Ilyalemvilwe na Yoani 2:1-25
2 Lyene lino papisile amanda yaili, kwali umutebeto wa winga uku Kana umu citungu ca Galili, nupya na nyina wakwe Yesu akuno wali.
2 Yesu na asambi yakwe nayo kwene yayamile uku mutebeto wa winga.
3 Lino waini wali apiipi nu kusila, nyina wakwe Yesu wamunenyile ati: “Yatakweti waini.”
4 Lelo Yesu wamunenyile ati: “Cico citafwile ukutusakamika mayo.* Insita yane itatala yafika.”
5 Nyina wanenyile apeelanga antu ivyakulya ati: “Mucite vyonsi vino amamunena.”
6 Lyene kwali insembo 6 izya manzi izyapangiilwe na mawe, izyaomviwanga uku kuisangulula ukulingana ni ntambi zya Yayuda,+ cila nsembo iingizyanga malita 44 ukufika kuli 66.*
7 Yesu wayanenyile ati: “Zuuzyini manzi umu nsembo.” Nayo yazuuzizye ukufika na papela.
8 Lyene wayanenyile ati: “Tapulinimo mutwalile umukalamba wa mutebeto.” Nayo yamutwalile.
9 Lino umukalamba wa mutebeto wamwilemo manzi asangwike waini nanti cakuti atamanyile kuno waini wiyo wafumile (lelo aomvi atafile manzi yene yamanyile), wamile siwinga
10 nu kumunena ati: “Muntu wensi akatandikilapo ukuleta waini umusuma, lyene antu nga yakoleka, akaleta waini asi ningo. Wemo watusunga waini umusuma ukufika na ndakai.”
11 Yesu wacisile icizungusho cii ca kutandikilako umu Kana mu musumba wa Galili, nupya walenzile ululumbi lwakwe lumanyikwe,+ na asambi yakwe yamutaile.
12 Pa cisila cakwe cii, Yesu na nyina na ina yakwe+ alino na asambi yakwe yaile uku Kapenaumu,+ lelo yatiikazileko amanda aingi.
13 Lyene Ucilo+ wa Yayuda wali apiipi, nupya Yesu waile uku Yelusalemu.
14 Lino wingile umwi tempele, wazanyile antu aakazyanga ing’ombe, imfwele ni nkunda+ alino na aakauzyanga impiya ala yatenzi umu vilimba.
15 Lyene lino wapanzile swepu, wazinzile imfwele ni ng’ombe umwi tempele kumwi na yonsi azikazyanga, nupya witiile impiya zyakwe yano yakauzyanga nu kupenoola matebo yao.+
16 Nupya wanenyile aakazyanga inkunda ati: “Fumyini ivintu vii muno! Tiini ukucitila uculuzi umu ng’anda yakwe Tata!”+
17 Asambi yakwe iwishe ukuti calembwa ukuti: “Kucincila kwa pa ng’anda yako kulandya.”+
18 Fwandi Ayuda yamuzizye iyati: “I cimanyililo ci cino umatucitila,+ icimalenga tusininkizye ukuti watukwata insambu zya kucita ivintu vii?”
19 Yesu wayaswike ati: “Wishini itempele lii, nupya umu manda yatatu ndalikuula.”+
20 Lyene Ayuda yalanzile iyati: “Itempele lii lyakuuzilwe umu myaka 46, uzye wemo ulalikuula umu manda yatatu?”
21 Lelo itempele lino walandangapo, u mwili wakwe.+
22 Lino watutuulwilwe ukufuma uku yafwe, asambi yakwe iwishe ukuti vii avino walandangapo,+ nupya yataile vino Malembo yalanzile na vino Yesu walanzile.
23 Lino wali umu Yelusalemu pa kuzevya Ucilo, antu aingi yamutaile lino yaweni ivizungusho vino wacitanga.
24 Lelo Yesu atayataile sana pano wayamanyile yonsi
25 nupya atalondanga ukuti umuntu ali wensi amunene vino antu yelenganyanga, pano wamanyile ivyali mu myenzo ya yantu.+
Mafutunoti
^ Imvwango iyaomviwa paa ikulangilila ukukana.
^ Cipimo cino yapimilangamo ivya manzi yacamanga yakuti bati icalingine na malita 22. Lolini Ivyeo na Vyuze pa B14.
