Tnejel a los Corintios 14:1-40
14 Kyqʼonke tilil tuʼn tkubʼ kyyekʼine kykʼujlabʼile, pero ax ikx kyqʼonke tilil tuʼn ttzaj qʼoʼn kyoklene in tzaj tqʼoʼn espíritu santo, mas aju oklenj tuʼn kyprofetizarine.
2 Porke aju xjal in yolin toj juntl yol, in yolin tukʼil Dios ex nya kyukʼil xjal, porke mi al jun in nel tnikʼ tiʼj, maske in yolin kyiʼj tyol Dios ewintoq tnejel tuʼn tonbʼil espíritu santo.
3 Pero aju xjal in profetizarin, in nonin kyiʼj txqantl tuʼn kychʼiy toj kyokslabʼil, in che bʼaj t-animarin ex in xi tqʼuqbʼaʼn kykʼuʼj kyukʼil tyol.
4 Aju xjal in yolin toj juntl yol, oʼkxte in chʼiy toj tokslabʼil. Atzunte xjal in profetizarin, in nonin kyiʼj kykyaqil okslal toj congregación tuʼn kychʼiy toj kyokslabʼil.
5 Wajbʼile tuʼn kyyoline kykyaqile kyoj junjuntl yol, pero aju mas wajbʼile aju tuʼn kyprofetizarine. Porke aju xjal in profetizarin, mas nim toklen twitzju xjal in yolin kyoj junjuntl yol. Bueno, oʼkx qa mintiʼ ma kubʼ ttraducirin xjal in yolin kyoj junjuntl yol aju in tqʼamaʼn xjal in profetizarin tuʼntzun tonin kyiʼj okslal toj congregación tuʼn kychʼiy toj kyokslabʼil.
6 Aqeye erman, qa ma chin pone kyukʼile in chin yoline kyoj junjuntl yol, ¿tiʼ tajbʼen kyeye qa mintiʼ ma txi nqʼamaʼne kyeye aju yol ma tzaj tqʼamaʼn Dios weye, qa mintiʼ ma txi nqʼamaʼne jun yol te ojtzqibʼil kyeye, qa mintiʼ ma txi nqʼamaʼne jun profecía kyeye ex qa mintiʼ ma txi nqʼoʼne xnaqʼtzbʼil kyeye?
7 Axju in bʼaj kyukʼil instrumento musical, ik tzeʼn jun flauta moqa jun arpa. Qa nya klar in qʼajt, ¿tzeʼn jaku tzʼel qnikʼ tiʼj alkye bʼitz?
8 Ex qa nya klar in qʼajt jun trompeta, ¿alkye kbʼajel tbʼinchan tten tuʼn t-xiʼ toj qʼoj?
9 Ax ikxtzun kyeye, qa ma che ajbʼen yol kwest tuʼn tel qnikʼ tiʼj kyuʼne, ¿tzeʼn jaku tzʼel kynikʼ xjal tiʼjju in kyqʼamaʼne? Kʼokel ik tzeʼn in che yoline tukʼil kyqʼiqʼ.
10 Twitz tkyaqil txʼotxʼ, in che yolinjtz nim yol ex kykyaqil at kytxolil.
11 Pero qa mintiʼ ma tzʼel nnikʼe tiʼjju in yolinjtz, chin okele ik tzeʼn jun stranjer xjal teju in yolin, ax ikx te xjal in yolin kʼokel ik tzeʼn jun stranjer xjal te weye.
12 Axju in bʼaj kyukʼile. Ya que kyajbʼile tuʼn tten kyoklene in tzaj tqʼoʼn espíritu santo, tzʼok tilil kyuʼne tuʼn tten nim kyoklene tuʼntzun kyonine kyiʼj okslal toj congregación tuʼn kychʼiy toj kyokslabʼil.
13 Tuʼntzunju, alkye in yolin toj juntl yol, qaninx te Dios tuʼn tonin tiʼj tuʼn tkubʼ ttraducirin aju in tqʼamaʼn.
14 Porke qa ma chin naʼne Dios toj juntl yol, a woklene o tzaj tqʼoʼn espíritu santo in naʼn Dios ex nya aqine. Tuʼntzunju, mintiʼ in nel nnikʼe tiʼjju in nqʼamaʼne.
15 Qa ikju, ¿tiʼtzun kbʼantel wuʼne? Ok chin naʼle Dios tukʼil oklenj o tzaj tqʼoʼn espíritu santo weye, pero ax ikx ok chin naʼle Dios toj jun yol aju jaku tzʼel nnikʼe tiʼj. Chin bʼitzale tukʼil oklenj o tzaj tqʼoʼn espíritu santo weye, pero ax ikx chin bʼitzale toj jun yol aju jaku tzʼel nnikʼe tiʼj.
16 Porke qa ma jaw kynimsaʼne Dios tukʼil kyoklene o tzaj tqʼoʼn espíritu santo tuʼn kyyoline toj juntl yol ex qa ma txi kyqʼoʼne chjonte te, ¿tzeʼn tten jaku txi tqʼamaʼn jun xjal «Amén» qa mintiʼ in nel tnikʼ tiʼjju in kyqʼamaʼne?
17 Ax tok, tbʼanel tzeʼn tten in xi kyqʼoʼne chjonte te Dios, pero mintiʼ in nonin tiʼj juntl xjal.
18 In xi nqʼoʼne chjonte te Dios tuʼnju mas in bʼant nyoline kyoj junjuntl yol kywitze.
19 Maske ikju, mas bʼaʼn toj nwitze tuʼn t-xi nqʼoʼne xnaqʼtzbʼil kye txqantl toj congregación tukʼil jweʼ yol aju jaku tzʼel kynikʼ tiʼj twitzju tuʼn t-xi nqʼamaʼne diez mil yol toj juntl yol aju mlay tzʼel kynikʼ tiʼj.
20 Aqeye erman, miʼn tzʼok kynabʼile ik tzeʼn tnabʼil jun kʼwal, sino ik tzeʼn tnabʼil jun xjal ma chʼiy. Noq oʼkx che oke ik tzeʼn qe kʼwal tukʼilju at toklen tukʼil nya bʼaʼn.
21 Porke e kyaj tzʼibʼin yol lu toj Ley: «‹Chin yolile kyukʼil xjal lu toj kyyol stranjer xjal ex che ajbʼel yol wuʼne aju mintiʼ ojtzqiʼn kyuʼn. Maske ikju, mlay txi kybʼiʼn nyole›, chi Jehová».*
22 Entonces aju qoklen tuʼn qyolin kyoj junjuntl yol, jun techel kye qeju nya okslal qeʼ ex nya kye okslal. Atzun qe profecía, jun techel kye qeju okslal qeʼ ex nya kye qeju nya okslal.
23 Tuʼntzunju, qa ma tzʼokx jun xjal moqa jun nya okslal jatumel ma tzʼok kychmon kyibʼe kykyaqile ex in nok tkeʼyin qa in che yoline kyoj junjuntl yol, ¿mlaypetzulo kubʼ t-ximen qa loc qeye?
24 Pero qa ma tzʼokx jun xjal moqa jun nya okslal jatumel ma tzʼok kychmon kyibʼe ex in nok tkeʼyin qa in che profetizarine kykyaqile, kjaqetel tnabʼil tuʼnju in nok tbʼiʼn ex kʼonil tiʼj tuʼn tkubʼ ten ximel tiʼjju in bʼant tuʼn.
25 Tuʼnju kʼelel toj qʼanchaʼl aju tkuʼx toj tanmi, kbʼel mutzeʼ twitz txʼotxʼ tuʼn tkʼulin twitz Dios ex ok tqʼama: «Qʼanchaʼlxix qa at Dios kyxole».
26 Aqeye erman, aj tok kychmon kyibʼe, ¿tiʼtzun kbʼantel kyuʼne? Jun qʼamanx jun salmo, juntl jun xnaqʼtzbʼil, juntl aju yol o tzaj tqʼamaʼn Dios te, juntl yolin toj juntl yol ex juntl traducirin kubʼ aju in tqʼamaʼn. Kybʼinchame tkyaqil tuʼn tbʼaj kyonin kyibʼe.
27 Qa ateʼ junjun in che yolin toj juntl yol, oʼkx che yolin kabʼe moqa oxe ex por turno, ax ikx il tiʼj tuʼn tkubʼ traducirin aju in kyqʼamaʼn tuʼn juntl.
28 Pero qa mintiʼ jun tuʼn tkubʼ ttraducirin aju in kyqʼamaʼn, mas bʼaʼn tuʼn miʼn kyyolin kyxol okslal, che yolin kyjunalx ex tukʼil Dios.
29 Ax ikx qa ateʼ profeta, oʼkx che yolin kabʼe moqa oxe, atzun kye txqantl che ximen tiʼj tiʼ tzʼelpuna aju in nok kybʼiʼn.
30 Pero qa ma tzaj tqʼamaʼn Dios tyol te juntl qʼuqli atz, alkyeju in yolin, ya miʼn yolin tuʼntzun tyolin juntl.
31 Porke kykyaqile jaku che profetizarine, oʼkx por turno, tuʼntzun tel kynikʼ kykyaqil tiʼj ex tuʼn kykyuwix toj kyokslabʼil.
32 Ex il tiʼj tuʼn kyximen profeta tiʼj tzeʼn in najbʼen oklenj kyuʼn aju o tzaj tqʼoʼn espíritu santo kye.
33 Porke nya tgan Dios aju desorden, sino tajbʼil tuʼn qten toj bʼaʼn.
Axju in bʼaj kyoj kykyaqil congregación kyxol okslal,*
34 mintiʼ tuʼn kyjaw yolin xuʼj* aj tok kychmon kyibʼ kykyaqil, porke mintiʼ qʼoʼn ambʼil kye tuʼn kyyolin. Mas bʼaʼn tuʼn tokx kyqʼon kyibʼ tjaqʼ tkawbʼil xinaq* ik tzeʼn in tzaj tqʼamaʼn Ley.
35 Qa kyajbʼil tuʼn tel kynikʼ tiʼj jun tiʼ, kyqaninx te kychmil aj kypon kyja, porke chʼixbʼajil te jun xuʼj qa ma jaw yolin aj tok kychmon kyibʼ kykyaqil okslal.
36 ¿Atzpe kyukʼile ma tzaj tyol Dios? ¿Oʼkxpe kyukʼile ma pon?
37 Qa at jun okslal in kubʼ t-ximen qa jun profeta moqa o tzaj qʼoʼn jun toklen tuʼn espíritu santo, il tiʼj tuʼn tel tnikʼ tiʼj qa tkyaqilju in kubʼ ntzʼibʼine tmandamyent Qajaw.
38 Pero alkye mintiʼ ma tzʼel tnikʼ tiʼj, kʼelel ikʼun tuʼn Dios.*
39 Tuʼntzunju, aqeye werman, che aqʼunane kyuw tuʼn kyprofetizarine ex miʼn txi kyqʼamaʼne te juntl qa nya bʼaʼn tuʼn tyolin toj juntl yol.
40 Pero kybʼinchame tkyaqil toj tumel ex en orden.
