Tnejel a los Corintios 1:1-31
1 Aqine Pablo, txkoʼmaj qine tuʼn wajbʼene te apóstol te Cristo Jesús ik tzeʼn tvoluntad Dios, junx tukʼil qerman Sóstenes.
2 In xi ntzʼibʼine kyeye, aqeye okslal ateʼye toj tnam Corinto ex kye kykyaqil qeju in che kubʼsan twitz Qajaw Jesucristo noq jaxku tumel. Skʼoʼmaj qeye tuʼn Dios tuʼn kytene junx tukʼil Cristo Jesús ex o che txkete tuʼn tuʼn kyoke te xjan. Ate Jesucristo Kyajaw ex Qajaw:
3 Awt Qman Dios ex Qajaw Jesucristo kubʼ tyekʼin t-xtalbʼil kyiʼje ex che oninwt kyiʼje tuʼn kytene bʼaʼn.
4 Kukx in xi nqʼoʼne chjonte te Dios aj nximane tiʼj t-xtalbʼil o kubʼ tyekʼin kyiʼje noq tuʼn Cristo Jesús.
5 Porke ma che oke qʼinun toj tkyaqil tuʼn Cristo, mas ma bʼant kyyoline ex mas ma ten kyojtzqibʼile.
6 Tuʼntzunju, mas o kyuwix yol tiʼj Cristo kyxole.
7 Jaʼlo, mintiʼ jun tiʼ atx taj kyeye akux in che ayone tiʼj tqʼijlalil tuʼn tul Qajaw Jesucristo.
8 Ax ikx, kʼonil Dios kyiʼje tuʼn kykubʼ weʼxixe tzmaxi aj tul fin, tuʼntzun kytene mintiʼ kypaltile aj tpon qʼij tuʼn tul Qajaw Jesucristo.
9 Porke kukx in japun te Dios twi tyol. Ex ma che txkete tuʼn tuʼn kytene junx tukʼil* Tkʼwal, aju Qajaw Jesucristo.
10 Jaʼlo erman, toj tbʼi Qajaw Jesucristo, in chin kubʼsane kywitze tuʼn tmojeʼ twi kyyole ex tuʼn miʼn tten pabʼil kyxole. Noq oʼkx tuʼn tten junx kynabʼile ex junx kyximbʼetze.
11 Porke o tzaj kyqʼamaʼn junjun toj tja Cloe weye, aqeye werman, qa at qʼoj kyxole.
12 In xi nqʼamaʼne jlu kyeye, porke at junjun kyxole in kyqʼamaʼn: «Te Pablo qine». Atzun junjuntl: «Te Apolos qine». Junjuntl: «Te Cefas* qine». Ex junjuntl: «Te Cristo qine».
13 ¿Será que paʼn tten Cristo? ¿Apetzun Pablo jaw qʼoʼn twitz tzeʼ tuʼn kyklete? Moqa, ¿tojpe tbʼi Pablo o che bautisarine?
14 In xi nqʼoʼne chjonte te Dios tuʼnju nijun kyxole bautisarin wuʼne, oʼkx Crispo ex Gayo.
15 Tuʼntzunju, nijun kyxole jaku txi tqʼamaʼn qa o bautisarin toj nbʼiye.
16 Ax tok, ax ikx wuʼne e bautisarin qeju toj tja Estéfanas. Pero oʼkx kye, ex mintiʼ naʼn juntl wuʼne.
17 Porke mintiʼ ma chin tzaj samaʼne tuʼn Cristo tuʼn kybautisarin xjal wuʼne, sino tuʼn t-xi nqʼamaʼne tbʼanel noticia* kye. Ex nya kyukʼil yol kwest tuʼn tel qnikʼ tiʼj,* tuʼntzun miʼn tel wiʼne toklen tkyimlen Cristo twitz tzeʼ te kʼixbʼisabʼil.*
18 Porke aju tqanil tiʼj tkyimlen Cristo twitz tzeʼ, mintiʼ ttxolil toj kywitz xjal in cheʼx toj najen.* Atzun qe toj qwitz, aqoʼ ma qo klet, aju tqanil lu tipumal Dios te.
19 Porke tzʼibʼin taʼ: «Kbʼel nnajsaʼne kynabʼil xjal at kynabʼil, ex kʼelel wikʼune kyximbʼetz xjal list qeʼ».
20 ¿Jatumel taʼ xjal at tnabʼil? ¿Jatumel taʼ escriba?* ¿Jatumel taʼ xjal tgan tuʼn tyolin tiʼjju in bʼaj jaʼlo?* ¿Mintiʼpe o tzaj tyekʼin Dios qa mintiʼ tajbʼen kynabʼil xjal?
21 Porke o kubʼ t-ximen Dios tuʼn miʼn tel kynikʼ xjal tiʼj tuʼn kyex kynabʼil. Sino mas bʼaʼn ela toj twitz tuʼn kyklet qeju in che okslan tuʼn tqanil in qo predicarin tiʼj ex aju in kubʼ kyximen txqantl qa mintiʼ ttxolil. Iktzun tten o tzaj tyekʼin Dios qa at nim tnabʼil.
22 Porke kyajbʼil xjal judiy tuʼn tok kykeʼyin milagro,* atzun kye xjal griego in che jyon tiʼj nabʼil.
23 Atzun qe, in qo predicarin tiʼj Cristo aju kyim twitz tzeʼ. Toj kywitz xjal judiy, jun tolsabʼil, atzun kye xjal nya judiy, mintiʼ ttxolil.
24 Pero toj kywitz qeju txkoʼmaj qe tuʼn Dios, ya sea judiy moqa griego, ate Cristo tipumal Dios ex tnabʼil Dios.
25 Porke aju o kubʼ t-ximen Dios, aju in kyqʼamaʼn xjal qa mintiʼ ttxolil, mas at tnabʼil twitz kynabʼil xjal. Ex aju o kubʼ tbʼinchaʼn Dios, aju in kubʼ kyximen xjal qa mintiʼ tipumal, mas nim tipumal kywitz.
26 Ex che ximane tiʼj erman, tej kytxkonjtze, nya nim kyxole at kynabʼil toj kywitz xjal, nya nim kyxole at kyipumal ex nya nim kyxole kykʼwal xjal nim kyoklen.
27 Sino jaw tskʼoʼn Dios aju mintiʼ tnabʼl toj kywitz xjal, tuʼntzun tkubʼ kychʼixwi qeju at kynabʼil. Porke jaw tskʼoʼn Dios aju mintiʼ tipumal, tuʼntzun tkubʼ kychʼixwi qeju at kyipumal.
28 Ex jaw tskʼoʼn Dios aju mintiʼ toklen toj kywitz xjal ex aju ikʼun kyuʼn xjal, aqeju mintiʼ kyajbʼen, tuʼntzun tel tiʼn toklen aju at toklen.
29 Tuʼntzunju, mi aʼl jun xjal jaku jaw tnimsan tibʼ twitz Dios.
30 Porke chjonte te Dios at kymojbʼabʼil kyibʼe tukʼil Cristo Jesús, aju o tzaj tyekʼin tnabʼil Dios qe. Ex noq tuʼn Cristo, jaku qo ok tqʼoʼn Dios te tzʼaqli ex te xjan, ex jaku qo klet noq tuʼn chojbʼil.
31 Tuʼntzun tbʼaj tkyaqil ik tzeʼn kyaj tzʼibʼin toj tyol Dios: «Alkye in jaw tnimsan tibʼ, nimsaʼnktz Jehová».*
Tqanil
^ Moqa «tuʼn kyparticiparine tukʼil».
^ Ax ikx, Pedro juntl tbʼi.
^ Moqa «tbʼanel tqanil».
^ Moqa «nimaq yol».
^ Qʼonka twitza tiʼj diccionario.
^ Moqa «toj kywitz qeju in che kyim».
^ Toj juntl yol, jun xjal at nim tojtzqibʼil tiʼj Ley.
^ Qʼonka twitza kyiʼj yol ambʼil jaʼlo toj diccionario.
^ Toj griego «señal».
^ Qʼonka twitza tiʼj xnaqʼtzbʼil A5.
