jekk le, Ġesù kkmanda lid-​dixxipli tiegħu biex jippritkaw dwar is-​Saltna u dak li se twettaq.

4. Skont Mattew 28:18-​20, minbarra li nippritkaw x’għandna nagħmlu?

⁴ X’kienet it-​tieni ħaġa li Ġesù kkmanda lid-​dixxipli tiegħu biex jagħmlu? Hu qal lid-​dixxipli tiegħu biex jgħallmu lin-​nies jobdu l-​affarijiet li hu kkmanda. Xi nies forsi jgħidu li l-​kmand li ta Ġesù dwar l-​ippritkar u t-​tagħlim kien biss għall-​Kristjani tal-​bidu. Imma dan mhux vera għax Ġesù qal li dan ix-​xogħol importanti kellu jibqaʼ jsir “sal-​konklużjoni tas-​sistema.” (Aqra Mattew 28:18-​20.) X’aktarx, Ġesù ta dan il-​kmand meta deher lil iktar minn 500 dixxiplu. (1 Kor. 15:6) U fil-​viżjoni li ta lil Ġwanni, hu wera biċ-​ċar li d-​dixxipli tiegħu kollha kellhom jgħinu lil oħrajn isiru jafu dwar Ġeħova.—Riv. 22:17.

5. Skont l-​1 Korintin 3:6-​9, Pawlu x’eżempju ġab biex jurina li l-​ippritkar u t-​tagħlim imorru flimkien?

⁵ L-​appostlu Pawlu qabbel ix-​xogħol tat-​tagħlim mat-​tkabbir tal-​pjanti. Dan jurina li aħna rridu nagħmlu iktar milli niżirgħu ż-​żerriegħa. Hu fakkar lill-​aħwa f’Korintu: “Jien ħawwilt, Apollo saqqa . . . Intom l-​għalqa t’Alla li qed tiġi kultivata.” (Aqra l-​1 Korintin 3:6-​9.) Bħala ħaddiema “fl-​għalqa t’Alla” aħna niżirgħu ż-​żerriegħa meta nippritkaw u nsaqqu meta ngħallmu. (Ġw. 4:35) Imma aħna nafu li Alla jkabbar iż-​żerriegħa, jiġifieri, jiġbed in-​nies lejh.

6. Meta ngħallmu lin-​nies, xi rridu ngħinuhom jagħmlu?

⁶ Aħna qegħdin infittxu lil dawk li għandhom “attitudni xierqa lejn il-​ħajja taʼ dejjem.” (Atti 13:48) Biex ngħinu lil dawn l-​uħud isiru dixxipli, irridu ngħinuhom (1) jifhmu, (2) jemmnu, u (3) japplikaw l-​affarijiet li jitgħallmu mill-​Bibbja. (Ġw. 17:3; Kol. 2:6, 7; 1 Tess. 2:13) Fil-​kongregazzjoni lkoll kemm aħna nistgħu ngħinu lill-​istudenti tal-​Bibbja billi nuruhom l-​imħabba u ngħinuhom iħossuhom komdi meta jattendu l-​laqgħat. (Ġw. 13:35) L-​għalliem li jkun qed jikkonduċi l-​istudju jaf ikollu jqattaʼ ħafna ħin biex jgħin lill-​istudent ‘iwaqqaʼ affarijiet li jkunu stabbiliti fis-​sod,’ jiġifieri, jaqtaʼ drawwiet reliġjużi u vizzji ħżiena. (2 Kor. 10:4, 5) Jistaʼ jkun li jgħaddu x-​xhur biex tgħin lil xi ħadd jagħmel dawn il-​bidliet fil-​ħajja tiegħu u jikkwalifika għall-​magħmudija. Imma bla dubju l-​isforz li tagħmel huwa worth it.

7. Għala nippritkaw lin-​nies u ngħallmuhom l-​aħbar tajba?

⁷ Għala nippritkaw lin-​nies u ngħallmuhom biex isiru dixxipli? L-​ewwel, għax meta nagħmlu l-​almu tagħna biex nippritkaw u ngħallmu, nuru li nħobbu lil Ġeħova. (1 Ġw. 5:3) Aħseb ftit dwar dan:  L-​imħabba għal Ġeħova ġegħlitek tibda tipprietka minn dar għal dar. Kien faċli għalik? X’aktarx li le. Meta mort tipprietka l-​ewwel darba ħassejtek eċitat? Żgur li kont eċitat! Imma għax kont taf li dan huwa x-​xogħol li tak Ġesù, int obdejtu. U iktar ma bdejt tipprietka, x’aktarx li sar iktar faċli għalik. Imma kif tħossok kieku jkollok tikkonduċi studju tal-​Bibbja? Tibżaʼ? Forsi iva. Imma jekk titlob lil Ġeħova u tgħidlu biex jgħinek tkun kuraġġuż u toffri studju tal-​Bibbja, hu jistaʼ jgħinek tkun trid tgħallem lil xi ħadd.

8. Skont Marku 6:34, x’se jġegħelna wkoll inkunu rridu ngħallmu lin-​nies?

⁸ It-​tieni, l-​imħabba għan-​nies iġġegħelna ngħallmuhom il-​verità. Pereżempju, darba waħda Ġesù u d-​dixxipli tiegħu kienu għajjenin ħafna minħabba li kienu ilhom jippritkaw. Huma kienu qed ifittxu post biex jistrieħu imma folla kbira sabithom. Ġesù tħassarhom u “beda jgħallimhom ħafna affarijiet.” (Aqra Marku 6:34.) Minkejja li kien għajjien hu ħadem iebes. Għala? Għax Ġesù kien jaf kif kienu qed iħossuhom in-​nies, u hu ried jgħinhom għax kienu qed ibatu u kellhom bżonn l-​għajnuna. Illum, in-​nies qegħdin fl-​istess sitwazzjoni. Minkejja li forsi jidhru ferħanin u sodisfatti bil-​ħajja tagħhom, huma qishom nagħaġ mitlufin u mingħajr ragħaj. Pawlu qal li nies bħal dawn ma jafux lil Alla u m’għandhomx tama. (Efes. 2:12) Huma qegħdin “fit-​triq li tieħu għall-​qerda”! (Mt. 7:13) Meta naħsbu kemm in-​nies għandhom bżonn ikunu jafu lil Alla, se nitħassruhom u l-​imħabba se ġġegħelna nkunu rridu ngħinuhom. U l-​aħjar mod kif nistgħu ngħinuhom hu billi noffru li nistudjaw il-​Bibbja magħhom.

9. Skont Filippin 2:13, Ġeħova kif jistaʼ jgħinek?

⁹ Forsi tibżaʼ toffri studju tal-​Bibbja għax taf li se jkollok bżonn ħafna ħin biex tipprepara u tagħmel l-​istudju. Jekk tħossok hekk, tkellem maʼ Ġeħova. Itolbu jgħinek biex ikollok ix-​xewqa tagħmel studju maʼ xi ħadd. (Aqra Filippin 2:13.) L-​appostlu Ġwanni qalilna li Ġeħova jwieġeb it-​talb li jkun fi qbil mar-​rieda tiegħu. (1 Ġw. 5:14, 15) Mela tistaʼ tkun ċert li Ġeħova se jgħinek tkun trid tgħallem lin-​nies.

10-11. Għala jaf inżommu lura milli nikkonduċu studju tal-​Bibbja?

¹⁰ Aħna nafu li huwa importanti li ngħallmu imma jistaʼ jkun diffiċli biex nagħmlu kemm nixtiequ f’dan ix-​xogħol tat-​tagħlim. Ejja naraw x’jistgħu jkunu wħud mill-​isfidi u x’nistgħu nagħmlu biex negħlbuhom.

¹¹ Jistaʼ jkun li ma nistgħux nagħmlu daqs kemm nixtiequ. Pereżempju, ħafna minna qegħdin nikbru jew għandna saħħa batuta. Inti qed tħossok hekk? Jekk iva, ikkunsidra waħda mil-​lezzjonijiet li tgħallimna mill-​pandemija tal-​COVID-​19. Matul dan iż-​żmien tgħallimna li nistgħu nikkonduċu studji tal-​Bibbja billi nużaw it-​telefon jew affarijiet elettroniċi oħra. Għalhekk, int tistaʼ tibda studju waqt li qiegħed fil-​kumdità taʼ darek u dan jistaʼ jkun iktar faċli għalik. Imma hemm vantaġġ ieħor. Xi nies iridu jistudjaw il-​Bibbja imma ma jkunux jistgħu fil-​ħin li l-​aħwa jkunu fil-​ministeru. Huma forsi jkunu jistgħu kmieni filgħodu jew tard filgħaxija. Tistaʼ tikkonduċi studju tal-​Bibbja f’dan il-​ħin? Ġesù għallem  lil Nikodemu billejl għax Nikodemu hekk xtaq.—Ġw. 3:1, 2.

12. X’raġunijiet għandna biex inkunu fiduċjużi li aħna nistgħu ngħallmu?

¹² Jistaʼ jkun inħossuna li m’aħniex kapaċi nikkonduċu studju tal-​Bibbja. Forsi nħossu li rridu nkunu nafu aktar dwar il-​Bibbja jew li għandna nkunu għalliema aħjar biex nistudjaw maʼ xi ħadd. Jekk tħossok hekk, ikkunsidra tliet affarijiet li jistgħu jinkuraġġuk. L-​ewwel, għal Ġeħova int tikkwalifika biex tgħallem lil oħrajn. (2 Kor. 3:5) It-​tieni, Ġesù, li għandu “kull awtorità fis-​sema u fuq l-​art,” ikkmandak biex tgħallem. (Mt. 28:18) U t-​tielet, int tistaʼ tistrieħ fuq oħrajn għall-​għajnuna. Ġesù qal dak li għallmu Missieru u int tistaʼ tagħmel l-​istess. (Ġw. 8:28; 12:49) Barra minn hekk, int tistaʼ titlob l-​għajnuna mingħand l-​indokratur tal-​grupp tiegħek, pijunier, jew pubblikatur tal-​esperjenza biex jgħinek tikkonduċi studju tal-​Bibbja. Mod wieħed kif tistaʼ ssir għalliem aħjar hu billi tmur magħhom meta jkollhom studju tal-​Bibbja.

13. Għala għandna nkunu lesti li ngħallmu b’modi differenti?

¹³ Jistaʼ jkun li nsibuha diffiċli biex nużaw għodda u metodi ġodda. Il-​mod kif nikkonduċu studju tal-​Bibbja issa nbidel. Biex nużaw il-​ktieb il-​ġdid, Għix Ħajja Ferħana għal Dejjem!, irridu nippreparaw għall-​istudju u nikkonduċu l-​istudju b’mod differenti. Issa rridu naqraw inqas paragrafi imma rridu nitkellmu iktar mal-​istudent. Meta ngħallmu, nużaw aktar vidjows u għodod oħra, bħal JW Library^®. Jekk ma tafx kif tuża din l-​għodda, tkellem maʼ xi ħadd li jistaʼ jgħinek titgħallem. Spiss, aħna nieħdu pjaċir nagħmlu l-​affarijiet kif inkunu mdorrijin nagħmluhom. Allura, mhux faċli għalina biex naddattaw għal modi ġodda. Imma bl-​għajnuna taʼ Ġeħova u tal-​aħwa, inti se ssibha aktar faċli biex taddatta u tieħu pjaċir aktar tistudja l-​Bibbja man-​nies. Bħalma qal pijunier, dan il-​metodu huwa “sabiħ għall-​istudent u anki għall-​għalliem.”

14. Xi rridu nagħmlu jekk fit-​territorju tagħna diffiċli biex nibdew studju, u l-​1 Korintin 3:6, 7 kif jinkuraġġina?

¹⁴ Jistaʼ jkun li fit-​territorju tiegħek diffiċli tibda studju tal-​Bibbja. Xi nies ma jinteressahomx mill-​messaġġ tagħna jew saħansitra jiħduha kontrina. X’jistaʼ jgħinna biex ma nħossuniex skuraġġiti? Ftakar li ċ-​ċirkustanzi tan-​nies jistgħu jinbidlu f’din id-​dinja mimlija problemi, u dawk li xi darba ma kinux interessati, jistgħu jindunaw li għandhom bżonn lil Alla fil-​ħajja tagħhom. (Mt. 5:3) Xi wħud li qabel ma kinux jaċċettaw il-​letteratura tagħna, iktar tard bdew jistudjaw il-​Bibbja. Barra minn hekk, aħna nafu li Ġeħova hu Sid il-​ħsad. (Mt. 9:38) Ġeħova jridna nkomplu niżirgħu u nsaqqu, imma hu jieħu ħsieb li jkabbar. (1 Kor. 3:6, 7) U kemm hu inkuraġġanti meta niftakru li, anke jekk bħalissa ma nistgħux nikkonduċu studju tal-​Bibbja, Ġeħova se jippremjana għax qed naħdmu iebes biex ngħinu lin-​nies! *

15. Ġeħova kif iħossu meta xi ħadd jaċċetta studju tal-​Bibbja u jibda japplika dak li jkun qed jitgħallem?

¹⁵ Ġeħova jieħu pjaċir meta persuna taċċetta l-​veritajiet tal-​Bibbja u taqsamhom  m’oħrajn. (Prov. 23:15, 16) Min jaf kemm iħossu kuntent Ġeħova meta jara l-​qaddejja tiegħu jippritkaw u jgħallmu b’żelu! Pereżempju, minkejja l-​pandemija globali fis-​sena taʼ servizz tal-​2020, saru 7,705,765 studju tal-​Bibbja li għenu lil 241,994 persuna jiddedikaw ħajjithom lil Ġeħova u jitgħammdu. U dawn id-​dixxipli ġodda se jikkonduċu studji tal-​Bibbja u jagħmlu aktar dixxipli. (Lq. 6:40) Nistgħu nkunu ċerti li aħna nferrħu lil Ġeħova meta ngħinu lil oħrajn isiru dixxipli.

16. X’mira tistaʼ tagħmel?

¹⁶ Li nagħmlu dixxipli mhuwiex xogħol faċli, imma bl-​għajnuna taʼ Ġeħova nistgħu ngħallmu lil oħrajn iħobbu lil Missierna tas-​sema. Tistaʼ tagħmilha mira li tibda studju tal-​Bibbja maʼ xi ħadd? Meta lil dawk li niltaqgħu magħhom nistaqsuhom jekk iridux jistudjaw il-​Bibbja, nistgħu nibqgħu sorpriżi bir-​reazzjoni tagħhom. Nistgħu nkunu ċerti li Ġeħova se jbierek l-​isforzi tagħna.

17. Kif se nħossuna jekk jirnexxilna nikkonduċu studju tal-​Bibbja?

¹⁷ Kemm hu privileġġ sabiħ li nistgħu nippritkaw u ngħallmu l-​verità lil oħrajn! Dan ix-​xogħol vera jagħmilna ferħanin. L-​appostlu Pawlu li għen lil ħafna nies f’Tessalonika jsiru dixxipli, qal hekk: “X’inhi t-​tama jew il-​ferħ jew il-​kuruna taʼ l-​hena tagħna—ara, mhux fil-​fatt intom?—quddiem il-​Mulej tagħna Ġesù fil-​preżenza tiegħu? Żgur li intom il-​glorja u l-​ferħ tagħna.” (1 Tess. 2:19, 20; Atti 17:1-​4) Ħafna aħwa llum iħossuhom bl-​istess mod. Oħt jisimha Stéphanie, li flimkien mar-​raġel tagħha għenet lil ħafna jaslu għall-​magħmudija tgħid, “M’hemmx ferħ ikbar milli tgħin lin-​nies jiddedikaw ħajjithom lil Ġeħova.”