လံာ်စီဆှံ​လၢ ကြံး​ကျိာ်​တ​ကတြူၢ်​အ​ပူၤ​ပာ်ဖျါ​ထီၣ်ဝဲ စီၤ​ဘၢ်နါဘၤ​ဒီး​တၢ်မၢဖိ​ပီလူး​အဂ့ၢ် ခဲအံၤ​ခဲအံၤ​လီၤ. အဝဲသ့ၣ်​မၤတၢ်​ဒ် ပှၤ​လဲၤတရံး​အံးက့ၤ​ကွၢ်က့ၤ​တၢ်​တဖၣ် ဒီး​လဲၤ​ဟး​အိၣ်သကိး​ဝဲ ခရံာ်ဖိ​အ​တၢ်​အိၣ်ဖှိၣ်​တဖၣ်​လၢ တၢ​ယၤဖှိၣ်​နံၣ်​အတီၢ်ပူၤ​လီၤ. လၢ​မနုၤ​အဃိ​လဲၣ်. မ့ၢ်​လၢ​အဝဲသ့ၣ်​သူၣ်အိၣ်​သးအိၣ်ဝဲ ခရံာ်ဖိ​ဒီပုၢ်ဝဲၢ်​တဖၣ် အဃိ​လီၤ. စီၤ​ပီလူး​အဲၣ်ဒိး​သ့ၣ်ညါ​ဝဲ ဒီပုၢ်ဝဲၢ်​တဖၣ်​အ​တၢ်အိၣ်သး​အိၣ်​ဒ်လဲၣ်​အဃိ စံး​ဝဲ​လၢ​အဝဲ​အဲၣ်ဒိး “က့ၤကဒါက့ၤ ဒီး​ကွၢ်က့ၤ​အီၤ” လီၤ. အဝဲ​အသး​အိၣ်​လဲၤတၢ်​လၢ အ​မံးလာ်​လၢ​အ​ကယၤ​လၢ က​ဟ့ၣ်ဂံၢ်​ဟ့ၣ်ဘါ ဒီပုၢ်ဝဲၢ်​တဖၣ်​အဂီၢ်​လီၤ. (မၤတၢ် ၁၅:၃၆) မုၢ်မဆါ​တနံၤ​အံၤ ပှၤ​လဲၤတရံး​အံးက့ၤ​ကွၢ်က့ၤ​တၢ်​တဖၣ်​စ့ၢ်ကီး အိၣ်ဒီး​တၢ်​ပာ်သူၣ်​ပာ်သး​ဒ်သိး​ဒီး တၢ်မၢဖိ​ပီလူး​လီၤ.

အဝဲသ့ၣ် ဟဲ​ဟ့ၣ်ဂံၢ်​ဟ့ၣ်ဘါ​ပှၤ. လၢ​တနံၣ်​အတီၢ်ပူၤ​န့ၣ် ကဝီၤ​အပှၤကွၢ်တၢ်​တဖၣ် လဲၤ​ဟး​အိၣ်သကိး​ဝဲ တၢ်​အိၣ်ဖှိၣ်​အ​ဖု ၂၀ ဃၣ်ဃၣ်​လီၤ. တနံၣ်​န့ၣ်​လဲၤ​ဟး​အိၣ်သကိး​ဝဲ ခံ​ဘျီ​ဒီး လဲၤဝဲ​တဘျီ​န့ၣ် ယံာ်ဝဲ​တနွံ​လီၤ. ပ​ဒိးန့ၢ်​ဘၣ်​တၢ်ဘျုး​တၢ်ဖှိၣ်​အါမး​လၢ ဒီပုၢ်ဝဲၢ်​ခွါ​တဖၣ်​အံၤ​အ​တၢ်​လဲၤခီဖျိ​အဃိ ဒီး​အဝဲသ့ၣ်​မ့ၢ်​အိၣ်ဒီး​အမါ​န့ၣ် ပ​ဒိးန့ၢ်​ဘၣ်​စ့ၢ်ကီး တၢ်ဘျုး​တၢ်ဖှိၣ်​လၢ ဒီပုၢ်ဝဲၢ်​ခွါ​တဖၣ်​အံၤ​အမါ အ​အိၣ်​လီၤ. ကဝီၤ​အပှၤကွၢ်တၢ်​တဖၣ် ဒီး​အဝဲသ့ၣ်​အမါ​န့ၣ် ဂုာ်ကျဲးစၢး​မၤ​သ့ၣ်ညါ​အသး​ဒီး ပှၤသးစၢ်​ဒီး​သးပှၢ်​တဖၣ်​လီၤ. ဒီး​အဝဲသ့ၣ်​န့ၣ်​အ​သးဆူၣ်​လၢ က​မၤ​သကိး​ဃုာ်​တၢ်​ဒီး​ပှၤ​ဖဲ ပ​လဲၤ​စံၣ်တဲၤ​တဲလီၤ တၢ်​လၢ​ပှၤ​ဟံၣ်​အဆၢ​ကတီၢ်​န့ၣ်​လီၤ. ပှၤ​အံးက့ၤ​ကွၢ်က့ၤ​တၢ်​တဖၣ်​အံၤ ဃုာ်ဒီး​တၢ်​အိၣ်ဖှိၣ်​သးပှၢ်​န့ၣ် လဲၤ​ဟး​အိၣ်သကိး​ဝဲ တၢ်​အိၣ်ဖှိၣ်​ဖိ​လီၤ. ဒီး​အဝဲသ့ၣ်​ဟ့ၣ်​တၢ်​စံၣ်တဲၤ​တဲလီၤ​လၢ တၢ်​အိၣ်ဖှိၣ်​ရိဖှိၣ်​ဒီး တၢ်​အိၣ်ဖှိၣ်​ဖးဒိၣ်အ​ပူၤ​လၢ အ​ဟ့ၣ်​ဆူၣ်​ထီၣ်​ဝဲဒၣ် ပ​နီၢ်သး​တၢ်ဂံၢ်​တၢ်​ဘါလီၤ.—မၤတၢ် ၁၅:၃၅.

အဝဲသ့ၣ်​ပာ်ဖျါ​ဝဲ တၢ်​သးအိၣ်​ပှၤဂၤ. ကဝီၤ​အပှၤကွၢ်တၢ်​တဖၣ်​န့ၣ် အသး​စဲ​ဝဲ​တၢ်​အိၣ်ဖှိၣ်​တဖၣ် အ​တၢ်အိၣ်သး​လၢ​နီၢ်သး​တခီ​လီၤ. အဝဲ​ထံၣ်​လိာ်သး​ဒီး တၢ်​အိၣ်ဖှိၣ်​သးပှၢ်​တဖၣ် ဒီး​တၢ်​အိၣ်ဖှိၣ်​အ​ပှၤ​မၤစၢၤ​တၢ်​တဖၣ်​လၢ က​ကွၢ်ကဒါ​က့ၤ​တၢ်​လဲၤထီၣ်​လဲၤထီ ဒီး​ဟ့ၣ်ကူၣ်​အဝဲသ့ၣ်​လၢ က​ကဲထီၣ်​တၢ်မၤစၢၤ ဒ်သိး​အဝဲသ့ၣ်​သုးကျဲၤဝဲ အ​မူဒါ​တဖၣ်​က​သ့​ဂ့ၤဂ့ၤ​အဂီၢ်​န့ၣ်​လီၤ. အဝဲသ့ၣ်​မၤစၢၤ ပှၤလဲၤလၢညါ​တဖၣ်​လၢ အ​တၢ်သးခု​ကစီၣ်​တၢ်မၤ က​ဂုၤထီၣ်​ပသီထီၣ်​အဂီၢ်​လီၤ. အဝဲသ့ၣ်​ကျဲးစၢး​မၤ​သ့ၣ်ညါ​အသး​ဒီး ပှၤ​အသီ​တဖၣ်​ဒီး​အဲၣ်ဒိး​နၢ်ဟူ​ဝဲ​အဝဲသ့ၣ် အ​တၢ်​ဒိၣ်ထီၣ်​ထီထီၣ်​လၢ တၢ်မ့ၢ်​တၢ်တီ​ပူၤ​ဒ်လဲၣ်​အဂ့ၢ်​န့ၣ်​လီၤ. ဒီပုၢ်ဝဲၢ်​ခွါ​တဖၣ်​အံၤန့ၣ် ဟ့ၣ်လီၤ​အသး​လၢာ်​လၢာ်​ဆ့ဆ့ ဒီး​မၤတၢ်​ဒ် “ဂိၤမီၣ်” လၢ​က​မၤစၢၤ​ပှၤ​အဂီၢ်​လီၤ. (၂ ကရံၣ်သူး ၈:၂၃) ပ​ကြၢး​ကွၢ်လိမၤဒိး အဝဲသ့ၣ်​အ​တၢ်စူၢ်​တၢ်နာ် ဒီး​အ​တၢ်ဟ့ၣ်​လီၤသး​လၢ​ယွၤ​လီၤ.—ဧ့ၤဘြံၤ ၁၃:၇.

• ဘၣ်​မနုၤ​အဃိ ကဝီၤ​အပှၤကွၢ်တၢ်​တဖၣ် လဲၤ​အိၣ်သကိး​တၢ်​အိၣ်ဖှိၣ်​တဖၣ်​န့ၣ်​လဲၣ်.

• ဖဲ​အဝဲသ့ၣ်​လဲၤ​ဟး​အိၣ်သကိး ပ​တၢ်​အိၣ်ဖှိၣ်​န့ၣ် ပ​ဒိးန့ၢ်​ဘၣ်​တၢ်​အဘျုး​မနုၤ​လဲၣ်.