Tnejel a los Corintios 12:1-31
12 Aqeye erman, kyiʼj oklenj* in tzaj tqʼoʼn espíritu santo qe, nya wajbʼile tuʼn kytene mintiʼ kyojtzqibʼile.
2 Porke ojtzqiʼn kyuʼne qa tej naʼmxtoq kyokslane, e kʼulune kywitz imagen mintiʼ in bʼant kyyolin ex xi kybʼinchaʼne tkyaqilju kyajbʼil.
3 Pero jaʼlo, wajbʼile tuʼn tel kynikʼe tiʼj qa mlayx tqʼama jun xjal, «¡Nya bʼaʼn te Jesús!», qa at espíritu santo tukʼil. Ex qa oʼkx jaku tqʼama jun xjal, «¡Ate Jesús Qajaw!», qa at espíritu santo tukʼil.
4 Junxichaq oklenj* at, pero oʼkx jun espíritu santo at.
5 Junxichaq tumel tuʼn qajbʼen, pero oʼkx jun Qajaw at.
6 Junxichaq tumel tzeʼn in naqʼunan espíritu santo, pero oʼkx jun Dios at aju in bʼant tkyaqil aqʼuntl lu tuʼn.
7 Pero qʼanchaʼl tzeʼn in nonin espíritu santo tiʼj teyele junjun, tuʼntzun tajbʼen kye txqantl.
8 Ateʼ junjun in tzaj tqʼoʼn espíritu santo kyoklen tuʼn kyyolin tukʼil nabʼil, atzun junjuntl in tzaj tqʼoʼn kyoklen tuʼn kyyolin tukʼil ojtzqibʼil.
9 Ateʼ junjun in tzaj tqʼoʼn espíritu santo kyoklen tuʼn kyten kyuw toj kyokslabʼil, atzun junjuntl in tzaj tqʼoʼn kyoklen tuʼn kyqʼanit yabʼ kyuʼn.
10 Ateʼ junjun in tzaj tqʼoʼn kyoklen tuʼn kybʼant milagro* kyuʼn, atzun junjuntl in tzaj tqʼoʼn kyoklen tuʼn kyprofetizarin. Ateʼ junjun in tzaj tqʼoʼn kyoklen tuʼn tel kynikʼ tiʼj qa tukʼil Dios tzajni jun tqanil moqa nya, atzun junjuntl in tzaj tqʼoʼn kyoklen tuʼn kyyolin kyoj junxichaq yol. Ex junjuntl in tzaj qʼoʼn kyoklen tuʼn tbʼant ky-interpretarin juntl yol.
11 Pero kykyaqil oklenj jlu, axte espíritu santo in tzaj qʼonte. Ex in xi tqʼoʼn te teyele junjun ik tzeʼnx taj.
12 Porke ik tzeʼn te qxmilal, maske at nim tpartil, noq oʼkx jun qxmilal at. Axju in bʼaj tukʼil Cristo.
13 Qkyaqilx o qo bautisarin tuʼn ax espíritu santo tuʼn qok te junx qxmilal, maske judiy qoʼ, griego qoʼ, majen qoʼ, moqa tzaqpiʼn qoʼ. Ex qkyaqilx junx espíritu santo tzaj qʼoʼn qe tuʼn t-xi qkʼaʼn.
14 Porke nya oʼkx jun tpartil qxmilal at, sino at nim tpartil.
15 Qa ma tqʼama qqan: «Tuʼnju nya qʼabʼaj qine, nya jun tpartil xmilal qine», chiwt, ¿ape tzʼelpuna jlu qa nya jun tpartil qxmilal?
16 Ex qa ma tqʼama qẍkin: «Tuʼnju nya jun tbʼaqʼ witzbʼaj qine, nya jun tpartil xmilal qine», chiwt, ¿ape tzʼelpuna jlu qa nya jun tpartil qxmilal?
17 Qa jun tbʼaqʼ witzbʼaj tkyaqil qxmilal, ¿tzeʼn jaku qo bʼin? Ex qa jun ẍkinbʼaj tkyaqil qxmilal, ¿tzeʼn jaku bʼant qsqon?
18 Pero o che kyaj tqʼoʼn Dios tkyaqil tpartil qxmilal toj tlugar.
19 Porke noqwit junx qeʼ kykyaqil tpartil qxmilal, ¿tzeʼn jaku ten qxmilal?
20 Noqtzun tuʼnj, ateʼ nim tpartil qxmilal, pero oʼkx jun qxmilal at.
21 Mlay bʼant tuʼn t-xi tqʼamaʼn jun tbʼaqʼ qwitz te qqʼabʼ: «Mintiʼ tajbʼena weye», ax ikx mlay bʼant tuʼn t-xi tqʼamaʼn qwiʼ kye qqan: «Mintiʼ kyajbʼene weye».
22 Porke aqeju tpartil qxmilal nyaxix nim kyoklen toj qwitz, ax ikx at kyajbʼen.
23 Ex aqeju tpartil qxmilal in kubʼ qximen qa nyaxix tbʼanel che keʼyin, in nok qqʼoʼn mas kyoklen. Iktzun tten mas in nok qqʼoʼn kyoklen tpartil qxmilal in tzaj qchʼixwi kyiʼj,
24 atzun kye tpartil qxmilal tbʼanel che keʼyin, mintiʼ jun tiʼ in bʼant quʼn kyukʼil. Kubʼ tbʼinchaʼn Dios qxmilal ikju, tuʼntzun tok tqʼoʼn kyoklen tpartil qxmilal nyaxix tbʼanel che keʼyin ik tzeʼn qeju tbʼanel che keʼyin.
25 Bʼant tkyaqil jlu tuʼn Dios tuʼntzun miʼn tten pabʼil toj qxmilal, ex tuʼn tok kykwentin kyibʼ tpartil qxmilal kyxolx.
26 Qa at jun tpartil qxmilal in choʼn, tkyaqil qxmilal in choʼn. Ex qa at jun tpartil qxmilal in nok qʼoʼn toklen, kykyaqil tpartil qxmilal in che tzalaj junx tukʼil.
27 Ax ikxtzun kyeye, in che oke te t-xmilal Cristo ex teyele junjun kyeye in che oke ik tzeʼn jun tpartil.
28 A Dios o txi qʼonte toklen teyele junjun toj congregación: tnejel qe apóstol, tkabʼin qe profeta, toxin qe xnaqʼtzal, yajxitl qeju o tzaj qʼoʼn kyoklen tuʼn kybʼant milagro* kyuʼn, qeju o tzaj qʼoʼn kyoklen* tuʼn kyqʼanit yabʼ kyuʼn, qeju in che onin, qeju in bʼant kydirigirin ex qeju in bʼant kyyolin kyoj junxichaq yol.
29 ¿Kykyaqilpe apóstol qeʼ? ¿Kykyaqilpe profeta qeʼ? ¿Kykyaqilpe xnaqʼtzal qeʼ? ¿Kykyaqilpe in che bʼant milagro* kyuʼn?
30 ¿Kykyaqilpe o tzaj qʼoʼn kyoklen* tuʼn kyqʼanit yabʼ kyuʼn? ¿Kykyaqilpe in bʼant kyyolin kyoj junxichaq yol? ¿Kykyaqilpe in bʼant ky-interpretarin juntl yol?*
31 Tuʼntzunju, kyqʼonke tilil tuʼn ttzaj qʼoʼn kyoklene* mas tbʼanelxix. Atzun jaʼlo, kxel nyekʼine kyeye alkyeju bʼe mas tbʼanel.
