Tnejel a los Corintios 15:1-58

  • Tej tjaw anqʼin Cristo (1-11)

  • Jaku ten qokslabʼil noq tuʼnju che jawil anqʼin kyimni (12-19)

  • Tzaj tqʼoʼn Dios jun garantía qe tej tjaw anqʼin Cristo tuʼn (20-34)

  • «At jun qxmilal te chibʼj ex bʼaq, ax ikx at jun qxmilal kubʼ bʼinchaʼn tuʼn tanqʼin toj kyaʼj» (35-49)

  • Aju qxmilal mlayx kyim ex aju qxmilal mlay kubʼ qʼay (50-57)

  • «Kukx che aqʼunane toj taqʼun Qajaw» (58)

15  Aqeye erman, jaʼlo chin yolile kyukʼile kyiʼj tbʼanel noticia xi nqʼamaʼne kyeye. Aqeju tbʼanel noticia xi kyokslaʼne ex kukx in nok qeʼ kykʼuʼje tiʼj. 2  Kyuʼn tbʼanel noticia lu, ma che klete, pero oʼkx qa kukx ma tzʼok qeʼ kykʼuʼje tiʼj. Si no, noqx gan ma che okslane. 3  Porke kyxol tnejel xnaqʼtzbʼil xi nyekʼine kyeye, ax ikx xi nyekʼine kyeye aju otoq tzʼel nnikʼe tiʼj. Xi nyekʼine kyeye qa kyim Cristo tuʼn tchjet qil, ik tzeʼn in tzaj tqʼamaʼn tyol Dios, 4  qa kux maquʼn, ex qa jaw anqʼin toj toxin qʼij, ik tzeʼn in tzaj tqʼamaʼn tyol Dios, 5  ex qa kubʼ tyekʼin tibʼ twitz Cefas* ex yajxitl kywitz qeju Doce. 6  Yajxitl kubʼ tyekʼin tibʼ kywitz mas te 500 erman otoq tzʼok kybʼuyin kyibʼ. Nim qe kyxol, itzʼ qex jaʼlo, pero ateʼ junjuntl o che kyim. 7  Ax ikx kubʼ tyekʼin tibʼ twitz Santiago ex yajxitl kywitz kykyaqil apóstol. 8  De último, kubʼ tyekʼin tibʼ nwitze, aqine ik tten ik tzeʼn jun kʼwal ul itzʼj naʼmxtoq tpon tqʼijlalil. 9  Porke aqine mas tal chʼin toklen kyxol apóstol ex mintiʼ woklene tuʼn tok qʼoʼn nbʼiye te apóstol, porke ok nbʼinchaʼne nya bʼaʼn tiʼj ttnam Dios. 10  Pero noq tuʼn t-xtalbʼil Dios, o tzaj qʼoʼn woklene lu. Ex nya nokx gan t-xtalbʼil kubʼ tyekʼin wiʼje, porke mas ma chin aqʼunane twitz alkyexku jun kyxol. Pero nya tuʼn wexe wipumal, oʼkx in bʼant tkyaqil jlu wuʼne noq tuʼn t-xtalbʼil Dios at wukʼile. 11  Tuʼntzunju, qa aqine in chin predicarin moqa junjuntl, axju tqanil in qo yoline tiʼj, aju tqanil ma txi kyokslaʼne. 12  Jaʼlo, qa in xi qqʼamaʼn qa jaw anqʼin Cristo kyxol kyimni aj qpredicarin, ¿tzeʼn tten in kyqʼamaʼn junjun kyeye qa mlay che jaw anqʼin kyimni? 13  Porke qa mlay che jaw anqʼin kyimni, entonces mintiʼ jaw anqʼin Cristo. 14  Pero qa mintiʼ jaw anqʼin Cristo, entonces noqx gan in qo predicarin ex noqx gan kyokslabʼile. 15  Nya oʼkxju, qa axix tok mlay che jaw anqʼin kyimni, entonces mintiʼ jaw anqʼin Cristo tuʼn Dios. Toj juntl yol, nya axix tok testiw qoʼ tiʼj Dios aj t-xi qqʼamaʼn qa jaw anqʼin Cristo tuʼn kyxol kyimni. 16  Porke qa mlay che jaw anqʼin kyimni, ax ikx te Cristo mintiʼ jaw anqʼin. 17  Ax ikx qa mintiʼ jaw anqʼin Cristo, noqx gan kyokslabʼile, porke naʼmx kytzaqpaje tiʼj kyile. 18  Ax ikx, aqeju okslal tiʼj Cristo o che kyim, o che kyim te jumajx. 19  Ex qa oʼkx ma tzʼok qeʼ qkʼuʼj tiʼj Cristo mientras itzʼ qoʼ, mas lasmi qwitz twitz alkyexku juntl xjal. 20  Pero ojtzqiʼn quʼn qa ate Cristo tnejel* o jaw anqʼin kyxol kyimni. 21  Porke ik tzeʼn noq tuʼn jun xinaq* tzaj kamik, ax iktzun noq tuʼn jun xinaq che jawil anqʼin kyimni. 22  Porke ik tzeʼn in che kyim kykyaqil xjal noq tuʼn tbʼinchbʼen Adán, ax ikxtzun ok che jawil anqʼin kykyaqil xjal noq tuʼn tbʼinchbʼen Cristo. 23  Pero en orden: tnejel a* Cristo, yajxitl qeju at toklen Cristo kyiʼj, toj ambʼil aj tul. 24  Yajxitl aju fin, aj t-xi tqʼoʼn Cristo Gobierno toj tkwent Dios, aju Tdios ex Tman, tkubʼlenxi kyiʼj kykyaqil gobierno tuʼn, qeju at kyoklen ex qeju at kyipumal. 25  Porke il tiʼj tuʼn tkawin Cristo tzmaxi aj tokx tqʼoʼn Dios kykyaqil aj qʼoj tjaqʼ tkawbʼil.* 26  Ex aju último aj qʼoj kbʼel tiʼj, aju kamik. 27  Porke «o tzʼokx tqʼoʼn Dios tkyaqil tjaqʼ tkawbʼil* Cristo». Pero aj ttzaj qʼamaʼn qa o tzʼokx qʼoʼn tkyaqil tjaqʼ tkawbʼil Cristo, klarxix taʼ qa nya ajunte Dios kʼokex tqʼon tibʼ tjaqʼ tkawbʼil Cristo. Porke a Dios kʼokex qʼonte tkyaqil tjaqʼ tkawbʼil Cristo. 28  Pero aj tokx tqʼoʼn Dios tkyaqil tjaqʼ tkawbʼil Cristo, ax ikxte Cristo aju Tkʼwal Dios kʼokex tqʼon tibʼ tjaqʼ tkawbʼil Dios, aju okx qʼonte tkyaqil tjaqʼ tkawbʼil. Iktzun tten, oʼkx Dios kkawil tibʼaj tkyaqil. 29  Porke noqwit nya ikju, ¿tiʼtzun kbʼajel kyiʼj qeju in che bautisarin tuʼn kykyim? Qa mlay che jaw anqʼin kyimni, ¿nyapetzun noqx gan in che bautisarin tuʼn kykyim? 30  Ax ikx qe, ¿nyapetzun noqx gan in qo ok weʼ twitz peligro tkyaqil qʼij? 31  Porke tkyaqil qʼij in chin ok weʼye twitz kamik. Ikju erman, ax tok aju in xi nqʼamaʼne kyeye ik tzeʼn tzalajbʼil in kubʼ nnaʼne kyiʼje, aqeye okslal qeye tiʼj Cristo Jesús aju Qajaw. 32  Qa o chin qʼojine kyukʼil txkup toj tnam Éfeso ik tzeʼn kye txqantl xjal,* ¿tiʼ tajbʼen weye? Porke qa mlay che jaw anqʼin kyimni, «mas bʼaʼn qo waʼn ex qo kʼan porke nchiʼj qo kyim». 33  Miʼn kubʼ kysbʼun kyibʼe. Porke qa ma tzʼok kymojbʼan kyibʼe kyukʼil nya bʼaʼn amiw, ktzakjel kynabʼle kyuʼn.* 34  Tenx kynabʼle, kybʼinchame aju bʼaʼn ex miʼn che bʼinchane il, porke ateʼ junjun kyxole mintiʼ ojtzqiʼn Dios kyuʼn. Tkyaqil jlu ma txi nqʼamaʼne kyeye tuʼn ttzaj kychʼixwiye. 35  Pero atlo junjun kyxole ok kyqʼama: «¿Tzeʼn ok che jawil anqʼin kyimni? ¿Tzeʼn kyxmilal aj kyjaw anqʼin?». 36  ¡Mintiʼ tnabʼla! ¿Nyapetzun ojtzqiʼn tuʼna qa tnejel il tiʼj tuʼn tkyim jun iyaj in kux tawaʼna tuʼntzun tanqʼin? 37  Porke nya jun tqan awal in kux tawaʼna, sino jun iyaj, ya sea twitz triw moqa juntl iyaj. 38  Pero a Dios in chʼiysante tqan ik tzeʼnx tajbʼil, ex a in xi qʼonte tqan teyele junjun iyaj. 39  Ax ikx, nya junx kychibʼjal kykyaqil at: part kychibʼjal xjal, part kychibʼjal alumaj, part kychibʼjal pájaro ex part kychibʼjal pescad. 40  Ax ikx, at qeju ateʼ toj kyaʼj ex at qeju ateʼ twitz txʼotxʼ. Pero part kyspikʼumal qeju ateʼ toj kyaʼj kywitz qeju ateʼ twitz txʼotxʼ. 41  Part tspikʼumal qʼij ex part tspikʼumal xjaw, ax ikx part kyspikʼumal cheʼw, nya ikx in che qoptzʼaj kykyaqil cheʼw. 42  Axju kbʼajel aj kyjaw anqʼin kyimni. Aju qxmilal in kux maquʼn kbʼel qʼay, atzunju qxmilal kjawil anqʼin mlay kubʼ qʼay. 43  Aju qxmilal in kux maquʼn, mintiʼ tajbʼen toj kywitz xjal, pero aju qxmilal kjawil anqʼin, nim toklen. Aju qxmilal in kux maquʼn, mintiʼ tipumal, pero aju qxmilal in jaw anqʼin, at tipumal. 44  Aju qxmilal in kux maquʼn te chibʼj ex bʼaq, atzunju qxmilal kjawil anqʼin kubʼ bʼinchaʼn tuʼn tanqʼin toj kyaʼj. Ikju, ik tzeʼn at jun qxmilal te chibʼj ex bʼaq, ax ikx at jun qxmilal kubʼ bʼinchaʼn tuʼn tanqʼin toj kyaʼj. 45  Ik tzeʼn in tzaj tqʼamaʼn tyol Dios: «Aju tnejel xinaq, Adán, ok te jun xjal itzʼ». Atzunju último Adán ok te jun espíritu in tzaj tqʼoʼn chwinqlal. 46  Pero nya aju qxmilal kubʼ bʼinchaʼn tuʼn tanqʼin toj kyaʼj bʼant tnejel, sino aju qxmilal te chibʼj ex bʼaq. Atzunju qxmilal kubʼ bʼinchaʼn tuʼn tanqʼin toj kyaʼj bʼant yajxitl. 47  Aju tnejel xinaq tzajni tiʼj txʼotxʼ, tiʼj quq kubʼ bʼinchaʼn. Atzunju tkabʼin xinaq, tzajni toj kyaʼj. 48  Aqeju o che kubʼ bʼinchaʼn tiʼj quq, in che ok ik tzeʼnju kubʼ bʼinchaʼn tiʼj quq. Atzun qeju in che anqʼin toj kyaʼj, in che ok ik tzeʼnju tzajni toj kyaʼj. 49  Jaʼlo, ik qo keʼyin ik tzeʼnju xinaq kubʼ bʼinchaʼn tiʼj quq, pero yajxitl ik qo keʼyil ik tzeʼn xinaq tzajni toj kyaʼj. 50  Pero kxel nqʼamaʼne jlu kyeye erman: aju qxmilal at jaʼlo, aju te chibʼj ex bʼaq, mlay bʼant tuʼn tokx toj Tgobierno Dios, ex aju in kubʼ qʼay mintiʼ toklen tukʼilju mlay kubʼ qʼay. 51  Jaʼlo, kxel nqʼamaʼne jun tyol Dios kyeye aju ewintoq tnejel: nya qkyaqilx qo kyimel, pero qkyaqilx qo chʼexpajel tuʼn Dios. 52  Kbʼajel ik tzeʼn aj tkubʼ qmutzʼun qwitz, jurat, aj tjaw qʼajt última trompeta. Porke kjawil qʼajt trompeta ex che jawil anqʼin kyimni tukʼil kyxmilal mlay kubʼ qʼay, atzun qe qo chʼexpajel tuʼn Dios. 53  Porke ilxix tiʼj tuʼn tok qxmilal at jaʼlo, aju kbʼel qʼay, te jun qxmilal mlay kubʼ qʼay. Ex ilxix tiʼj tuʼn tchʼexpaj qxmilal lu jaku kyim tukʼil jun mlayx kyim. 54  Pero aj tok qxmilal at jaʼlo aju kbʼel qʼay te jun qxmilal mlay kubʼ qʼay, ex aj tchʼexpaj qxmilal lu jaku kyim tukʼil jun qxmilal mlayx kyim, kjapunel kywi yol lu tzʼibʼin toj tyol Dios: «Ma kubʼ tiʼj* kamik te jumajx». 55  «Aya kamik, ¿tzeʼn kbʼel qiʼje tuʼna jaʼlo? Aya kamik, ¿tzeʼn qo okel ttxʼaʼna jaʼlo?». 56  Porke tuʼn il in qo ok ttxʼaʼn kamik tuʼntzun qkyim. Ex aju Ley in qʼonte tipumal il. 57  ¡Pero in xi qqʼoʼn chjonte te Dios tuʼnju ma tzʼonin qiʼj tuʼn tkubʼ tiʼj kamik quʼn noq tuʼn Qajaw Jesucristo! 58  Tuʼntzunju, aqeye erman kʼujlaʼn wuʼne, che weʼxixe ex miʼn che yukche. Kukx che aqʼunane toj taqʼun Qajaw. Porke ojtzqiʼn kyuʼne qa nya noqx gan tkyaqil aqʼuntl in bʼant kyuʼne toj taqʼun Qajaw.

Tqanil

^ Ax ikx, Pedro juntl tbʼi.
^ Toj griego «tnejel twitz awal».
^ Toj junjuntl lugar «ichan».
^ Toj griego «tnejel twitz awal».
^ Toj griego «tjaqʼ tqan».
^ Toj griego «tjaqʼ tqan».
^ Axlo ikx «ik tzeʼn in kubʼ kyximen txqantl xjal».
^ Moqa «che elel tzpete kyuʼn».
^ Toj griego «Ma txi bʼilqʼuʼn».

Copyrights tiʼj uʼj lu