Tnejel a los Corintios 7:1-40
7 Jaʼlo, chin yolile kyukʼile tiʼjju ma tzaj kytzʼibʼine weye. Mas bʼaʼn tuʼn miʼn tok ttzyuʼn* jun xinaq jun xuʼj.
2 Pero tuʼnju at nim yaẍbʼil,* mas bʼaʼn tuʼn tten t-xuʼjil teyele junjun xinaq ex mas bʼaʼn tuʼn tten tchmil teyele junjun xuʼj.
3 Mintiʼ tuʼn tkubʼ t-xkʼayin tibʼ xinaq te t-xuʼjil, ax ikx te xuʼj mintiʼ tuʼn tkubʼ t-xkʼayin tibʼ te tchmil.
4 Porke nya a xuʼj at toklen tiʼj t-xmilal, sino a tchmil. Ax ikx te chmilbʼaj, nya a at toklen tiʼj t-xmilal, sino a t-xuʼjil.
5 Miʼn kubʼ kyxkʼayin kyibʼe kyxolxe, oʼkx qa ma kyaj bʼant tiʼj kyuʼne tuʼn miʼn kytene junx jteʼ qʼij tuʼntzun kynaʼne Dios. Tbʼajlenxi tuʼn kynaʼne Dios, bʼaʼn tuʼn kytene junx juntl maj tuʼntzun miʼn kyoke toj prueba tuʼn Satanás tuʼnju mintiʼ in bʼant kyjakʼunte kyibʼe.
6 Tkyaqil jlu ma txi nqʼamaʼne kyeye tuʼntzun tel kynikʼe tiʼjju jaku bʼant kyuʼne, pero nya jun mandamyent.
7 Porke waje tuʼn kyok kykyaqil xinaq ik tzeʼn weye. Pero teyele junjun junxichaq oyaj o tzaj tqʼoʼn Dios te, junxitl oyaj o tzaj tqʼoʼn te jun ex junxitl te juntl.
8 Aqeju naʼmx kykubʼ mojeʼ ex aqeju viud, in xi nqʼamaʼne kye qa mas bʼaʼn tuʼn kyten kyjunalx ik tzeʼn weye.
9 Pero qa mlayx tzikʼx kyuʼn, che mojeʼku, porke mas bʼaʼn tuʼn kykubʼ mojeʼ twitzju noq in pon kykʼuʼj tiʼj jun xinaq moqa tiʼj jun xuʼj.
10 Atzun qeju mejebʼni qeʼ, kxel nqʼamaʼne jlu kye, miʼn tzʼel tpan tibʼ xuʼj tiʼj tchmil. Nya aqine in chin qʼamante jlu, sino a Qajaw.
11 Pero qa ma tzʼel tpan tibʼ xuʼj tiʼj tchmil, mintiʼ tuʼn tkubʼ mojeʼ tukʼil juntl, qatzun nya taj tuʼn tten tjunalx, bʼincham tten juntl maj tukʼil tchmil. Atzunte chmilbʼaj mintiʼ tuʼn tkyaj tqʼoʼn t-xuʼjil.
12 Atzun kye txqantl in xi nqʼamaʼne kye, ikju, aqine, nya a Qajaw, qa at jun erman nya okslal t-xuʼjil, pero qa tajbʼil t-xuʼjil tuʼn kukx tten tukʼil, miʼn kyaj tqʼoʼn.
13 Ex qa at jun xuʼj nya okslal tchmil, pero tajbʼil tchmil tuʼn kukx tten tukʼil, miʼn kyaj tqʼoʼn tchmil.
14 Porke in nok tmejebʼleʼn xinaq nya okslal te xjan noq tuʼn t-xuʼjil ex in nok tmejebʼleʼn xuʼj nya okslal te xjan noq tuʼn tchmil. Noqwit nya ikju, tzʼilwitlo qe kykʼwal, pero jaʼlo xjan qeʼ.
15 Pero qa ma kubʼ t-ximen chmilbʼaj moqa xuʼjilbʼaj nya okslal tuʼn tel tpan tibʼ, paʼmil tibʼ. Porke mlay tzʼok t-obligarin ermano moqa ermana tukʼil tuʼn kukx kyten junx. Porke o che txkonjtze tuʼn Dios tuʼn kytene toj bʼaʼn.
16 Aya xuʼj, qa mintiʼ ma kyaj tena tukʼil tchmila, ¿tzeʼn kʼelel tnikʼa tiʼj qa kkletel moqa mlay? Aya chmilbʼaj, qa mintiʼ ma kyaj tena tukʼil t-xuʼjila, ¿tzeʼn kʼelel tnikʼa tiʼj qa kkletel moqa mlay?
17 Pero teyele junjun kukx tuʼn tanqʼin ik tzeʼn tanqʼibʼil o tzaj tqʼoʼn Jehová,* ik tzeʼn tanqʼibʼil at tej ttxkonjtz tuʼn Dios. Atzun jlu in xi nqʼamaʼne kye kykyaqil okslal kyojele congregación.
18 Qa otoq kubʼ circuncidarin jun xjal tej ttxkonjtz tuʼn Dios, kukx tuʼn tten ikju. Ex qa naʼmxtoq tkubʼ circuncidarin tej ttxkonjtz tuʼn Dios, miʼn kubʼ tcircuncidarin tibʼ.
19 Porke nya nim toklen qa circuncidarin moqa nya. Aju mas nim toklen aju tuʼn t-xi tnimen qe tmandamyent Dios.
20 Teyele junjun kukx tuʼn tanqʼin ik tzeʼn tanqʼibʼil tej ttxkonjtz tuʼn Dios.
21 Qa majena tej ttxkonjtza tuʼn Dios, miʼn bʼisuna tuʼn. Pero qa at tumel tuʼn ttzaqpeta, aprovecharima.
22 Porke alkye majentoq tej ttxkonjtz tuʼn Qajaw, jaʼlo o tzaqpaj ex te Qajaw. Ax ikx, alkye tzaqpiʼntoq tej ttxkonjtz tuʼn Qajaw, jaʼlo tmajen Cristo.
23 Porke nim kywiʼye o chjet tuʼn Dios tuʼn kylaqʼete. Miʼn che oke te kymajen xjal juntl maj.
24 Aqeye erman, teyele junjun kyeye tuʼn tten twitz Dios ik tzeʼn tej ttxkonjtz tuʼn.
25 Atzun qeju naʼmx kykubʼ mojeʼ,* mintiʼ jun yol ma tzaj tqʼamaʼn Qajaw weye kye. Pero kxel nqʼamaʼne kyeye tiʼ nxime, ex jaku tzʼok qeʼ kykʼuʼje tiʼjju kxel nqʼamaʼne kyeye, porke o kubʼ tyekʼin Qajaw t-xtalbʼil wiʼje.
26 Tuʼnju kwest qanqʼibʼil toj ambʼil jaʼlo, in kubʼ nximane qa mas bʼaʼn tuʼn tkyaj ten jun xinaq ik tzenx taʼ.
27 Qa at t-xuʼjila, miʼn kubʼ t-ximana tuʼn tel tpan tibʼa tiʼj. Qa mintiʼ t-xuʼjila, miʼn jyona tiʼj.
28 Pero qa ma kubʼ mojeʼya, mintiʼ in bʼinchana il. Ax ikx qeju naʼmx kykubʼ mojeʼ,* mintiʼ in che bʼinchan il qa ma che kubʼ mojeʼ. Pero alkye qeju ma che kubʼ mojeʼ, tzul nya bʼaʼn toj kyanqʼibʼil. Ex nya waje jlu kyeye.
29 Aqeye erman, atzun jlu waje tuʼn t-xi nqʼamaʼne kyeye: nya nim ambʼil atx. Tuʼntzunju, jaʼlo, aqeju at kyxuʼjil che ok ik tzeʼn mintiʼ kyxuʼjil.
30 Aqeju in che oqʼ che ok ik tzeʼn qeju mintiʼ in che oqʼ. Aqeju in che tzalaj, ik tzeʼn qeju mintiʼ in che tzalaj. Aqeju in che laqʼon, ik tzeʼn qeju mintiʼ jun tiʼ at kye,
31 ex aqeju in najbʼen aju at twitz txʼotxʼ kyuʼn, che ok ik tzeʼn qeju mintiʼ in najbʼenxix kyuʼn. Porke tkyaqilju in nok qkeʼyin twitz txʼotxʼ jaʼlo, in chʼexpaj.
32 Oʼkx wajbʼile erman tuʼn miʼn ttzaj bʼaj kykʼuʼje. Porke aju xinaq naʼmx tkubʼ mojeʼ atz tok tkʼuʼj tiʼjju tuʼn tajbʼen te Qajaw ex tzeʼn tuʼn ttzalaj Qajaw tiʼj.
33 Pero aju xinaq o kubʼ mojeʼ in tzaj bʼaj tkʼuʼj tiʼjju te twitz txʼotxʼ, porke tajbʼil tuʼn ttzalaj t-xuʼjil tiʼj.
34 Tuʼntzunju, paʼn taʼ tanmi. Ax ikx, aju xuʼj mintiʼ tchmil ex aju xuʼj naʼmx tkubʼ mojeʼ* atz tok kykʼuʼj tiʼjju tuʼn kyajbʼen te Qajaw, tuʼn tok kyxmilal ex kyximbʼetz te xjan. Atzunte xuʼj o kubʼ mojeʼ in tzaj bʼaj tkʼuʼj tiʼjju at te twitz txʼotxʼ, porke tajbʼil tuʼn ttzalaj tchmil tiʼj.
35 Ma txi nqʼamaʼne tkyaqil jlu kyeye tuʼn tajbʼen kyeye. Nya tuʼn kykubʼ ntzyuʼne, sino tuʼn tonin kyiʼje tuʼn tkubʼ kybʼinchaʼne aju bʼaʼn ex tuʼn kukx kyajbʼene te Qajaw mintiʼ jun maqol kyeye.
36 Pero qa at jun kyxole in kubʼ t-ximen qa kwest tuʼn tten tjunalx* ex ya ma japun tabʼqʼi tuʼn tkubʼ mojeʼ, bʼincham alkyeju mas bʼaʼn toj twitz. Bʼaʼn tuʼn tkubʼ mojeʼ, mintiʼ in bʼinchan il.
37 Pero qa at jun kyxole in kubʼ t-ximen toj tanmi tuʼn miʼn tkubʼ mojeʼ ex qʼuqli tkʼuʼj tiʼjju in kubʼ t-ximen, tuʼnju toj twitz nya il tiʼj tuʼn tkubʼ mojeʼ ex nya kwest in nela te tuʼn tten tjunalx,* in tbʼinchan bʼaʼn.
38 Tuʼntzunju, alkye in kubʼ mojeʼ, in tbʼinchan bʼaʼn. Pero alkye mintiʼ in kubʼ mojeʼ, mas bʼaʼn in tbʼinchan.
39 Aju xuʼj o kubʼ mojeʼ, il tiʼj tuʼn tten tukʼil tchmil akux itzʼ. Pero qa ma kyim tchmil, tzaqpiʼn taʼ tuʼn tkubʼ mojeʼ tukʼil alkyexku taj, oʼkx qa jun okslal tiʼj Qajaw.
40 Pero toj weye nximbʼetz, mas jaku tzalaj qa ma kyaj ten ik tzeʼnx taʼ. Ex qʼuqli nkʼuʼje tiʼj qa ax ikx weye at tipumal Dios wukʼile.
Tqanil
^ Toj juntl yol, tuʼn miʼn tkubʼ ten tukʼil.
^ Toj plural tkubʼ yol griego pornéia tzalu. Qʼonka twitza tiʼj diccionario.
^ Qʼonka twitza tiʼj xnaqʼtzbʼil A5.
^ Toj griego «qeju virgen». Toj juntl yol, aqeju naʼmx kykubʼ ten tukʼil jun xinaq moqa tukʼil jun xuʼj.
^ Moqa «qeju virgen».
^ Moqa «virgen».
^ Moqa «tuʼn tten virgen».
^ Moqa «tuʼn tten virgen».
