Luka 21:1-38
21 Koro ka noting’o wang’e malo, noneno jomwandu ka luto michgi e sanduge mag keno.
2 Eka noneno chi liel moro modhier ka luto pesa ma mingli ariyo ma nigi nengo matin ahinya,
3 mi nowacho kama: “Adier awachonu ni, chi liel modhierni oseluto moloyo jogi duto.
4 Nimar jogi duto oluto michgo koa kuom gigegi momedore, to en, kata obedo ni odhier, oseluto duto ma dokonyrego e ngimane.”
5 Bang’e, sama jomoko ne wuoyo kuom kaka hekalu ne obidh gi kite mabeyo kod gik mowal ne Nyasaye,
6 nowacho kama: “To kuom gik ma unenogi, ndalo biro ma onge kidi ma biro dong’ e wi kidi wadgi ma ok nowit piny.”
7 Eka ne gipenje niya: “Japuonj, kuom adier karang’o ma gigi biro timoree, to en ranyisi mane ma biro nyiso kinde ma gigi onego otimree?”
8 Nodwoko kama: “Tang’uru mondo kik ng’ato mi ulal, nimar ji mang’eny nobi ka gitiyo gi nyinga ka giwacho kama, ‘An e en,’ kendo ni, ‘Kinde ma ne oket chiegni.’ Kik uluw bang’gi.
9 E wi mano, ka uwinjo wach lwenje kod tungni, kik uluor. Nikech gigi nyaka timre mokwongo, kata kamano giko to ok bi timore gikanyono.”
10 Eka nokonegi niya: “Oganda noked gi oganda, kendo pinyruoth noked gi pinyruoth.
11 Yiengni madongo mag piny nobedie, bende kamoro bang’ machielo chiemo nobed manok kendo tuoche ma landore nobedie; kendo gik ma kelo luoro nonenre, kendo ranyisi madongo noa e polo.
12 “To ka pok magi duto otimore, ji nomaku kendo ginisandu ka gichiwou e sunagoke kod ute tuech. Noteru e nyim ruodhi kod joloch nikech nyinga.
13 Mano nomiu thuolo mar chiwo neno.
14 Kuom mano, kik uparru motelo e chunyu kuom gima ubiro dwoko,
15 nimar abiro miyou weche kod rieko ma onge ja akwede kata achiel ma nyalo tamore, kata kwedo.
16 E wi mano, kata mana jonyuolu gi oweteu gi wedeu kod osiepeu nondhogu kendo ginineg moko kuomu,
17 mi ji duto nosin kodu nikech nyinga.
18 To onge kata mana achiel kuom yie wiu ma biro lal.
19 Kuom nano maru, unures ngimau.
20 “Kata kamano, ka unune ka jolweny mogoyo kambi olworo Jerusalem, eka ng’euru ni kethruok mare osekayo machiegni.
21 Eka joma ni Judea mondo ochak ringo ka gidhi e gode, joma ni ei Jerusalem oa e iye, kendo joma ni e gwenge mokiewo kode kik donj e iye,
22 nikech mago gin ndalo kum mondo eka gik moko duto mondik ochop.
23 Yaye, nobed malit ne mon ma yach kod mago ma dhodho nyithindo e ndalono! Nikech masira maduong’ nobedie e pinyno kod mirima e wi jogi.
24 Mi noneggi gi ligangla kendo nomakgi ka joma otue mi tergi e pinje mag ogendni duto, kendo ogendni mamoko biro nyono Jerusalem nyaka chop kinde ma ne oket ne ogendnigo orum.
25 “Bende, ranyisi madongo nonenre e wang’-chieng’ gi dwe kod e sulwe, kendo ogendni mag piny nobed e chandruok malit, ma ok gining’e gima ginyalo timo nikech wuo kod chochni mar nam.
26 Chuny ji biro a nikech luoro kendo nikech gik ma biro timore e piny, nimar ibiro yieng teko mag polo.
27 Eka ginine Wuod dhano ka biro e bor polo ka en gi teko kod duong’ mang’ongo.
28 To sama gigi ochako timore, chung’uru tir kendo uting’ wiu malo nikech resruoku okayo machiegni.”
29 Eka nogoyo ngero moro kama: “Nonuru yadh ng’owo kod yien mamoko duto.
30 Sama uneno ka giloth, un uwegi ung’eyo ni koro kinde oro chiegni.
31 Kamano bende, sama uneno gigi ka timore, ng’euru ni Pinyruodh Nyasaye chiegni.
32 Adier awachonu ni, tieng’ni ok bi kalo ngang’ nyaka chop gigi duto timre.
33 Polo gi piny biro kalo, to wechena ok nokal ngang’.
34 “To tang’uru ahinya mondo chunyu kik pong’ ngang’ gi ich-lach, gi metho ahinya, kod parruok mag ngima, mi chieng’no chopnu apoya
35 kaka obadho. Nikech nobi kuom ji duto modak e wang’ piny mangima.
36 Kuom mano, sikuru ka uneno, ka usayo kinde duto mondo ubed gi nyalo mar tony kuom gigo duto ma nyaka timre kod nyalo mar chung’ e nyim Wuod dhano.”
37 Omiyo, godiechieng’ nojapuonjo e hekalu to gotieno nojawuok oko kae to odhi obet e got miluongo ni Got Zeituni.
38 Kendo ji duto ne biroga ire gokinyi ahinya mondo giwinje e hekalu.
