Ilyalemvilwe na Mateo 5:1-48
-
LYASI LYA PA MWAMBA (1-48)
5 Lino Yesu waweni maumba, wakwezile pa mwamba; nupya lino wikazile, asambi yakwe yaile kuli aliwe.
2 Lyene watandike ukuyasambilizya ati:
3 “Ansansa aantu aakalondesha vyakwe Leza,*+ pano Uwene wa kwi yulu u wao.
4 “Ansansa aantu aakaloosha, pano yalateekeziwa.+
5 “Ansansa aantu afuuke+ pano yalapyana insi.+
6 “Ansansa aantu aakalondesha+ ulungami, pano vino yakalonda vilacitika.+
7 “Ansansa aantu aya nu luse,+ pano yalelelwa.
8 “Ansansa aantu asanguluke imyenzo,+ pano yalalola Leza.
9 “Ansansa aantu ya mutende,+ pano yauze yalayama ukuti ana yakwe Leza.
10 “Ansansa aantu yano yakacuziwa pa mulandu wa ulungami+ pano Uwene wa kwi yulu u wao.
11 “Mwemwe ya nsansa ndi cakuti antu yakumupontela+ nu kumucuzya+ nu kumubepezya ivintu iviipe pa mulandu wane.+
12 Zangini nu kusansamuka sana,+ pano icilambu cinu+ i cikulu umwi yulu, pano vivyo kwene avino yacuzizye na ya kasesema aaliko mpiti.+
13 “Mwemwe musilya+ wa pano nsi, lelo ndi cakuti musilya wafumuka, uzye kuli angaukalifya nupya? Usiomviwa uku cili consi lelo ukasumbwa+ nu kulyatolwa na antu.
14 “Mwemwe luswepo lwa pano nsi.+ Musumba utanga ufisame ndi cakuti wayela pa mwamba.
15 Antu yasikozya lampi nu kutupikapo,* yakamwika pa ca kuteekapo nawe akapeela uluswepo kuli yonsi aali mu ng’anda.+
16 Namwe kwene, mwaleka uluswepo lwinu lwaloleka ku yantu yonsi+ pakuti yangalola imilimo inu isuma+ nu kucindika Tata winu uwa kwi yulu.+
17 “Mutaelenganya ukuti niiza umu konona masunde nanti ivisambilizyo vyakwe ya kasesema. Ntiiza umu konona, lelo niiza uku kufikilizya.+
18 Cumi namunena ukuti nanti cakuti iyulu ni insi vingapita, patalononekapo kalembo kanono nanti kamusilwa ka kalembo kufikila vyonsi vice vicitike.+
19 Fwandi wensi uwatama isunde lyonga pa masunde yaa anono nu kusambilizya yauze ukucita vivyo kwene, alaamwa ukuti u munono mu Wene wa kwi yulu. Lelo wensi aakalondela masunde yaa nu kusambilizya yauze alaamwa ukuti u mukalamba mu Wene wa kwi yulu.
20 Pano nkumunena ukuti ulungami winu nga utacizile wakwe ya kalemba na Afaliseo+ ale mutalingila umu Wene wa kwi yulu.+
21 “Muuvwa vino cavwanzilwe uku yantu ya mpiti ukuti: ‘Utaakoma,+ lelo wensi uwakoma yalamutwala uku cilye.’+
22 Lelo nkumunena ukuti wensi aakatwalilila ukusokela+ umwina yalamutwala ku cilye, nupya wensi uwanena umwina amazwi ya miponto yalamutwala uku Cilye Cikalamba, lelo uwavwanga ukuti ‘Ciwelewele we!’ wene alapingulwa ukuya uku Gehena.*+
23 “Ndi cakuti ukutwala upe pa ulambo,*+ lyene papo kwene wiusha ukuti umwina wako wakusokela,
24 ushe upe wako pa nkoleelo ya ulambo nu kuswilila. Mutale mukuvwane nu mwina wako alino uwele uwize upeele upe wako.+
25 “Mwauvwana zuwa na akukutwala uku cilye lino mucili mu nzila, pakuti atakufisha kuli kapingula, na kapingula nawe atakupeela uku mulinzi pakuti akusumbile umu cifungo.+
26 I cumi nkukunena ukuti utalafuma ukufikila ukalipile impiya zyonsi zino wakwata.*
27 “Muuvwa vino cavwanzilwe ukuti: ‘Utaacita ucende.’+
28 Lelo nemo nkumunena ukuti wensi uwatwalilila ukulolekesha umwanaci+ nu kumukumbwa ala watacita mpiti nawe ucende umu mwenzo.+
29 Lyene ndi cakuti ilinso lyako ilya kwi lunji likukulenga ukuluvyanya, litonkole nu kulisumba.+ Pano cazipa ukuponzya icilundwa conga ukucila kuti umwili wako onsi usumbwe umu Gehena.*+
30 Nupya ndi cakuti ikasa lyako ilya kwi lunji likukulenga ukuluvyanya, liputule nu kulisumba.+ Pano cazipa ukuponzya icilundwa conga ukucila kuti umwili wako onsi uye umu Gehena.*+
31 “Nupya cavwanzilwe ukuti: ‘Wensi uwata umuci, alinzile ukumupeela kalata wa kumuteelapo.’+
32 Lelo nemo nkumunena ukuti wensi uwata umuci pa mulandu uze ukucila pa uzelele,* ale wamulenga ukuya mu uzanzo wa kucita ucende, nupya wensi uwatwala umwanaci wiyo ala wacita ucende.+
33 “Nupya muuvwa vino cavwanzilwe ku yantu ya mpiti ukuti: ‘Utalinzile ukulapa ukwaula ukufikilizya,+ lelo ulinzile ukufikilizya imilapo yako kuli Yeova.’*+
34 Lelo nkumunena ukuti: Mutaalapa,+ nanti sile ukulapa ukuomvya iyulu, pano i cilimba cakwe Leza;
35 nanti sile ukuomvya insi, pano ali cilimba ca ngazo zyakwe,+ nanti sile ukuomvya Yelusalemu, pano u musumba wa Mwene mukalamba.+
36 Mutaalapa ukuomvya umutwe, pano mutanga musenule ulunyele longa ukuti luye ulutiswe nanti ulutifi.
37 Lekini ‘Ee’ winu aye ee, na ‘Awe’ winu aye awe,+ pano ivyacila pali vii vikafuma uku mwipe.+
38 “Muuvwa vino cavwanzilwe ukuti: ‘Ilinso pi linso ni lino pi lino.’+
39 Lelo nkumunena ukuti: Mutaakanya umwipe, wensi uwakupama ukwi tama lya kwi lunji, mupeele ni lyuze kwene.+
40 Nupya ndi cakuti umwi akulonda ukukutwala uku cilye pakuti akakupoke icakuzwala conga, muleke asende na cuze kwene pali vino uzwite;+
41 nupya ndi cakuti umwi uwaya mu ulasi wakupatikizya ukumusendela vimwi ukulingana na kilomita* wenga, musendele ukulingana na makilomita yaili.
42 Uwapeela uwakulenga, nupya utaima aakulonda ukukongola* kuli wewe.+
43 “Muuvwa vino cavwanzilwe ukuti: ‘Uwatemwa umuzo+ nu kupata umulwani wako.’
44 Lelo nkumunena ukuti: Mwatemwa alwani inu+ nu kupepelako aakamucuzya,+
45 pakuti mungalanga ukuti mwemwe yana yakwe Tata winu uwa kwi yulu,+ pano wene akaleka kasanya ukuwala pa yantu aipe na asuma nu kuleka imvula ukutoonya pa yantu alungame na aatalungama.+
46 Ndi cakuti mwatemwa sile aamutemwa, i cilambu ci cino mungakwata?+ Uzye asi vino na ya kasonkisha ya misonko yakacita?
47 Nupya ndi cakuti mukalamuka sile aina inu, i cintu ci ciiyele cino mukacita? Uzye na antu ya mu nko asi vino yakacita vivyo kwene?
48 Mulinzile ukuya aamalilike, wakwe vino Tata winu uwa kwi yulu waya umumalilike.+
Mafutunoti
^ Nanti “aamanya ukuti yakalondekwa Leza.”
^ Mu Cigiliki: “Kutupikapo na basiketi wa kupimilako.”
^ Incende ino yocelangapo ivikoona ukunzi yakwe Yelusalemu. Lolini Ulondolozi wa Mazwi.
^ Nanti “pano yapeelelanga malambo.”
^ Mu Cigiliki: “Kalupiya kanono sana pa mpiya zyonsi izyaomviwanga.”
^ Lolini Ulondolozi wa Mazwi.
^ Lolini Ulondolozi wa Mazwi.
^ Kuvuzya izwi lya mu Cigiliki ilyakuti Por·nei′a. Lolini Ulondolozi wa Mazwi.
^ Lolini Ivyeo na Vyuze pa A5.
^ Mu Cigiliki: “Mailo.” Lolini Ivyeo na Vyuze pa B14.
^ Kuli kuti kukongola ukwaula izya kwikilapo pa kuwezya.
