Ilyalemvilwe na Mateo 24:1-51
-
ICIMANYILILO CA KUYAPO KWAKWE KLISTU (1-51)
24 Lyene lino Yesu wafumanga api tempele, asambi yakwe yaile kuli aliwe nu kumulanga ivikuulwa vya pi tempele.
2 Nawe wayanenyile ati: “Uzye imuvilola vyonsi vii? I cumi nkumunena ukuti patalashala nanti iwe lyonga api we lyuze, yonsi kwene yaloomolwa.”+
3 Lino Yesu watenzi pa Mwamba wa Miolivi, asambi yakwe yaile kuli aliwe nu kumuzya iyati: “Tunene, a lilaci lino ivintu vii vilacitika, nupya i cani icilaya icimanyililo ca kuyapo* kwako+ ni ca mpelelekezyo ya nsi?”*+
4 Yesu nawe wayaswike ati: “Cenjelini ukuti umwi ataca amuponzye,+
5 pano aingi yalizila umwi zina lyane nu kulanda iyati, ‘Nene Klistu,’ nupya yalaponzya aingi.+
6 Mulauvwa malyasi ya nkondo mu ncende izipusanepusane, lelo mukacenjele pakuti mutaca muvwe intete, pano ivintu vii vilinzile ukucitika lino impela itali ize.+
7 “Pano uluko lulakatukila uluko luze nu wene ulakatukila uwene uze,+ nupya kulaya ivipowe+ ni vilundumusi umu ncende zimwi zimwi.+
8 Vyonsi vii vilaya ali kutandika kwa macuzi aipishe aalaya wa ucuzi wa pa kupaapa.
9 “Lyene antu yalamucuzya+ nu kumukoma,+ nupya antu amu nko zyonsi yalamupata pa mulandu wi zina lyane.+
10 Nupya antu aingi yalata ukuya nu utailo, yalaafutuka auze nu kupatana.
11 Ya kasesema ya ufi aingi yalakatuka nu kuponzya antu aingi;+
12 nupya pa mulandu wakuti umpulamasunde ulavula, ukutemwa kwa yantu aingi kulacepa.
13 Lelo uwazizimizya ukufika nu ku mpela wene alapusuka.+
14 Ni lyasi lisuma lii ilya Wene lilasimikilwa umu nsi yonsi ukuya unte ku yantu amu nko zyonsi,+ lyene alino impela iliza.
15 “Fwandi lino mulalola ica winyi icikaleta uwononesi icalanzilwe ukupitila muli kasesema Danieli icimilila umu ncende ya muzilo,+ (aakubelenga alinzile ukwiluka),
16 lyene aalaya umu Yudeya yace yatandike ukuutukila uku myamba.+
17 Na wensi aalaya pi paala ataca aingile umu ng’anda umu kusenda iviya vyakwe,
18 nupya wensi aalaya umu calo ataca aswilile umu kusenda icakuzwala cakwe.
19 Kalanda uku yanaci aalaya pa ukulu alino na alaonsha umu manda yayo!
20 Mwapepa ukuti mutaca muutuke umu nsita ya mpepo nanti pa wanda wi Sabata;
21 pano kulaya ucuzi ukalamba+ utatala wayako ukufuma pa kutandika kwa nsi ukufika na ndakai, nupya utalatala uyeko.+
22 Nupya ukwaula ukucefya manda yayo, kusi umuntu aangapusuka; lelo pa mulandu na asoololwa, manda yayo yalacefiwa.+
23 “Lyene ndi cakuti ali wensi wamunena ukuti, ‘Lolini! Klistu ali kuno,’+ nanti, ‘Ali kuuku!’ mutaca muzumile.+
24 Pano ya Klistu ya ufi na ya kasesema ya ufi+ yalakatuka nu kucita ivimanyililo ivikalamba ni vizungusho kuti yaponzye antu,+ nupya nga cingacitika nu kuponzya na asoololwe kwene.
25 Lolini! namunenela calimwi.
26 Fwandi ndi cakuti antu yamunena ukuti, ‘Lolini! Ali umu lwanga,’ mutaca muyeko; nupya nga yati ‘Lolini! Ali umu muputule wa mukasi,’ mutaca muzumile.+
27 Wakwe vino inkuwa ikamyantula ukufuma uku ufumondaka ukuya uku uwondaka, avino nu kuyapo* ukwa Mwana wa muntu kulaya.+
28 Pano ukuli icitumbi, akuno na ya lyang’anda yakakolongana.+
29 “Pa cisila sile ica ucuzi wa manda yayo, ilanzi lilafiita,+ nu mwezi utalawala, nupya intanda zilaapona ukufuma umwi yulu, alino ni vya maka ivya mwi yulu vilatenkaana.+
30 Lyene icimanyililo ca Mwana wa muntu cilaloleka umwi yulu, nupya imitundu ya yantu yonsi pano nsi ilaya nu ulanda,+ nupya yalalola Umwana wa muntu+ akwiza na maka nu lulumbi ulukalamba ukufuma umu makumbi ya mwi yulu.+
31 Alaomvya iciunda icikulu ici penga pa kutuma ya malaika yakwe, nayo yalakolonganika asoololwe yakwe ukufuma umu ntunga 4 izya nsi, ukufuma ku mpela yi yulu nu kufika uku mpela yuze.+
32 “Lyene sambililini uku cilangililo ca muti wa masamvu: Lino watandika sile ukuleemba, mukamanya ukuti icisiku cili umupiipi.+
33 Namwe kwene lino mulalola ivintu vii vyonsi, muce mumanye ukuti ali apiipi, pa mulyango.+
34 I cumi nkumunena ukuti inkulo yii italapita kufikila ivintu vyonsi vii vikacitike.
35 Iyulu ni nsi vilapita, lelo mazwi yane yene yatalapita.+
36 Lelo ukulozya uku wanda uuwa ni nsita, kusi uwamanya,+ nanti sile aamalaika ya kwi yulu nanti Umwana, suka sile Tata.+
37 Pano wakwe vino cali mu manda yakwe Nowa,+ avino cilaya na lino Umwana wa muntu alayapo.*+
38 Viivi kwene vino cali mu manda yaya lino mulamba atali aize, antu yalyanga nu kumwa, yatwalanga nu kutwalwa, kufika na pa wanda uno Nowa wingile umu ciwato,+
39 nupya yatiisileko mano kufikila lino mulamba wizile ayasenda yonsi,+ vikwene avino cilaya na lino Umwana wa muntu alayapo.
40 Lyene aonsi yaili yalaya mu calo; wenga alasendwa nupya umuze alashala.
41 Anaci yaili yalaasha api we; wenga alasendwa nupya umuze alashala.+
42 Fwandi twalililini ukuya aiteyanye pano mutaamanya uwanda uno Umwene winu aliza.+
43 “Lelo manyini icintu conga: Ndi cakuti umwineco wa ng’anda watamanya insita ino umupuupu amaizilapo,+ atanga akasule nupya atanga aleke ukuti amwingilile umu ng’anda nu kumwiyila.+
44 Ali cino namwe kwene muiteyanye,+ pano Umwana wa muntu aliza pa nsita ino musikwenekela.
45 “Uzye lyene umuomvi mutailwe nupya uwa mano, wino umwene wakwe wasonsile ukuti aasakamala amu ng’anda yakwe nu kuyapeela ivyakulya pa nsita ilinge, a weni?+
46 U wa nsansa umuomvi wiyo ndi cakuti lino umwene wakwe aliza, alamuzana akuomba umulimo wakwe!+
47 I cumi nkumunena ukuti alamusonta ukuti asakamala ivyuma vyakwe vyonsi.
48 Lelo ndi cakuti umuomvi wiyo u mwipe nupya walanda umu mwenzo wati, ‘Umwene wane walengela,’+
49 nupya watandika ukuma aomvi yauze nu kulya alino nu kumwela pamwi na yano yamanyikwa ukuti aacakolwa,
50 umwene wa muomvi wiyo aliza pa wanda uno asikwenekela nupya pa nsita ino atamanyile,+
51 nupya alamufulula iciipishe nu kumwika pamwi na asomvi. Kuko u kulaya ukulila nu kulumanya incecete.+
Mafutunoti
^ Lolini Ulondolozi wa Mazwi.
^ Nanti “uwikazi.” Lolini Ulondolozi wa Mazwi.
^ Lolini Ulondolozi wa Mazwi.
^ Lolini Ulondolozi wa Mazwi.
