Tnejel a los Corintios 9:1-27

  • Kubʼ tqʼoʼn Pablo jun tbʼanel ejemplo tej tajbʼen te apóstol (1-27)

    • «Miʼn tzʼok tqʼoʼna bozal tiʼj ttziʼ wakx» (9)

    • «¡Lasmi nwitze qa mintiʼ ma txi nqʼamaʼne tbʼanel noticia!» (16)

    • Ok tqʼon tibʼ Pablo ik tzeʼn kye kykyaqil xjal (19-23)

    • In kyjukʼun kyibʼ kykyaqil qeju in che participarin toj carrera te chwinqlal (24-27)

9  ¿Nyapetzun tzaqpiʼn qine? ¿Nyapetzun jun apóstol qine? ¿Mintiʼpe ma tzʼok nkeʼyine Qajaw Jesús? ¿Nyapetzun aqeye waqʼunbʼene toj taqʼun Qajaw? 2  Maske nya apóstol qine toj kywitz txqantl, qʼuqli nkʼuʼje tiʼj qa apóstol qine toj kywitze. Porke aqeye waqʼunbʼene in tzaj tyekʼin qa axix tok jun apóstol qine in najbʼen te Qajaw. 3  Atzun tzaqʼwebʼil jlu kxel nqʼoʼne kye qeju in che yolin wiʼje. 4  ¿Mintiʼpe qoklene tuʼn qwaʼne ex tuʼn qkʼane? 5  ¿Mintiʼpe qoklene tuʼn tkanet jun qxuʼjile okslal* ex tuʼn t-xiʼ qukʼile ik tzeʼn in kybʼinchan mastl apóstol, qe titzʼin Qajaw ex Cefas?* 6  ¿Moqa oʼkxpe Bernabé ex aqine il tiʼj tuʼn qaqʼunane tuʼn qanqʼine? 7  ¿Alkye jun soldad in tzaj tlaqʼoʼn tukʼil tpwaq tkyaqilju at tajbʼen te akux in najbʼen te soldad? ¿Alkye jun xjal in kux tawaʼn tqan uva ex mintiʼ in xi tloʼn twitz? ¿Moqa alkye jun xjal in xqʼuqin kyiʼj alumaj ex mintiʼ in xi tkʼaʼn chʼin lech in nel kyiʼj? 8  ¿Kyyol xjalpe tkyaqilju ma txi nqʼamaʼne kyeye? ¿Nyapetzun axju in tzaj tqʼamaʼn Ley? 9  Porke tzʼibʼin jlu toj Tley Moisés: «Miʼn tzʼok tqʼoʼna bozal tiʼj* ttziʼ wakx akux in wabʼan tiʼj tqan awal». ¿Oʼkxpe kyiʼj wakx in ximen Dios? 10  ¿Moqa tuʼnju in ximen qiʼj xi tqʼoʼn ambʼil tuʼn kykubʼ tzʼibʼin yol lu? Ikju, tuʼnju in ximen qiʼj e kubʼ tzʼibʼin yol lu. Porke aju xjal in ararin* ex aju xjal in naqʼunan tuʼn tel twitz awal, in che aqʼunan porke qʼuqli kykʼuʼj tiʼj qa che wal tiʼj twitz awal. 11  Ax ikx qeye, qa ma kux qawaʼne tyol Dios toj kyanmiye, ¿nyapetzulo toj tumel tuʼn kyonine qiʼje tukʼilju at tajbʼen qeye? 12  Qa at kyoklen txqantl tuʼn t-xi kyqʼoʼne onbʼil kye, ¿nyapetzun mas nim qeye qoklen tuʼn kyonine qiʼje? Maske ikju, mintiʼ o tzʼajbʼen qoklene quʼne. Ex in nikʼx quʼne tuʼntzun miʼn tkubʼ qqʼoʼne jun tolsabʼl twitz tbʼanel noticia tiʼj Cristo. 13  ¿Nyapetzun ojtzqiʼn kyuʼne qa in che waʼn xinaq* in che aqʼunan toj templo tiʼjju in pon kyiʼn xjal ex qa at kyoklen qeju in che aqʼunan twitz altar tiʼjju in kubʼ qʼoʼn twitz altar? 14  Axju in bʼaj kyukʼil qeju in xi kyqʼamaʼn tbʼanel noticia, kyaj tqʼamaʼn Qajaw tuʼn kyanqʼin tiʼj tbʼanel noticia. 15  Pero naʼmx kyajbʼen jun maj onbʼil lu wuʼne. Ex mintiʼ in xi ntzʼibʼine jlu kyeye tuʼnju waje tuʼn ttzaj kyqʼoʼne jun tiʼ weye. Porke mas bʼaʼn toj nwitze tuʼn nkyime twitzju tuʼn tel qʼiʼn weye aju in jaw nnimsan wibʼe tiʼj. 16  Qa in xi nqʼamaʼne tbʼanel noticia, mintiʼ jun razón tuʼn tjaw nnimsan wibʼe tiʼj, porke il tiʼj tuʼn tbʼant wuʼne. ¡Lasmi nwitze qa mintiʼ ma txi nqʼamaʼne tbʼanel noticia! 17  Qa ma txi nbʼinchaʼne tukʼil tkyaqil nkʼuʼje, at jun chojbʼil weye. Qa ma txi nbʼinchaʼne maske nya wajbʼile, atzun il tiʼj tuʼn tbʼant wuʼne, porke o tzaj encargarin aqʼuntl lu weye. 18  Entonces, ¿alkye chojbʼil weye? Aju tuʼn t-xi nqʼamaʼne tbʼanel noticia noq kukx. Iktzun tten mlay chin ikʼe tibʼaj woklene o tzaj qʼoʼn te jun pakbʼal tiʼj tbʼanel noticia. 19  Porke, maske nya majen qine, ma tzʼok nqʼon wibʼe te kymajen kykyaqil xjal tuʼntzun kykambʼet nimku kyajlal wuʼne. 20  Kyukʼil judiy, ma tzʼok nqʼon wibʼe te judiy tuʼntzun kykambʼet judiy wuʼne. Kyukʼil qeju ateʼ tjaqʼ ley, ma tzʼok nqʼon wibʼe ik tzeʼn atine tjaqʼ ley tuʼntzun kykambʼet qeju ateʼ tjaqʼ ley wuʼne, maske mintiʼ atine tjaqʼ ley. 21  Kyukʼil qeju mintiʼ ley kyukʼil, ma tzʼok nqʼon wibʼe ik tzeʼn mintiʼ ley wukʼile, tuʼntzun kykambʼet qeju mintiʼ ley kyukʼil wuʼne, maske in chin ok lepeʼye tiʼj tley Dios ex atine tjaqʼ tley Cristo. 22  Kyukʼil qeju mintiʼ kyipumal, ma tzʼok nqʼon wibʼe ik tzeʼn mintiʼ wipumale tuʼntzun kykambʼet qeju mintiʼ kyipumal wuʼne. O tzʼok nqʼon wibʼe ik tzeʼn kye kykyaqil xjal ex o bʼant noq tiʼxku wuʼne tuʼntzun kyklet junjun kyxol. 23  In bʼant tkyaqil jlu wuʼne noq tuʼn tbʼanel noticia, tuʼntzun tok kybʼiʼn txqantl. 24  ¿Nyapetzun ojtzqiʼn kyuʼne qa oʼkx jun xjal in kambʼan tiʼj premio toj jun carrera maske nim qe in che correrin? Entonces che correrine tuʼn kykʼambʼane. 25  Kykyaqil qeju in che participarin toj jun competencia, in kyjukʼun kyibʼ toj tkyaqil. In bʼant jlu kyuʼn noq tuʼn ttzaj qʼoʼn jun corona kye aju in kubʼ tzqij. Atzun qe, in bʼant jlu quʼn tuʼn ttzaj qʼoʼn jun corona qe aju mintiʼ in kubʼ tzqij. 26  Axtzun razón jlu tiquʼn ax ikx weye in chin correrine, tuʼnju ojtzqiʼn wuʼne qa at jun meta. Ex ik tzeʼn qeju in che qʼojin, mintiʼ in chin bʼujine toj kyqʼiqʼ. 27  Sino in bʼaj ngolpearine wibʼe* ex in nok nqʼoʼne nxmilale te nmajene, tuʼntzun miʼn wel ikʼune tuʼn Dios otoqxi txi nqʼoʼne xnaqʼtzbʼil kye txqantl.

Tqanil

^ Moqa «jun ermana quʼne tuʼn tok te qxuʼjile».
^ Ax ikx, Pedro juntl tbʼi.
^ Toj junjuntl lugar «miʼn tzʼok tmaqsina», «miʼn tzʼok ttpotzina».
^ Toj junjuntl lugar «in chʼokin».
^ Toj junjuntl lugar «ichan».
^ Moqa «in bʼaj ncastigarin wibʼe».

Copyrights tiʼj uʼj lu