Tnejel a los Corintios 4:1-21
4 Qajbʼile tuʼn tel kynikʼ kykyaqil xjal tiʼj qa onil qoʼye tiʼj Cristo ex qa mayordom qoʼye tiʼj yol ewintoq tuʼn Dios tnejel.
2 Ex atzun kye mayordom, il tiʼj tuʼn tkyaj bʼant kyaqʼun.
3 Porke nya nim toklen toj nwitze qa ma chin ok juzgarine kyuʼne moqa kyuʼn xjal, porke nixpe aqin weye in kubʼ njuzgarin wibʼe.
4 Porke ojtzqiʼn wuʼne qa mintiʼ jun nya bʼaʼn o kubʼ nbʼinchaʼne, pero nya tuʼn jlu in xi nqʼamaʼne qa tzʼaqli qine. Porke oʼkxte Jehová* jaku tzaj qʼamante qa at wile moqa miʼn.
5 Tuʼntzunju, miʼn che yoline nya bʼaʼn tiʼj juntl naʼmxtoq tpon tqʼijlalil. Porke aj tul Qajaw, tzul tyekʼin aju ewin toj qlolj ex kʼelel toj qʼanchaʼl tuʼn aju tkuʼx toj kyanmi xjal. Ex tzul tqʼoʼn Dios nimbʼil kye ik tzeʼnx kybʼinchbʼen.
6 Aqeye erman, ma tzʼok nqʼon wibʼe tukʼil Apolos te jun ejemplo tuʼn tel kynikʼe tiʼjju in chin yoline tiʼj ex tuʼn tajbʼen kyeye, tuʼntzun tel kykanoʼne jlu qiʼje: «Miʼn che ikʼe tibʼaj ju o kyaj tzʼibʼin». Qa ma bʼant jlu kyuʼne, mlay jaw kynimsan kyibʼe ex mlay txi kyqʼamaʼne qa mas bʼaʼn jun xjal twitz juntl.
7 ¿Porke tiʼ at teya tuʼn tkubʼ t-ximana qa mas nim toklena kywitz txqantl? ¿Nyapetzun a Dios ma tzaj qʼonte tkyaqilju at teya? Ex qa ma tzaj tqʼoʼn Dios tkyaqilju at teya, ¿tiquʼn in jaw tnimsan tibʼa ik tzeʼn tuʼna o kanet?
8 ¿In kubʼpe kyximane qa ya at tkyaqilju at tajbʼen kyeye? ¿In kubʼpe kyximane qa ma che oke te qʼinun? ¿In kubʼpe kyximane qa ya o txi tzyet tuʼn kykawine? Bʼaʼnwtlo noqwit ikju, porke ax ikx qeye owtlo txi tzyet tuʼn qkawine kyukʼile.
9 Porke toj nwitze, aqoʼye apóstol, ma qo kyaj qʼoʼne de último tuʼn Dios te kykeʼybʼitz* xjal, porke o kubʼ qʼoʼn qsentense tuʼn qkubʼ bʼyoʼne. In nok kyqʼoʼn kywitz kykyaqilx qiʼje, qe anjel ex qe xjal.
10 In qo ok qʼoʼne te mintiʼ qnabʼile noq tuʼn Cristo, atzun kyeye in che ok qʼoʼne te at kynabʼle noq tuʼn Cristo. Mintiʼ qipumale, atzun kyeye at kyipumale. In che jaw nimsaʼne, atzun qeye in qo el ikʼune.
11 Kukx in nikʼx weʼyaj ex kʼaj quʼne, nya nim qxbʼalune at,* in qo bʼaj golpearine ex mintiʼ qjaye.
12 In qo aqʼunane kyuw tukʼil qqʼabʼe. Aj qbʼaj yasune kyuʼn xjal, in che kubʼ qkʼiwlaʼne. Aj kyok lipen qiʼje, in nikʼx quʼne tukʼil pasens.
13 Aj t-xi kyqʼamaʼn nya ax tok yol tuʼn ttzaj nya bʼaʼn qiʼje, in xi qtzaqʼweʼne kye toj tumel. Hasta jaʼlo, ik qoʼye toj kywitz xjal ik tzeʼn tzʼis at twitz txʼotxʼ, ik tzeʼn jun tiʼ mintiʼ tajbʼen.
14 Mintiʼ in xi ntzʼibʼine jlu kyeye tuʼn ttzaj kychʼixwiye, noq oʼkx tuʼn t-xi nqʼoʼne kynabʼle, porke in che oke ik tzeʼn qe nkʼwale kʼujlaʼn wuʼne.
15 Porke maske ma ten 10 mil xnaqʼtzal kyeye tiʼj Cristo, nya nim kymane at. Aqine ma chin ok te kymane porke ma txi nqʼamaʼne tbʼanel noticia kyeye tiʼj Cristo Jesús.
16 Tuʼntzunju, in chin kubʼsane kywitze tuʼn tel kykanoʼne wiʼje.
17 Tuʼntzun jlu ma txi nsamaʼne Timoteo kyukʼile aju nkʼwale kʼujlaʼn wuʼne ex in najbʼen te Qajaw tukʼil tkyaqil tkʼuʼj. Kxel tnaʼn kyeye aju in bʼant wuʼne* toj wajbʼebʼile te Cristo Jesús, aju xnaqʼtzbʼil in xi nqʼoʼne toj teyele junjun congregación noq jachaq in chin ikʼe.
18 Porke ateʼ junjun kyxole in jaw kynimsan kyibʼ tuʼnju in kubʼ kyximen qa mlay chin pone keʼyil kyeye.
19 Pero qa tajbʼil Jehová,* chin pole kyukʼile toj chʼintl ambʼil ex waje tuʼn tok nkeʼyine qeju in jaw kynimsan kyibʼ, pero nya tuʼn tok nbʼiʼne aju in kyqʼamaʼn, sino tuʼn tel nnikʼe tiʼj qa at tipumal Dios kyukʼil moqa miʼn.
20 Porke nya tukʼil qyol in qʼanchaʼlix qa in qo nimen te Tgobierno Dios,* sino tukʼil qbʼinchbʼen, atzunju in tzaj tyekʼin qa at tipumal Dios qukʼil.
21 ¿Tiʼ kyajbʼile? ¿Kyajbʼile tuʼn npone kyukʼile tuʼn kybʼaj nkawine, moqa tuʼn woke mans kyukʼile ex tuʼn tkubʼ nyekʼine nkʼujlabʼile kyiʼje?
