Dwoko Penjo mag Muma
Be chieng’ wanabed gi sirkal achiel ma locho e wi piny mangima?
Par ane kaka sirkal ma locho e wi piny mangima nyalo konyo dhano duto. Kindegi, ji mang’eny chandore nikech gidhier ahinya, to jomamoko omewo miwuoro. Kata kamano, sirkal ma locho e wi piny mangima kendo ma dewo ji duto, biro neno ni ng’ato ka ng’ato oyudo gik mochando e ngima. Be iparo ni nitie sirkal mar dhano ma nyalo timo kamano?—Som Yeremia 10:23.
Onge kinde moro amora ma sirkal mar dhano oseritoe joge e yo maber, to moloyo jomodhier. E pinje moko, joloch sando ji. (Eklesiastes 4:1; 8:9) Kata kamano, Nyasaye Manyalo Duto osesingo ni obiro kelo sirkal moro ma biro kawo kar sirkandegi duto. Jaloch mar sirkandno biro rito joge maber.—Som Isaiah 11:4; Daniel 2:44.
Pinyruodh Nyasaye biro timo ang’o?
Jehova Nyasaye oseyiero Wuode Yesu mondo obed Jaloch mowinjore mar piny mangima. (Luka 1:31-33) Kinde ma Yesu ne nie piny, ne okonyoga ji ahinya. Nikech en Ruoth, obiro riwo ji moa e ogendni duto kendo obiro tieko chandruoge duto.—Som Zaburi 72:8, 12-14.
Be ji duto biro winjo Yesu kaka Jaloch? Ooyo. Kata kamano, Jehova pod hore. (2 Petro 3:9) Pod omiyo ji thuolo mondo giyie kuom Yesu kaka Jaloch. Yesu chiegni kawo okang’ mar golo joma richo duto e piny, kendo obiro kelo kuwe kod arita maber e piny mangima.—Som Mika 4:3, 4.