Tnejel a los Corintios 3:1-23

  • Kukxtoq in che ok lepeʼ okslal te Corinto tiʼj kyximbʼetz xjal (1-4)

  • «A Dios chʼiysalte» (5-9)

    • Junx in qo aqʼunan tukʼil Dios (9)

  • Qo aqʼunan kyukʼil material mlay che kubʼ tzʼeʼy tuʼn qʼaqʼ (10-15)

  • «Aqeye tja Dios» (16, 17)

  • Mintiʼ tajbʼen kynabʼil xjal toj twitz Dios (18-23)

3  Aqeye erman, mintiʼ in chin yoline kyukʼile ik tzeʼn kyukʼil qeju ateʼ tjaqʼ tipumal espíritu santo. Sino ik tzeʼn kyukʼil qeju in che ok lepeʼ tiʼj kynabʼil xjal, ik tzeʼn qeju tzma tal neʼ qe toj kyokslabʼil tiʼj Cristo. 2  Porke aju xnaqʼtzbʼil xi nqʼoʼne kyeye ik tten ik tzeʼn tchʼuʼ* neʼ ex nya ik tzeʼn wabʼj tuʼnju naʼmxtoq tok kyipumale, axpe ikx jaʼlo naʼmx tok kyipune. 3  Porke kukx in che ximane ik tzeʼn kye xjal. Tuʼnju in tzaj txʼaʼl tiʼj kykʼuʼje kyxolxe ex at qʼoj kyxole, ¿mintiʼpe in kubʼ kyyekʼine qa in che ok lepeʼye tiʼj kynabʼil xjal ex tiʼj kymod? 4  Aj t-xi tqʼamaʼn jun «Te Pablo qine», atzun juntl «Te Apolos qine», ¿nyapetzun axju in bʼant kyuʼne ik tzeʼn kye xjal? 5  ¿Tiʼtzun toklen Apolos? ¿Ex tiʼtzun toklen Pablo? Noq ajbʼel qoʼye ex in xi qbʼinchaʼne aju ma tzaj tqʼamaʼn Qajaw qeye, ex kyuʼn qyole ma che okslane. 6  Aʼyine ẍin kux awante iyaj, atzunte Apolos ma kux qʼonte aʼ t-xeʼ, pero a Dios chʼiysalte. 7  Tuʼntzunju, aju awalte iyaj mintiʼ toklen, ax ikx aju qʼolte aʼ t-xeʼ, sino oʼkx Dios aju in chʼiysante. 8  Aju awalte iyaj ex aju qʼolte aʼ t-xeʼ, axju aqʼuntl in bʼant kyuʼn,* pero teyele junjun tzul chjoʼn twi tkʼuʼj ik tzeʼnx taqʼunbʼen. 9  Porke junx in qo aqʼunane tukʼil Dios. Atzun kyeye, aqeye tawal Dios in naqʼunan tiʼj, aju ja in jaw tbʼinchaʼn Dios. 10  Porke noq tuʼn t-xtalbʼil Dios kubʼ tyekʼin wiʼje, kubʼ nqʼoʼne simyent ik tzeʼn jun bʼinchal ja at nim tojtzqibʼil, pero juntl in jaw tbʼinchaʼn ja tibʼaj. Teyele junjun tuʼn tok t-xqʼuqin tibʼ tzeʼn in naqʼunan tibʼaj. 11  Porke mi al jun jaku kubʼ tqʼoʼn juntl simyent te t-xelju ya o kubʼ qʼoʼn, aju Jesucristo. 12  Tibʼaj simyent lu, jaku tzʼaqʼunan jun xjal tukʼil oro, plata, qe tbʼanel abʼj, tukʼil tzeʼ, tukʼil chʼim ex tukʼil tqan awal. 13  Pero kʼelel toj qʼanchaʼl tzeʼn taqʼunbʼen teyele junjun. Tuʼn qʼaqʼ kʼelel toj qʼanchaʼl toj qʼij aj kyok weʼ twitz nya bʼaʼn. Porke tzul tyekʼin qʼaqʼ tzeʼn taqʼunbʼen teyele junjun. 14  Qa ma tipaʼ taqʼunbʼen jun xjal xjaw tbʼinchaʼn tibʼaj simyent, tzul qʼoʼn chojbʼil te. 15  Pero qa ma kubʼ tzʼeʼy taqʼunbʼen jun xjal tuʼn qʼaqʼ, tzul tbʼis tiʼj taqʼunbʼen, atzunte kkletel, pero ik tzeʼn jun xjal in tzoqpaj tiʼj qʼaqʼ. 16  ¿Mintiʼpe ojtzqiʼn kyuʼne qa tja Dios qeye ex qa najli espíritu santo kyxole? 17  Qa at jun xjal in kubʼ t-xituʼn tja Dios, kbʼel xituʼn tuʼn Dios. Porke aju tja Dios xjan te ex aqeye tja Dios. 18  Miʼn kubʼ kysbʼun kyibʼe. Qa at jun kyxole in kubʼ t-ximen qa at tnabʼil toj ambʼil jaʼlo,* qʼonk tibʼ ik tzeʼn mintiʼ tnabʼil tuʼntzun tok ik tzeʼn at tnabʼil. 19  Porke toj twitz Dios mintiʼ tajbʼen kynabʼil xjal, ik tzeʼn kyaj tzʼibʼin: «In tzpet xjal at tnabʼil tuʼn Dios toj tex tsbʼubʼil». 20  Ax ikx kyaj tzʼibʼin jlu: «Ojtzqiʼn tuʼn Jehová* qa mintiʼ tajbʼen kyximbʼetz xjal at kynabʼil». 21  Tuʼntzunju, mi al jun tuʼn tjaw tnimsan tibʼ tiʼjju kye xjal, porke kyeye tkyaqil: 22  qa a Pablo, qa a Apolos, ex qa a Cefas,* qa aju twitz txʼotxʼ, qa aju chwinqlal, qa aju kamik, qa aju at jaʼlo ex qa aju tzul. Kyeye tkyaqil. 23  Atzun kyeye te Cristo qeye, atzunte Cristo te Dios.

Tqanil

^ Toj junjuntl lugar «tmiʼẍ».
^ Moqa «junx qeʼ».
^ Qʼonka twitza kyiʼj yol ambʼil jaʼlo toj diccionario.
^ Qʼonka twitza tiʼj xnaqʼtzbʼil A5.
^ Ax ikx, Pedro juntl tbʼi.

Copyrights tiʼj uʼj lu