Tnejel a los Corintios 5:1-13
5 Nya oʼkxju, ax ikx ma tzaj qʼamaʼn weye qa at jun xinaq* kyxole in yaẍin.* In nanqʼin* tukʼil t-xuʼjil tman, ex aju il in kubʼ tbʼinchaʼn ni siquiera in nok qbʼiʼn kyxol qeju nya okslal qeʼ.*
2 Qa ikju, ¿tiquʼntzun in jaw kynimsan kyibʼe? ¿Nyapetzun iltoq tiʼj tuʼn ttzaj kybʼise tuʼn jlu ex tuʼn tex kyiʼne xinaq in bʼinchan il kyxole?
3 Ax tok, maske mintiʼ atine kyukʼile, at wanmiye kyukʼile ex o tzʼel nnikʼe tiʼj qa o bʼinchan xinaq lu il, ik tzeʼn noqwit atine kyukʼile.
4 Tuʼntzunju, jaʼlo que ya ojtzqiʼn kyuʼne qa at wanmiye kyukʼile ex qa at tipumal Qajaw Jesús kyukʼile, aj tok kychmon kyibʼe toj tbʼi Qajaw Jesús,
5 kyqʼonxe xinaq lu toj tkwent Satanás tuʼn tnaj il* o tzʼokx tiʼn kyxole ex tuʼn tok t-xqʼuqin tibʼ congregación tiʼj il tzmaxi aj tul Qajaw.
6 Nya bʼaʼn tuʼn tjaw kynimsan kyibʼe. ¿Mintiʼpe ojtzqiʼn kyuʼne qa in jaw mal tkʼuʼj tkyaqil tqʼotjil pan noq tuʼn chʼin levadura?
7 Kyiʼmexe ojtxe levadura kyxole tuʼntzun kyoke te jun akʼaj qʼotj mintiʼ levadura toj, porke ik kytene ik tzeʼn qʼotj mintiʼ levadura toj. Porke o kubʼ bʼyoʼn Cristo tuʼn tchjet qil ik tzeʼn rit* in kubʼ bʼyoʼn tuʼn tkubʼ ikʼset Pascua.
8 Tuʼntzunju, aj tkubʼ qikʼsaʼn fiesta, miʼn tzʼajbʼen ojtxe levadura quʼn ni aju levadura in kubʼ techlaʼn il ex nya bʼaʼn. Sino qo waʼn tiʼj pan mintiʼ levadura toj aju in kubʼ techlaʼn aju bʼaʼn ex aju axix tok.
9 Xi ntzʼibʼine jun carta kyeye jatumel xi nqʼamaʼne kyeye tuʼn miʼn tok kymojbʼan kyibʼe* kyukʼil qeju in che yaẍin.*
10 Pero kyukʼil yol lu nyatoq waje tuʼn t-xi nqʼamaʼne kyeye tuʼn tel kypan kyibʼe te jumajx kyiʼj xjal, aqeju in che yaẍin,* aqeju in pon kykʼuʼj tiʼjju at te juntl, aqeju in che extorsionarin ex aqeju in che kʼulun kywitz imagen. Porke noqwit ikju, ilwitlo tiʼj tuʼn kyikʼe tzalu twitz txʼotxʼ.
11 Jaʼlo, in xi ntzʼibʼine kyeye tuʼn miʼn tok kymojbʼan kyibʼe* kyukʼil qeju erman kybʼi, pero in che yaẍin,* in pon kykʼuʼj tiʼjju at te juntl, in che kʼulin kywitz imagen, in che yasun,* in che kʼan nim qʼeʼn moqa in che extorsionarin. Ni siquiera che waʼne junx tukʼil.
12 Porke, ¿tiʼ woklene at tuʼn kykubʼ njuzgarine xjal? ¿Nyapetzun aqeye at kyoklen tuʼn tkubʼ kyjuzgarine qeju okslal qe,
13 atzunte Dios qeju nya okslal qe? «Kyimexe xjal in bʼinchan il kyxole».
Tqanil
^ Toj junjuntl lugar «ichan».
^ Toj griego pornéia. Qʼonka twitza tiʼj diccionario.
^ Toj griego «At».
^ Moqa «kyxol nasyon».
^ Toj griego «tuʼn tnaj chibʼj».
^ Toj junjuntl lugar «ẍneʼl», «carner».
^ Moqa «kyamiwen kyibʼe».
^ Qʼonka twitza kyiʼj yol yaẍbʼil, aj pajil toj diccionario.
^ Qʼonka twitza kyiʼj yol yaẍbʼil, aj pajil toj diccionario.
^ Moqa «kyamiwen kyibʼe».
^ Qʼonka twitza kyiʼj yol yaẍbʼil, aj pajil toj diccionario.
^ Moqa «jun xjal in nok tbʼinchaʼn nya bʼaʼn kyiʼj txqantl tukʼil tyol».
