Dwoko ma Muma Chiwo

 En adier ni waluoro tho nikech en jasigu kendo watimoga duto ma wanyalo mondo wageng’ tho. (1 Jo-Korintho 15:26) Kata kamano, nitie ji mathoth moluoro tho ahinya kendo “[mosebedo] e bwo tuech kuom ngimagi duto” nikech puonj mag miriambo kod timbe mag juok motudore gi tho. (Jo-Hibrania 2:15) Ng’eyo adiera e wi tho biro konyi mondo kik iluor tho ahinya e okang’ ma obiro moni dak gi mor.​—Johana 8:32.

Adiera e wi tho

•   Jomotho ok ong’eyo gimoro amora. (Zaburi 146:4) Nikech Muma pimo tho gi nindo, ok onego ibed maluor ni ibiro sandi bang’ kisetho.​—Zaburi 13:3; Johana 11:11-14.

•   Jomotho ok nyal hinyowa. Kata jo mahundu mosetho “yueyo gi oganda mar jo motho.” (Ngeche 21:16) Muma wacho ni “sigu kaachiel gi nyiego ma ne gin-go oselal nono.”​—Eklesiastes 9:6.

•   Ok ochuno ni tho e ma obed giko mar ngima ng’ato. Nyasaye biro chiero jomotho, to mano biro miyo gibed mangima kendo.​—Johana 5:28, 29; Tich Joote 24:15.

•   Nyasaye singo ni nitie kinde ma tho “ok nobedie kendo.” (Fweny 21:4) Muma wacho kama e wi kindeno: “Jo makare nobed weg piny, kendo ginidagie nyaka chieng’,” ka gionge luoro moro amora mar tho.​—Zaburi 37:29.