Tnejel a los Corintios 11:1-34
11 Kykanomile wiʼje, ik tzeʼn weye in nel nkanoʼne tiʼj Cristo.
2 Aqeye erman, in xi nqʼoʼne chjonte kyeye tuʼnju in chin tzaj kynaʼne toj tkyaqil ex tuʼnju kukx in che ok lepeʼye tiʼj xnaqʼtzbʼil xi nqʼoʼne kyeye.
3 Pero wajbʼile tuʼn tel kynikʼe tiʼj qa ate Cristo twiʼ xinaq,* atzunte xinaq twiʼ xuʼj,* atzunte Dios twiʼ Cristo.
4 Qa at jun xinaq in jax tqʼoʼn jun tiʼ toj twiʼ aj tnaʼn Dios moqa aj tprofetizarin, in tzaj tiʼn chʼixbʼajil tiʼj twiʼ.
5 Ex qa at jun xuʼj mintiʼ in jax tqʼoʼn jun tiʼ toj twiʼ aj tnaʼn Dios moqa aj tprofetizarin, in tzaj tiʼn chʼixbʼajil tiʼj twiʼ, porke ik tten ik tzeʼn jun xjal otoq tzʼel qʼiʼn tkyaqil ttzmal twiʼ.
6 Porke qa mintiʼ ma jax tqʼoʼn jun xuʼj jun tiʼ toj twiʼ, il tiʼj tuʼn tel tiʼn ttzmal twiʼ. Pero qa chʼixbʼajil te jun xuʼj tuʼn tel tiʼn ttzmal twiʼ moqa tuʼn tel tbʼajsaʼn, qʼonkx jun tiʼ toj twiʼ.
7 Ate xinaq mintiʼ tuʼn tjax tqʼoʼn jun tiʼ toj twiʼ, porke tilbʼilal Dioste ex in tyekʼin tajwalil Dios, atzunte xuʼj in tyekʼin tajwalil xinaq.
8 Porke mintiʼ el xinaq tiʼj xuʼj, sino ate xuʼj el tiʼj xinaq.
9 Ax ikx, mintiʼ kubʼ tbʼinchaʼn Dios xinaq teju xuʼj, sino kubʼ tbʼinchaʼn xuʼj teju xinaq.
10 Tuʼntzunju, il tiʼj tuʼn tjax tqʼoʼn jun xuʼj jun tiʼ toj twiʼ tuʼn tkubʼ tyekʼin qa in nokx tqʼon tibʼ tjaqʼ tkawbʼil xinaq, ax ikx tuʼn tok kykeʼyin anjel.
11 Pero kyxol tmajen Qajaw, at tajbʼen xuʼj te xinaq ex at tajbʼen xinaq te xuʼj.
12 Porke ik tzeʼn te xuʼj el tiʼj xinaq, ax ikx te xinaq in nul itzʼj tiʼj xuʼj. Pero tkyaqil a Dios o kubʼ bʼinchante.
13 ¿Tiʼ kyxime tiʼj? ¿Bʼaʼnpe tuʼn tnaʼn jun xuʼj Dios ex mintiʼ jun tiʼ in jax tqʼoʼn toj twiʼ?
14 ¿Nyapetzun ojtzqiʼn kyuʼne qa chʼixbʼajil te jun xinaq qa ma kyaj tchʼiysan ttzmal twiʼ?
15 Pero atzunte xuʼj tbʼanelxix keʼyin tukʼil ttzmal twiʼ otoq chʼiy, porke o tzaj tqʼoʼn Dios ttzmal twiʼ ik tzeʼn jun tiʼ tuʼn tjax tqʼoʼn toj twiʼ.
16 Pero qa tajbʼil jun xjal tuʼn tkolin tiʼj juntl kostumbr, tzʼelx tnikʼ tiʼj qa mintiʼ qeye juntl qkostumbr, ax ikx kye txqantl okslal kyoj tcongregación Dios.
17 Pero kyukʼil yol lu, mintiʼ in xi nqʼamaʼne kyeye qa bʼaʼn aju in kybʼinchaʼne. Porke aj tok kychmon kyibʼe, mintiʼ jun bʼaʼn in tzaj tiʼn kyeye, noq oʼkx nya bʼaʼn.
18 Tnejelxix, ma tzʼok nbʼiʼne qa at pabʼil kyxole aj tok kychmon kyibʼe kykyaqile, ex jaku txi wokslaʼne qa ax tok.
19 Porke il tiʼj tuʼn tten pabʼil kyxole, tuʼntzun tel toj qʼanchaʼl alkyeqe in tzalaj Dios kyiʼj.
20 Porke aj tok kychmon kyibʼe tuʼn t-xi kywaʼne Wabʼj te Qale kyaj t-xnaqʼtzaʼn Qajaw, nya toj tumel in bʼant kyuʼne.
21 Porke aj tpon or tuʼn t-xi kywaʼne, teyele junjun ya otoq t-xi twaʼn tex twa. Tuʼntzunju, ateʼ junjun otoq tzaj weʼyaj kyiʼj, atzun junjuntl otoq tzaj sutin toj kywitz tuʼnju otoq t-xi kykʼaʼn nim.
22 ¿Tzeʼn tten jlu? ¿Mintiʼpe kyjaye tuʼn kywaʼne ex tuʼn kykʼane? ¿Moqa in che el kyikʼune okslal etzan tuʼn Dios ex kyajbʼile tuʼn tkubʼ kychʼixwi qeju mintiʼ at kye? ¿Tiʼ jaku txi nqʼamaʼne kyeye? ¿Okpetzulo kxel nqʼamaʼne kyeye qa bʼaʼn kybʼinchbʼene? Tiʼj jlu mlay txi nqʼamaʼne qa bʼaʼn kybʼinchbʼene.
23 Porke aju xnaqʼtzbʼil tzaj tqʼoʼn Qajaw weye, axju in xi nqʼoʼne kyeye. Toj qonikʼen tej naʼmxtoq txi qʼoʼn Qajaw Jesús toj kyqʼabʼ xjal, tzaj ttzyuʼn jun pan,
24 xi tqʼoʼn chjonte te Dios, kubʼ tpiẍun ex tqʼama: «Aju pan lu, in kubʼ techlaʼn nxmilale kxel qʼoʼn tuʼn kyklete. Kukx kybʼinchame jlu te nabʼl weye».
25 Tej kybʼaj waʼn te qale, axju bʼant tuʼn tukʼil copa ex tqʼama: «Aju copa lu, in kubʼ techlaʼn akʼaj trat kyaj bʼant tiʼj tuʼn nchkʼele. Tkyaqil maj aj tel kykʼaʼne tiʼj, kukx kybʼinchame te nabʼil weye».
26 Porke tkyaqil maj aj t-xi kywaʼne pan lu ex aj tel kykʼaʼne tiʼj copa lu, ok che yolile tiʼj tkyimlen Qajaw, tzmaxi aj tul.
27 Tuʼntzunju, alkyexku in xi twaʼn pan ex in nel tkʼaʼn tiʼj tcopa Qajaw ex mintiʼ toklen tuʼn tbʼant jlu tuʼn, in bʼinchan il tiʼj t-xmilal ex tiʼj tchkʼel Qajaw.
28 Tnejel, il tiʼj tuʼn tel tnikʼ tiʼj qa bʼaʼn taʼ, iktzun tten jaku txi twaʼn pan ex jaku tzʼel tkʼaʼn tiʼj copa.
29 Porke alkye in waʼn ex in kʼan ex mintiʼ in nel tnikʼ tiʼj qa in kubʼ techlaʼn jlu t-xmilal Qajaw, tuʼnx tibʼ in kubʼ tqʼoʼn tsentens, tuʼnju in xi twaʼn ex in xi tkʼaʼn.
30 Tuʼntzun jlu, nim qe kyxole mintiʼ kyipumal ex yabʼ qe, ex nim qe o che kyim.*
31 Pero noqwit in qo ximen tiʼj tzeʼn atoʼ, mlaywitlo kubʼ qʼoʼn qsentens.
32 Pero aj tkubʼ tqʼoʼn Jehová* qsentens, in qo tzaj tkawin tuʼntzun miʼn tkubʼ tqʼoʼn qsentens junx kyukʼil xjal.
33 Tuʼntzunju, aqeye werman, aj tok kychmon kyibʼe tuʼn t-xi kywaʼne wabʼj lu, che ayone tuʼn kypon kykyaqilx.
34 Ex qa at jun at weʼyaj tiʼj, mas bʼaʼn tuʼn twaʼn tja, tuʼntzun miʼn kubʼ qʼoʼn kysentense aj tok kychmon kyibʼe. Atzun txqantl tiʼ, kxel nbʼinchane tiʼj aj npone kyukʼile.
