Tnejel a los Corintios 6:1-20
6 Qa at jun problem kyxole tukʼil juntl, ¿tiquʼn in cheʼxe kyoj tribunal kywitz xjal mintiʼ in che ajbʼen te Dios ex nya kywitz tmajen Dios xjan?
2 ¿Mintiʼpe ojtzqiʼn kyuʼne qa aʼye tmajen Dios xjan che kbʼel juzgarin kye xjal? Ex qa aqeye che kbʼel juzgarin kye xjal, ¿ma mintiʼpe kynabʼile tuʼn t-xi kybʼinchaʼne kyiʼj problem nya nim kyoklen?
3 ¿Ma mintiʼpe ojtzqiʼn kyuʼne qa che kbʼel qjuzgarin qe anjel? Qa ikju, ¿nyapetzun mas fácil tuʼn tkyaj bʼant kyiʼj problem in che tzaj toj qanqʼibʼil jaʼlo?
4 Tuʼntzunju, qa il tiʼj tuʼn t-xi kybʼinchaʼne tiʼj jun problem, ¿tiquʼntzun in cheʼxe kywitz jwes aqeju mintiʼ kyoklen kyxol erman?
5 In xi nqʼamaʼne jlu kyeye tuʼn ttzaj kychʼixwiye. ¿Mintiʼpe jun xinaq* kyxole aju at tnabʼil tuʼn t-xi tbʼinchaʼn kyiʼj problem in che tzaj kyxol terman?
6 Pero atzun jlu in bʼant kyuʼne: in xi tiʼn jun erman juntl erman toj tribunal kywitz qeju nya okslal qe.
7 Tuʼntzunju, chʼixbʼajilxix kyeye qa in xi kyiʼne jun erman twitz tribunal. ¿Nyapetzun mas bʼaʼn tuʼn tok bʼinchaʼn nya bʼaʼn kyiʼje? ¿Nyapetzun mas bʼaʼn tuʼn t-xi elqʼan aju at kyeye?
8 Pero atzun kyeye in nok kybʼinchaʼne nya bʼaʼn kyiʼjx kyermane ex in che elqʼane kyiʼj.
9 ¿Mintiʼpe bʼiʼn kyuʼne qa mintiʼ kyoklen xjal nya tzʼaqli tiʼj Tgobierno Dios? Miʼn kubʼ kysbʼun kyibʼe. Porke qe xjal in che yaẍin,* qeju in che kʼulin kywitz imagen, qeju aj pajil, qe xinaq in nok kyqʼoʼn kyibʼ te xuʼj* tuʼn kyok ten xinaq kyiʼj, qe xinaq in che kubʼ ten tukʼil juntl xinaq,
10 qeju eleqʼ, qeju in pon kykʼuʼj tiʼjju at te juntl, qeju in che kʼan nim qʼeʼn, qeju in che yasun* ex qeju in che extorsionarin, mintiʼ kyoklen tiʼj Tgobierno Dios.
11 Atzun jlu bʼant kyuʼn junjun kyeye ojtxe. Pero jaʼlo ya o che txʼajete, o che ok qʼoʼne te xjan, ex o che ok qʼoʼne te tzʼaqli toj tbʼi Qajaw Jesucristo ex tuʼn t-espíritu santo Dios.
12 Tkyaqil jaku bʼant wuʼne, pero nya tkyaqil jaku tzaj tiʼn bʼaʼn. Tkyaqil jaku bʼant wuʼne, pero mlay txi nqʼoʼn wibʼe tuʼn ntene tjaqʼ tkawbʼil jun tiʼ.
13 Porke aju wabʼj te qkʼuʼj, atzunte qkʼuʼj te wabʼj ex kykabʼil che najel tuʼn Dios. Ex aju qxmilal nya atz tuʼn tajbʼen te yaẍbʼil* sino te Qajaw, atzunte Qajaw tuʼn tajbʼen te qxmilal.
14 Pero jaw anqʼin Qajaw tuʼn Dios kyxol kyimni, ax ikx qe qo jawel anqʼin kyxol kyimni tuʼn tukʼil tipumal.
15 ¿Mintiʼpe bʼiʼn kyuʼne qa te Cristo kyxmilale? Qa ikju, ¿okpe kʼelel wiʼne aju te Cristo tuʼn tok mojbʼet tukʼil jun prostituta? ¡Mlayx!
16 ¿Mintiʼpe ojtzqiʼn kyuʼne qa aj tok tmojbʼan tibʼ jun xjal tukʼil jun prostituta in che ok te junx kyxmilal? Porke tqʼama Dios jlu: «Kykabʼil che okel te junx».
17 Pero alkye in nok tmojbʼan tibʼ tukʼil Qajaw, junx t-ximbʼetz* in ten tukʼil.
18 Tuʼntzunju, ¡kyel oqe tiʼjju yaẍbʼil!* Porke alkyexku juntl il in tbʼinchaʼn jun xjal, nya tiʼj t-xmilal in nok tbʼinchaʼn il, pero alkyexku in bʼinchan yaẍbʼil, in bʼinchan il tiʼjx t-xmilal.
19 ¿Mintiʼpe ojtzqiʼn kyuʼne qa ik tten kyxmilale ik tzeʼn jun templo tuʼn tanqʼin espíritu santo toj? Ex a Dios tzaj qʼonte espíritu santo lu kyeye ex nya aqeye tajaw kyxmilale.
20 Porke nim kywiʼye ma chjet tuʼn Dios tuʼn kylaqʼete tuʼn. Tuʼntzunju, tzʼajbʼen kyxmilale kyuʼne tuʼn tjaw kynimsaʼne Dios.
Tqanil
^ Toj junjuntl lugar «ichan».
^ Qʼonka twitza kyiʼj yol yaẍbʼil, aj pajil toj diccionario.
^ Toj junjuntl lugar «qya».
^ Moqa «jun xjal in nok tbʼinchaʼn nya bʼaʼn kyiʼj txqantl tukʼil tyol».
^ Toj griego pornéia. Qʼonka twitza tiʼj diccionario.
^ Toj griego «junx tanmi».
^ Toj griego pornéia. Qʼonka twitza tiʼj diccionario.
