Tnejel a los Corintios 2:1-16
2 Tuʼntzunju, tej npone kyukʼile erman, nya kyukʼil nimaq yol ex nya tukʼil nimaq nabʼil xi nyekʼine kyeye aju yol ewintoq tnejel tuʼn Dios.
2 Porke tej ntene kyukʼile, kubʼ nximane tuʼn miʼn nyoline tiʼj juntl tiʼ, noq oʼkx tiʼj Jesucristo ex tiʼj tzeʼn kyim twitz tzeʼ.
3 Mintiʼtoq wipumale tej npone kyukʼile, in chin xobʼe ex nim in tzaj luʼlune.
4 Ex tej nyoline kyukʼile ex tej t-xi nqʼamaʼne tqanil kyeye, mintiʼ e ajbʼen tbʼanel yol wuʼne ik tzeʼn kye xjal at kynabʼil, noq oʼkx kubʼ kyyekʼin nyole aju tipumal espíritu santo.*
5 Tuʼntzun tok qeʼ kykʼuʼje tiʼj tipumal Dios ex nya tiʼj kynabʼil xjal.
6 Atzun qe, in qo yolin tiʼj nabʼil kyxol qeju ma che chʼiy toj kyokslabʼil. Pero nya tiʼj kynabʼil xjal te ambʼil jaʼlo,* ni tiʼj kynabʼil qeju in che kawin twitz txʼotxʼ, aqeju chʼix kynaj.
7 Sino in qo yolin tiʼj tnabʼil Dios, toj juntl yol, aju yol ewintoq tnejel, aju nabʼil ewin, aju kubʼ t-ximen Dios atxix ojtxe tuʼntzun qjaw nimsaʼn.
8 Atzun nabʼil lu mintiʼ ok tojtzqiʼn nijun kyxol qeju in che kawin twitz txʼotxʼ. Porke noqwit ok kyojtzqin, mintiʼwtlo jaw kyqʼoʼn Qajaw twitz tzeʼ, aju Qajaw nim toklen.
9 Ik tzeʼn kyaj tzʼibʼin toj tyol Dios: «Aju bʼajx tzʼok tkeʼyin jun xjal, aju bʼajx tzʼok tbʼiʼn, ex aju bʼajx kubʼ t-ximen toj tanmi, atzunju o kubʼ tbʼinchaʼn Dios kye qeju at kykʼujlabʼil tiʼj».
10 Pero o tzaj tyekʼin Dios tkyaqil jlu qe noq tuʼn tonbʼil espíritu santo. Porke in tzaj tyekʼin espíritu santo tkyaqil, axpe ikx aju tnabʼil Dios mintiʼ in nel qnikʼ tiʼj.
11 Porke, ¿alkye jaku tzʼel tnikʼ tiʼj t-ximbʼetz juntl xjal? Tuʼnju oʼkxte ojtzqilte tiʼ tkuʼx toj tanmi. Axju in bʼaj tukʼil Dios, mi aʼl jun xjal jaku tzʼel tnikʼ tiʼj t-ximbʼetz, oʼkx qa ma tzaj tyekʼin espíritu santo te.
12 Atzun qe, mintiʼ atoʼ tjaqʼ tipumal kyximbʼetz xjal, sino atoʼ tjaqʼ tipumal espíritu santo, tuʼntzun tel qnikʼ tiʼjju ma tzaj tqʼoʼn Dios qe tuʼn tkyaqil tkʼuʼj.
13 Ax ikx, in qo yolin tiʼj tkyaqil jlu, pero nya kyukʼil yol in tzaj t-xnaqʼtzaʼn kynabʼil xjal. In che ajbʼen yol quʼn, aju o tzaj t-xnaqʼtzaʼn espíritu santo qe, tuʼn qyolin kyiʼj xnaqʼtzbʼil at kyoklen tukʼil Dios.
14 Pero alkye in nok lepeʼ tiʼj kyximbʼetz xjal, mintiʼ in xi tokslaʼn aju in tzaj tyekʼin espíritu santo, porke mintiʼ ttxolil toj twitz. Ex mlay tzʼel tnikʼ tiʼj, porke oʼkx jaku tzʼel tnikʼ tiʼj tuʼn tonbʼil espíritu santo.
15 Atzunte xjal at tjaqʼ tipumal espíritu santo in nel tnikʼ tiʼj tkyaqil, pero mi al jun jaku tzʼel tnikʼ tiʼj.
16 Porke, «¿alkye o tzʼel tnikʼ tiʼj tnabʼil Jehová* tuʼn t-xi tqʼoʼn xnaqʼtzbʼil te?». Atzun qe at tnabʼil Cristo qukʼil.
Tqanil
^ Moqa «xewbʼaj xjan».
^ Qʼonka twitza kyiʼj yol ambʼil jaʼlo toj diccionario.
^ Qʼonka twitza tiʼj xnaqʼtzbʼil A5.
