Tnejel a los Corintios 8:1-13
8 Jaʼlo, chin yolile kyukʼile tiʼj wabʼj in kubʼ qʼoʼn kywitz imagen, jun tqanil ojtzqiʼn quʼn qkyaqilx. Pero miʼn tzikʼ tnaʼl kyuʼne qa jaku jaw qnimsan qibʼ tuʼn ojtzqibʼil, atzunju kʼujlabʼil in qo chʼiy tuʼn.
2 Porke qa at jun xjal in kubʼ t-ximen qa at tojtzqibʼil, naʼmx telxix tnikʼ tiʼjju in tqʼamaʼn qa tojtzqiʼn.
3 Pero qa at jun xjal kʼujlaʼn Dios tuʼn, ojtzqiʼn xjal lu tuʼn Dios.
4 Atzunju tuʼn t-xi qwaʼn wabʼj in kubʼ qʼoʼn kywitz imagen, ojtzqiʼn quʼn qa mintiʼ toklen jun imagen tzalu twitz txʼotxʼ ex qa oʼkx jun Dios at.
5 Porke in kubʼ kyximen xjal qa ateʼ nim dios toj kyaʼj ex tzalu twitz txʼotxʼ. Tuʼntzunju, toj kywitz xjal ateʼqe nim «dios» ex ateʼqe nim «kyajaw».
6 Atzun qe toj qwitz, oʼkx jun Dios at, aju Mambʼaj. Atz tukʼil in tzaj tkyaqil ex o qo kubʼ tbʼinchaʼn tuʼn tbʼant tajbʼil quʼn. Ax ikx, oʼkx jun Qajaw at, aju Jesucristo, aju ajbʼen tuʼn Dios tuʼn tbʼant tkyaqil ex noq tuʼn itzʼ qoʼ.
7 Pero nya kykyaqil ojtzqiʼn jlu kyuʼn. Tuʼnju ateʼ junjun e kʼulin kywitz imagen ojtxe, aj t-xi kywaʼn wabʼj in kubʼ qʼoʼn kywitz imagen, in kubʼ kyximen qa kukx in che kʼulin kywitz imagen. Ex tuʼnju nya kyuw kynabʼil, in bʼaj tzʼilix.
8 Pero mintiʼ in qo ok laqʼeʼ mas ttxlaj Dios tuʼn wabʼj. Qa mintiʼ ma qo waʼn, mlay naj jun tiʼ qe. Ex qa ma qo waʼn, mlay qo ten mas bʼaʼn.
9 Pero kyxqʼuqink kyibʼe tuʼn miʼn kykubʼ tzʼaq qeju nya kyuw kynabʼil noq tuʼnju tzaqpiʼn qeye tuʼn tkubʼ kyximane tiʼ tuʼn t-xi kybʼinchaʼne.
10 Porke qa ma tzʼok keʼyina tuʼn jun erman nya kyuw tnabʼil, aya at tnabʼl, qʼuqla in waʼna toj kyja imagen, ¿mlaypetzulo pon tkʼuʼj erman tuʼn t-xi twaʼn wabʼj in kubʼ qʼoʼn kywitz imagen, aju junxitl twitzju in tqʼamaʼn tnabʼil?
11 Tuʼntzunju, noq tuʼn tojtzqibʼila, jaku tzʼel tzpet termana nya kyuw tnabʼil, aju kyim Cristo tuʼn tpaj.
12 Ex aj tok kybʼinchaʼne nya bʼaʼn tiʼj kyermane kyjalu ex tiʼj kynabʼil nya kyuw, in nok kybʼinchaʼne nya bʼaʼn tiʼj Cristo.
13 Tuʼntzunju, qa noq tuʼn wabʼj in xi nwaʼne in kubʼ tzʼaq wermane, mlayx txi nchyoʼne chibʼj juntl maj, tuʼntzun miʼn tkubʼ tzʼaq wermane wuʼne.
