Tnejel a los Corintios 16:1-24
16 Atzunju pwaq tuʼn tjaw chmet tuʼn t-xi qʼet kye okslal,* kybʼinchame ik tzeʼn xi nqʼamaʼne kye qeju ateʼ kyoj congregación te Galacia.
2 Toj tnejel qʼij te junjun seman, teyele junjun kyeye bʼaʼn tuʼn tel tpaʼn chʼin tiʼjju in kanet tuʼn, iktzun tten nya ktzajelxi tuʼn tjaw chmet pwaq aj npone kyukʼile.
3 Ex aj npone kyukʼile, che xel nsamaʼne junjun xinaq tuʼn t-xi kyiʼn oyaj lu atz Jerusalén. Che xel nsamaʼne qe xinaq tzul kyqʼamaʼne weye kyoj carta qa in nok qeʼ kykʼuʼje kyiʼj.
4 Pero qa il tiʼj tuʼn nxiʼye, ok chin xeʼle kyukʼil.
5 Ok chin pole visitaril kyeye wikʼlenxiye Macedonia, porke tnejel il tiʼj tuʼn wikʼe Macedonia.
6 Wajbʼile tuʼn nkyaj tene jteʼ qʼij kyukʼile, qa jaku bʼant, axpe ikx tuʼn tikʼx jbʼalil wuʼne kyukʼile, tuʼntzun kyxiʼye wabʼil weye toj jun part bʼe jatumel chin xeʼle yajxitl.
7 Porke nya waje tuʼn wikʼ aje jun rat kyukʼile, sino wajbʼile tuʼn ntene nim qʼij kyukʼile, qa ik tajbʼil Jehová.*
8 Pero mientras, atz chin kjel tene tzalu Éfeso tzmaxi aj tkubʼaj Fiesta te Pentecostés.
9 Porke ma tzaj qʼoʼn oportunidad weye tuʼn tbʼant mas wuʼne toj taqʼun Qajaw, pero ateʼ nim aj qʼoj.
10 Ex qa ma pon Timoteo kyukʼile, kyqʼonke tilil tuʼn miʼn ttzaj bʼaj tkʼuʼj kyxole, porke ax ikxte in bʼant taqʼun Jehová* tuʼn ik tzeʼn weye.
11 Tuʼntzunju, miʼn tzʼok kyqʼoʼne mintiʼ toklen. Ex che onine tiʼj tuʼn tul bʼaʼn wukʼile, porke in chin ayone tiʼj kyukʼil erman.
12 Atzunte qerman Apolos, in kubʼsane twitz tuʼn t-xiʼ visitaril kyeye junx kyukʼil erman. Nya ximen tuʼn tuʼn t-xiʼ jaʼlo, pero kpol kyukʼile aj tbʼant tuʼn.
13 Che xqʼuqine ex che weʼxixe toj kyokslabʼile, miʼn che xobʼe* ex tenx kyipumale.
14 Kybʼinchame tkyaqil tukʼil kʼujlabʼil.
15 Aqeye erman, ojtzqiʼn kyuʼne qa aqeju toj tja Estéfanas e okslan tnejel toj tnam Acaya ex qa ok tilil kyuʼn tuʼn kyajbʼen kye okslal.*
16 Tuʼntzunju, in chin kubʼsane kywitze tuʼn tokx kyqʼon kyibʼe tjaqʼ kykawbʼil okslal ik tzeʼn kye, ex tjaqʼ kykawbʼil kykyaqil qeju in che aqʼunan kyuw junx kyukʼil.
17 Nimxix in chin tzalaje tuʼnju ma tzul Estéfanas, Fortunato ex Acaico tzalu wukʼile, porke nimxix ma che onin wiʼje, jaʼlo que mintiʼ ateʼye wukʼile.
18 Ma qeʼ nkʼuʼje kyuʼn, ax ikx kyeye ma qeʼ kykʼuʼje kyuʼn. Tuʼntzunju, kyqʼonke kyoklen xinaq* ik tzeʼn kye.
19 Qʼolbʼebʼil kyeye kyuʼn okslal ateʼ kyoj congregación te Asia. Ax ikx, qʼolbʼebʼil kyeye toj tbʼi Qajaw tuʼn Áquila ex Prisca ex kyuʼn kykyaqil okslal in nok kychmon kyibʼ toj kyja.
20 Qʼolbʼebʼil kyeye kyuʼn kykyaqil erman. Kyqʼolbʼem kyibʼe kyxolxe ex kytzʼubʼan el kywitze tukʼil tkyaqil kykʼuʼje.
21 Aqine Pablo, ex aqine ma chin kubʼ tzʼibʼinte qʼolbʼebʼil lu kyeye tukʼil nqʼabʼe.
22 Qa at jun mintiʼ tkʼujlalil tiʼj Qajaw, il tiʼj tuʼn tkubʼ tsentens. ¡Aya Qajaw, in qo kubʼsane twitza tuʼn tula!
23 Awttzun t-xtalbʼil Qajaw Jesús kyaj ten kyukʼile.
24 Kʼujlaʼn qeye kykyaqile wuʼne, aqeye okslal tiʼj Cristo Jesús.
