Tnejel a los Corintios 13:1-13
-
Mintiʼ juntl tiʼ mas nim toklen twitz kʼujlabʼil (1-13)
13 Qa in chin yoline toj junxichaq kyyol xjal moqa toj kyyol anjel, pero mintiʼ nkʼujlabʼile, ik qine ik tzeʼn jun gong noq in qʼajt moqa ik tzeʼn jun platillo noq in bʼinchan bulla.*
2 Qa o tzaj qʼoʼn woklene tuʼn nprofetizarine ex tuʼn tel nnikʼe tiʼj tkyaqil tyol Dios ewintoq tnejel, qa ojtzqiʼn tkyaqil wuʼne, ex qa at nim wokslabʼile aju jaku che yukch witz tuʼn, pero qa mintiʼ nkʼujlabʼile, mintiʼ wajbʼene.
3 Qa in xi nqʼoʼne tkyaqilju at weye tuʼn kywan txqantl, ex qa in xi nqʼoʼne nchwinqlale tuʼn tjaw nnimsan wibʼe, pero mintiʼ nkʼujlabʼile, mintiʼ tajbʼen tkyaqilju in bʼant wuʼne.
4 Aju xjal at tkʼujlabʼil, at tpasens ex tbʼanel tmod. Nya celoso. Mintiʼ in yolin bʼaʼn tiʼjx, mintiʼ in jaw tnimsan tibʼ,
5 nya kyuw, nya oʼkx in ximen tiʼjx, nya jurat in tzaj tqʼoj. Mintiʼ in xi tkʼuʼn qʼoj.
6 Mintiʼ in tzalaj tiʼjju nya bʼaʼn, sino oʼkx in tzalaj tiʼjju axix tok.
7 Tkyaqil ipaʼn tuʼn, tkyaqil in xi tokslaʼn, tkyaqil ayon tuʼn, tkyaqil in nikʼx tuʼn.
8 Aju kʼujlabʼil mlayx bʼaj.* Atzun kye oklenj o che tzaj qʼoʼn qe tuʼn qprofetizarin, tuʼn qyolin kyoj junxichaq yol,* ex tuʼn tten qojtzqibʼil, ok che bʼajel.
9 Porke noq chʼin qojtzqibʼil at jaʼlo ex aju in qo profetizarin tiʼj noq chʼin.
10 Pero aj tel qnikʼ tiʼj tkyaqil, ya mlay qo tentl noq chʼin qojtzqibʼil.
11 Tej kʼwalxtoq qine, in yoline ik tzeʼn jun kʼwal, iktoq nnabʼle ik tzeʼn jun kʼwal ex in ximane ik tzeʼn jun kʼwal. Pero jaʼlo que ya ma chin oke te jun xinaq,* ya mintiʼ in xi nbʼinchaʼne aju in bʼant tuʼn jun kʼwal.
12 Porke jaʼlo, nyaxix klar aju in nok qkeʼyin, ik tzeʼn aju in nok qkeʼyin toj jun espej te kʼuxbʼil. Pero yajxitl qo keʼyil bʼaʼn, ik tzeʼn aj tok qkeʼyin qwitz tukʼil jun xjal. Jaʼlo noq chʼin wojtzqibʼile at, pero yajxitl kʼokel wojtzqiʼne tkyaqil ik tzeʼn tojtzqibʼil Dios at wiʼje.
13 Pero at oxe tiʼ kukx ktel: aju qokslabʼl, aju qʼuqbʼil qkʼuʼj ex aju kʼujlabʼil. Pero aju mas nim toklen kyxol jlu, aju kʼujlabʼil.
