Tnejel a los Corintios 10:1-33

  • Junjun tiʼ bʼaj toj kyanqʼibʼil israelita in nok te jun xnaqʼtzbʼil te qe (1-13)

  • «Kyxqʼuqink kyibʼe tuʼn miʼn kykʼuline kywitz imagen» (14-22)

    • Aju tmes Jehová ex aju kymes demonio (21)

  • Aju qoklen o tzaj qʼoʼn tuʼn tkubʼ qximan tiʼ tuʼn tbʼant quʼn ex tuʼn qximen kyiʼj txqantl (23-33)

    • «Kybʼinchame tkyaqil tuʼn tjaw kynimsaʼne Dios» (31)

10  Aqeye erman, wajbʼile tuʼn ttzaj kynaʼne qa e bʼet kykyaqil ojtxe qyajil tjaqʼ muj ex qa e ikʼx kykyaqil toj mar. 2  Kykyaqil e bautisarin tej kyok lepeʼ tiʼj Moisés, tjaqʼ muj ex tej kyikʼx toj mar. 3  Kykyaqil e waʼn tiʼj axju wabʼj tzaj tqʼoʼn Dios kye. 4  Ex kykyaqil e kʼan tiʼj axju kʼabʼj tzaj tqʼoʼn Dios kye. Porke kykyaqil e kʼan tiʼj aʼ etz toj abʼj* tzaj tqʼoʼn Dios kye. Aju abʼj lu bʼet kyukʼil, atzun Cristo. 5  Pero nya kykyaqil tzalaj Dios kyuʼn, porke chʼixme e kubʼ tbʼyoʼn Dios kykyaqil toj desierto. 6  Tkyaqilju bʼaj kyiʼj jun ejemplo te qe, tuʼntzun miʼn tpon qkʼuʼj tuʼn tkubʼ qbʼinchaʼn nya bʼaʼn ik tzeʼn kye. 7  Ax ikx, miʼn qo kʼulin kywitz imagen ik tzeʼn bʼant kyuʼn junjun kye, porke in tqʼamaʼn tyol Dios jlu: «E kubʼ qeʼ xjal wal ex kʼal, ex yajxitl e jaw weʼ tuʼn kytzalaj». 8  Ex miʼn qo yaẍin,* ik tzeʼn junjun kye e yaẍin,* tuʼntzunju, toj junx qʼij e kyim 23 mil xjal kyxol. 9  Ax ikx, miʼn tzʼok qqʼoʼn Jehová* toj prueba ik tzeʼn bʼant kyuʼn junjun kye, ex yajxitl e kyim kyuʼn kan.* 10  Ax ikx, miʼn tzaj qyol tiʼj Dios ik tzeʼn bʼant kyuʼn junjun kye, ex yajxitl e kubʼ bʼyoʼn tuʼn jun anjel.* 11  Tkyaqilju bʼaj kyiʼj jun ejemplo te qe, ex e kyaj tzʼibʼin toj tyol Dios te qʼobʼil qnabʼil, porke ma qo pon kanun kyoj mankbʼil tqʼijlalil tiʼj ambʼil jaʼlo.* 12  Tuʼntzunju, alkye in kubʼ t-ximen qa waʼl taʼ, xqʼuqink tibʼ tuʼn miʼn tkubʼ tzʼaq. 13  Porke aqeju nya bʼaʼn in che ok weʼye twitz, aʼyexju in che ok weʼ kykyaqil xjal twitz. Pero jaku tzʼok qeʼ qkʼuʼj tiʼj Dios, ex mlay txi tqʼoʼn ambʼil tuʼn kyok weʼye twitz jun nya bʼaʼn aju mlay tzikʼx kyuʼne. Aj kyok weʼye twitz jun nya bʼaʼn, tzul tyekʼin Dios kyeye tzeʼn tuʼn kyexe twitz ex kʼonil kyiʼje tuʼn tikʼx kyuʼne. 14  Tuʼntzunju, aqeye erman kʼujlaʼn wuʼne, kyxqʼuqink kyibʼe tuʼn miʼn kykʼuline kywitz imagen. 15  In chin yoline kyukʼile ik tzeʼn kyukʼil xjal at kynabʼil, tuʼntzunju, che ximane tiʼj qa bʼaʼn aju kxel nqʼamaʼne kyeye moqa nya. 16  Aj tel qkʼaʼn tiʼj copa in xi qqʼoʼn chjonte te Dios tiʼj, ¿mintiʼpe in qo participarin tiʼj tchkʼel Cristo? Aj t-xi qwaʼn pan in kubʼ qpiẍun, ¿mintiʼpe in qo participarin tiʼj t-xmilal Cristo? 17  Oʼkx jun pan at, tuʼntzunju, maske nim qbʼet, junx qxmilal at, porke qkyaqilx in qo waʼn tiʼj pan lu. 18  Che ximane kyiʼj israelita. ¿Mintiʼpe e participarin tiʼjju kubʼ qʼoʼn twitz altar tej kywaʼn kyiʼj sacrificio? 19  ¿Tiʼ wajbʼile tuʼn t-xi nqʼamaʼne kyeye kyukʼil yol lu? ¿Wajbʼilpeye tuʼn t-xi nqʼamaʼne kyeye qa at toklen jun imagen ex qa at toklen sacrificio in kubʼ qʼoʼn twitz? 20  Nya ikju. Sino wajbʼile tuʼn t-xi nqʼamaʼne kyeye qa kykyaqil qeju sacrificio in kubʼ kyqʼoʼn qeju nya okslal, in kubʼ kyqʼoʼn kywitz demonio ex nya twitz Dios. Ex nya wajbʼile tuʼn tten kyoklene kyukʼil demonio. 21  Mlay bʼant tuʼn tel kykʼaʼne tiʼj tvas Jehová* ex tiʼj kyvas demonio. Ax ikx, mlay bʼant tuʼn kywaʼne tiʼj «tmes Jehová»* ex tiʼj kymes demonio. 22  Moqa, ¿‹qajbʼilpe tuʼn ttzaj tqʼoj Jehová* quʼn›? ¿Maspe nim qipumal twitz? 23  Tkyaqil jaku bʼant quʼn, pero nya tkyaqil jaku tzaj tiʼn bʼaʼn qe. Tkyaqil jaku bʼant quʼn, pero nya tkyaqil jaku qo chʼiy toj qokslabʼil tuʼn. 24  Nya oʼkx che ximane tiʼjju bʼaʼn te kyeye, sino ax ikx che ximane tiʼjju bʼaʼn kye txqantl. 25  Tkyaqil chibʼj in kʼayinjtz toj carnicería bʼaʼn tuʼn t-xi kychyoʼne. Ex miʼn che xjeline jatumel ma tzaj, ax ikx miʼn kubʼ kynaʼne bʼis toj kyanmiye. 26  Porke «tete Jehová* txʼotxʼ ex tkyaqilju at twitz». 27  Qa ma che txkonjtze tuʼn jun xjal nya okslal tuʼn kyxiʼye wal tukʼil ex kyajbʼile tuʼn kyxiʼye, kychyoʼnxe tkyaqilju kbʼel qʼoʼn kywitze, miʼn che xjeline jatumel ma tzaj, ax ikx miʼn kubʼ kynaʼne bʼis toj kyanmiye. 28  Pero qa ma txi tqʼamaʼn jun xjal jlu kyeye, «Ma kubʼ qʼoʼn chibʼj lu te jun sacrificio kywitz imagen», miʼn txi kychyoʼne. Miʼn txi kychyoʼne tuʼn miʼn tkubʼ tzʼaq xjal xqʼamante kyeye ex tuʼn miʼn tkubʼ kynaʼn txqantl bʼis toj kyanmi. 29  Nya kyiʼje in chin yoline, sino kyiʼj txqantl. Porke maske tzaqpiʼn qine tuʼn tkubʼ nbʼinchaʼne tiʼ wajbʼile, ¿tiquʼntzun kbʼel nbʼinchaʼne jun tiʼ aju nya bʼaʼn in nela toj twitz juntl? 30  Qa ma txi nqʼoʼne chjonte tiʼjju in xi nwaʼne, ¿tiquʼntzun che yolil txqantl nya bʼaʼn tiʼjju in xi nqʼoʼne chjonte tiʼj? 31  Tuʼntzunju, qa in che waʼne ex qa in che kʼane moqa in bʼant alkyexku juntl tiʼ kyuʼne, kybʼinchame tkyaqil tuʼn tjaw kynimsaʼne Dios. 32  Miʼn che oke te jun tolsabʼil kye xjal judiy, kye griego ex kye kykyaqil okslal ateʼ toj tcongregación Dios. 33  Ik tzeʼn weye, mintiʼ in chin jyone tiʼjju bʼaʼn te weye, sino in chin jyone tiʼjju bʼaʼn kye txqantl. In nok tilil wuʼne tuʼn tel bʼaʼn tkyaqilju in bʼant wuʼne toj kywitz kykyaqil tuʼntzun kyklet.

Tqanil

^ Toj junjuntl lugar «pik».
^ Qʼonka twitza tiʼj diccionario.
^ Qʼonka twitza tiʼj diccionario.
^ Qʼonka twitza tiʼj xnaqʼtzbʼil A5.
^ Toj junjuntl lugar «labʼaj», «lobʼaj».
^ Toj griego «tuʼn najsal».
^ Qʼonka twitza kyiʼj yol ambʼil jaʼlo toj diccionario.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.

Copyrights tiʼj uʼj lu