အိၣ်ကတဲာ်ကတီၤနသးလၢ နကအိၣ်မူဘၣ်လၢ ဟီၣ်ခိၣ်ပၤရဒံစူး အပူၤတက့ၢ်
“မၢအမၤဂ့ၤတၢ်, . . . ဒ်သိးအကဂုာ်ဟံးန့ၢ်တၢ်မူအထူအယိာ် န့ၣ်တက့ၢ်လီၤ.”—၁ တံၤမသ့း ၆:၁၈, ၁၉.
တၢ်သးဝံၣ်- ၁၂၅, ၄၀
၁, ၂. (က) လၢပၤရဒံစူးအပူၤန့ၣ် နဆၢမုၢ်လၢ် တၢ်မနုၤလဲၣ်. (ကွၢ်တၢ်ဂီၤလၢ တၢ်မၤလိ အခီၣ်ထံးတက့ၢ်.) (ခ) လၢဟီၣ်ခိၣ် ပၤရဒံစူးအပူၤ တၢ်သူၣ်ဖှံသးညီ အဒိၣ်ကတၢၢ်လၢ ပကဒိးန့ၢ်ဘၣ်န့ၣ် မ့ၢ်တၢ်မနုၤလဲၣ်.
ပအိၣ်ခိးကွၢ်လၢ် “တၢ်မူအထူအယိာ်” သပှၢ်ကတၢၢ်လီၤ. (ဖး ၁ တံၤမသ့း ၆:၁၂, ၁၉ တက့ၢ်.) အါဒၣ်တၢ်တက့ၢ် ပှၤလၢ အဒိးန့ၢ်ဘၣ်တၢ်မူန့ၣ် ကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤ လီၤထူလီၤယိာ်လီၤ. ဖဲန့ၣ်အခါ ပကပှဲၤဒီး တၢ်အိၣ်ဆူၣ်အိၣ်ချ့, တၢ်သးခု ဒီးတၢ်သူၣ်မံသးမုာ် ကိးနံၤဒဲးလီၤ. (ယၡါယၤ ၃၅:၅, ၆) ဆိကမိၣ်ကွၢ် လၢပကထံၣ်လိာ်ဘၣ်က့ၤပသး ဒီးပဟံၣ်ဖိဃီဖိ ဒီးပတံၤသကိး လၢအသံတ့ၢ်တဖၣ်န့ၣ်တက့ၢ်. (ယိၤဟၣ် ၅:၂၈, ၂၉; မၤတၢ် ၂၄:၁၅) နကအိၣ်ဒီး တၢ်ဆၢကတီၢ်လၢ နကမၤလိဘၣ် တၢ်သ့တၢ်ဘၣ် လၢအသီတဖၣ်အဃိ နကသးခုလီၤ. အဒိ နကမၤလိအါထီၣ် ဘၣ်ဃးစဲအ့ၣ်အဂ့ၢ်လီၤ. ဒီးနမၤလိ တၢ်ဒ့တၢ်အူတဖၣ် မ့တမ့ၢ် နတ့ထီၣ်နဟံၣ်နဃီ သ့ဝဲလီၤ.
၂ ပမုၢ်လၢ်လၢ ပကဒိးန့ၢ်ဘၣ် တၢ်ဆိၣ်ဂ့ၤတဖၣ်အံၤလီၤ. ဘၣ်ဆၣ် တၢ်လၢအကမၤသးဖှံပှၤ အဒိၣ်ကတၢၢ်န့ၣ် မ့ၢ်တၢ်ဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. ထံၣ်တမှံကွၢ်လၢ ပှၤခဲလၢာ် ကပာ်စီဆှံ ယဟိဝၤယွၤအမံၤ ဒီးတူၢ်လိာ်ယဟိဝၤယွၤလၢ အဝဲသ့ၣ် အတၢ်ပၢကစၢ်န့ၣ်တက့ၢ်. (မးသဲ ၆:၉, ၁၀) ပကသူၣ်ပိၢ်သးဝးဒိၣ်မး မ့ၢ်လၢ ပထံၣ်ဘၣ် ဟီၣ်ခိၣ်ဒီဘ့ၣ် ပှဲၤဝဲဒီးပှၤလၢပှၤပှဲၤ ဒ်ကစၢ်ယွၤ တိာ်ပာ်ဝဲအသိးန့ၣ်လီၤ. ဆိကမိၣ်ကွၢ် ဒ်ပဟဲလၢထီၣ်ပှဲၤထီၣ်ဝဲ ကယီကယီအသိး ပတၢ်ရ့လိာ်သးဒီး ယဟိဝၤယွၤစ့ၢ်ကီး ကဂ့ၤထီၣ်ဝဲလီၤ. —စံးထီၣ်ပတြၢၤ ၇၃:၂၈; ယၤကိာ် ၄:၈.
၃. ခဲအံၤ ပကြၢးကတဲာ်ကတီၤပသး ဒ်လဲၣ်.
၃ ပနာ်လၢ ယဟိဝၤယွၤ ကမၤဝဲတၢ်လီၤလိၢ်လီၤလး သ့ၣ်တဖၣ်အံၤ မ့ၢ်လၢ “ယွၤန့ၣ်သ့တၢ်လၢာ်လီၤ.” (မးသဲ ၁၉:၂၅, ၂၆) ပမ့ၢ်အဲၣ်ဒိးအိၣ်မူ လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤန့ၣ် ခဲအံၤမ့ၢ်တၢ်ဆၢကတီၢ်လၢ ပကဘၣ် “ဂုာ်ဟံးန့ၢ်” တၢ်မူအထူအယိာ်လီၤ. ပသ့ၣ်ညါလၢ တၢ်အကတၢၢ် ကဟဲဘူးထီၣ်လံအဃိ ပတၢ်အိၣ်မူန့ၣ် ကဘၣ်ပာ်ဖျါထီၣ် လၢပအိၣ်ကတဲာ်ကတီၤပသး ကိးဆၢကိးကတီၢ်ဒဲး လၢတၢ်အကတၢၢ်ကဟဲအဂီၢ်လီၤ. တသ့ဖဲအသ့ ခဲအံၤန့ၣ် ပကဘၣ်ဂုာ်ကျဲးစၢးကတဲာ်ကတီၤပသးလၢ ပကအိၣ်မူဘၣ်လၢ ဟီၣ်ခိၣ် ပၤရဒံစူးအပူၤန့ၣ်လီၤ. ပကဘၣ်ကတဲာ်ကတီၤပသး ဒ်လဲၣ်န့ၣ် ပကမၤလိသကိး တၢ်ဂ့ၢ်တဖၣ်အံၤလီၤ.
ပကဘၣ် ကတဲာ်ကတီၤပသး ဒ်လဲၣ်
၄. ခဲအံၤန့ၣ် ပကတဲာ်ကတီၤပသးလၢ ပကအိၣ်မူဘၣ်လၢ ဟီၣ်ခိၣ် ပၤရဒံစူးအပူၤ ကသ့ဒ်လဲၣ်. ဟ့ၣ်တၢ်အဒိတက့ၢ်.
၄ ခဲအံၤန့ၣ် ပကတဲာ်ကတီၤပသးလၢ ဟီၣ်ခိၣ်ပၤရဒံစူးအဂီၢ် ကသ့ဒ်လဲၣ်. ပမ့ၢ်ပာ်လီၤပသးလၢ ပကလဲၤအိၣ်လၢ ထံကီၢ်အဂၤ တဘ့ၣ်ဘ့ၣ်န့ၣ် ပကကတဲာ်ကတီၤဆိပာ်ပသး ဒ်သိး ပလဲၤအိၣ်လၢ ထံကီၢ်တဘ့ၣ်န့ၣ်အပူၤ ကသ့အဂီၢ်လီၤ. အဒိ ပကစးထီၣ်မၤလိ ပှၤအိၣ်ဖဲန့ၣ်တဖၣ်အကျိာ်, အတၢ်ဆဲးတၢ်လၤ ဒီးဘၣ်သ့ၣ်သ့ၣ်ပကအီၣ်ကွၢ် အဝဲသ့ၣ် အတၢ်အီၣ်န့ၣ်လီၤ. ဒ်န့ၣ်အသိး ပကဘၣ်ဆိကမိၣ်ကွၢ်လၢ ပတၢ်အိၣ်မူလၢ ဟီၣ်ခိၣ်ပၤရဒံစူးအပူၤန့ၣ် ကမၤအသးဒ်လဲၣ်. ဒီးအဆၢကတီၢ်ခဲအံၤန့ၣ် ပကဘၣ်ဆီတလဲ ပတၢ်အိၣ်မူ ဒ်သိး ပကကတဲာ်ကတီၤဆိပသးလၢ ဟီၣ်ခိၣ်ပၤရဒံစူးအဂီၢ်န့ၣ်လီၤ. ပမၤကသ့ဒ်လဲၣ်န့ၣ် ပကသမံသမိးကွၢ် တၢ်ဂ့ၢ်တနီၤန့ၣ်လီၤ.
၅, ၆. ပမ့ၢ်ဂုာ်ကျဲးစၢးဒိကနၣ် ယဟိဝၤယွၤ အတၢ်ကရၢကရိ အတၢ်ဟံးစုနဲၣ်ကျဲန့ၣ် ကမၤစၢၤပှၤ ဒ်သိး ပကကတဲာ်ကတီၤပသးလၢ ပကအိၣ်မူဘၣ်လၢ ဟီၣ်ခိၣ် ပၤရဒံစူးအပူၤဒ်လဲၣ်.
၅ ဟီၣ်ခိၣ်တဘ့ၣ်အံၤအပူၤ မုၣ်ကီၤလံၢ်အဲၣ်ဒိးဝဲလၢ ပှၤဟီၣ်ခိၣ်ဖိတဖၣ် ကဆိကမိၣ်ဝဲလၢ အဝဲသ့ၣ်မၤဖဲအသး သ့ဝဲလီၤ. ပှၤအါဂၤ ဆိကမိၣ်ဝဲလၢ တၢ်အိၣ်မူလၢအပှဲၤဒီး တၢ်သဘျ့န့ၣ် မ့ၢ်တၢ်လၢအရ့ဒိၣ်န့ၣ်လီၤ. ဒီးအဝဲသ့ၣ် ဆိကမိၣ်ဝဲလၢ ပတလိၣ်ဒိကနၣ် ကစၢ်ယွၤအကလုၢ်ဘၣ်. လၢတၢ်န့ၣ်အဃိ တၢ်ဟဲကဲထီၣ်အသးဒ်လဲၣ်. တၢ်နးတၢ်ဖှီၣ်ဒီး တၢ်သူၣ်အုးသးအုး ဟဲအိၣ်ထီၣ်ဝဲ အါမးလီၤ. (ယံးရမံယၤ ၁၀:၂၃) ဘၣ်ဆၣ် ယဟိဝၤယွၤန့ၣ် မ့ၢ်ပှၤပၢတၢ်လၢ အပှဲၤဒီးတၢ်အဲၣ်တဂၤလီၤ. လၢဟီၣ်ခိၣ်ပၤရဒံစူးအပူၤန့ၣ် ပှၤကိးဂၤဒဲးကဒိကနၣ် ကစၢ်ယွၤအကလုၢ်အဃိ ပတၢ်အိၣ်မူ ကဂ့ၤထီၣ်ထဲလဲၣ်.
၆ လၢဟီၣ်ခိၣ် ပၤရဒံစူးအပူၤန့ၣ် ပကမၤထွဲတၢ်နဲၣ်လိလၢ ယဟိဝၤယွၤ အတၢ်ကရၢကရိအအိၣ် ဒ်သိးပကမၤကဲထီၣ် ဟီၣ်ခိၣ်အံၤလၢ ပၤရဒံစူးဃံလၤ ဒီးသိၣ်လိပှၤလၢ ကဂဲၤဆၢထၢၣ်သမူထီၣ်က့ၤတဖၣ် အဂီၢ်န့ၣ်လီၤ. ယဟိဝၤယွၤ ကဟ့ၣ်ပှၤ တၢ်မၤအါမးလီၤ. ဘၣ်ဆၣ်, ပှၤလၢအတီခိၣ်ရိၣ်မဲတၢ်တဖၣ် မ့ၢ်မၢနမၤတၢ်တမံၤမံၤလၢ နတအဲၣ်ဒိးမၤန့ၣ် နကဒိကနၣ် အကလုၢ်ဧါ. ဒ်သိးပကမၤလၢပှဲၤ ပမူဒါအဂီၢ် မ့ၢ်ပကဂုာ်ကျဲးစၢးလၢအဂ့ၤကတၢၢ် ဒီးမၤအီၤလၢတၢ်သူၣ်အိၣ်သးအိၣ်အပူၤန့ၣ်ဧါ. ပကကတဲာ်ကတီၤပာ်စၢၤပသး လၢပကအိၣ်မူဘၣ်လၢ ဟီၣ်ခိၣ် ပၤရဒံစူးအပူၤ လီၤထူလီၤယိာ်အဂီၢ် ပကဘၣ်ဒိကနၣ် ယဟိဝၤယွၤ အတၢ်ကရၢကရိ အတၢ်ဟံးစုနဲၣ်ကျဲလၢ မုၢ်မဆါတနံၤအံၤန့ၣ်လီၤ.
၇, ၈. (က) ဘၣ်မနုၤအဃိ ပကြၢးဒိကနၣ် ပှၤလၢအတီခိၣ်ရိၣ်မဲပှၤ အကလုၢ်လဲၣ်. (ခ) ခရံာ်ဖိတဖၣ် ထံၣ်ဘၣ်ဝဲ တၢ်ဆီတလဲ မနုၤတဖၣ်လဲၣ်. (ဂ) လၢဟီၣ်ခိၣ် ပၤရဒံစူးအပူၤန့ၣ် ပနာ်သ့လၢ ပကဒိးန့ၢ်ဘၣ် တၢ်မနုၤလဲၣ်.
၇ ပမ့ၢ်အဲၣ်ဒိးအိၣ်မူဘၣ်လၢ ဟီၣ်ခိၣ်ပၤရဒံစူးအပူၤန့ၣ် ပကဘၣ်ဒိကနၣ် ယဟိဝၤယွၤ အတၢ်ကရၢကရိ အတၢ်ဟံးစုနဲၣ်ကျဲ ဒီးမၤသကိးတၢ်လၢ တၢ်ဃူတၢ်ဖိးန့ၣ်လီၤ. အဒိ ဖဲပဒိးန့ၢ်ဘၣ် မူဒါအသီအခါ ပကဘၣ်အိၣ်ဒီး တၢ်သူၣ်မံသးမံဒီး ဂုာ်ကျဲးစၢးမၤလၢ တၢ်သူၣ်အိၣ်သးအိၣ်အပူၤ ဒီးမၤအီၤလၢ အဂ့ၤကတၢၢ်န့ၣ်လီၤ. ပမ့ၢ်ဒိကနၣ် ပှၤလၢအတီခိၣ်ရိၣ်မဲတၢ် အတၢ်ဟံးစုနဲၣ်ကျဲလၢ အဆၢကတီၢ်ခဲအံၤန့ၣ် လၢဟီၣ်ခိၣ် ပၤရဒံစူးအပူၤစ့ၢ်ကီး ပကအိၣ်ဒီး တၢ်ဒိကနၣ်န့ၣ်လီၤ. (ဖး ဧ့ၤဘြံၤ ၁၃:၁၇ တက့ၢ်.) ဖဲပှၤအံၣ်စရ့လးဖိတဖၣ် လဲၤနုာ်ဆူ ကီၢ်တၢ်စံးပာ်အခါ အဝဲသ့ၣ်တဖၣ် ဘၣ်တၢ်ဟံးစုနဲၣ်ကျဲအီၤလၢ ကဘၣ်အိၣ်ဝဲလၢ တၢ်လီၢ်ဖဲလဲၣ်န့ၣ်လီၤ. (၄ မိၤၡ့ ၂၆:၅၂-၅၆; ယိၤၡူ ၁၄:၁, ၂) လၢဟီၣ်ခိၣ် ပၤရဒံစူးအပူၤန့ၣ် ပကအိၣ်ဘၣ်ဖဲလဲၣ် ပတသ့ၣ်ညါဘၣ်. ဘၣ်ဆၣ် ပမ့ၢ်အိၣ်ဒီး တၢ်ဒိကနၣ်န့ၣ် ပမ့ၢ်ဘၣ်အိၣ်ဝဲ ဖဲလဲၣ်ဂ့ၤဖဲလဲၣ်ဂ့ၤ ပကမၤကစၢ်ယွၤအတၢ်မၤ လၢတၢ်သူၣ်မံသးမုာ်အပူၤလီၤ.
၈ ထံၣ်တမှံကွၢ် နဒိးန့ၢ်ဘၣ်တၢ်ခွဲးတၢ်ယာ်လၢ နကမၤ ကစၢ်အတၢ်ဖံးတၢ်မၤလၢ ဟီၣ်ခိၣ် ပၤရဒံစူးအပူၤ ဖဲကစၢ်ယွၤအဘီမုၢ် အတၢ်ပၢအဖီလာ်န့ၣ်တက့ၢ်. လၢတၢ်န့ၣ်အဃိ အဆၢကတီၢ်ခဲအံၤ ပဝဲဒၣ်သ့ၣ်တဖၣ် ပသးခုလၢ ပကမၤသကိးဘၣ်တၢ်ဒီး ယဟိဝၤယွၤ အတၢ်ကရၢကရိ ဒီးမၤလၢပှဲၤမူဒါလၢ ပဒိးန့ၢ်ဘၣ် တမံၤဂ့ၤတမံၤဂ့ၤန့ၣ်လီၤ. တဘျီတခီၣ် ပမူဒါ ကဘၣ်တၢ်ဆီတလဲအီၤလီၤ. အဒိ ပှၤဘ့ၤသ့လးဖိတနီၤလၢ ကီၢ်အမဲရကၤန့ၣ် ဘၣ်တၢ်ဟ့ၣ်လီၤအီၤ မူဒါလၢအသီအဃိ အဝဲသ့ၣ်ဘၣ်ဟးထီၣ်လၢ ဘ့ၤသ့လးဒီးလဲၤမၤစၢၤတၢ်လၢ တၢ်လီၢ်အဂၤန့ၣ်လီၤ. ကဝီၤအပှၤကွၢ်တၢ်တနီၤန့ၣ် ခီဖျိလၢအဝဲသ့ၣ်အသးအနံၣ် မ့တမ့ၢ် တၢ်အိၣ်သးလၢအဂၤအဃိ ဘၣ်တၢ်ဟ့ၣ်လီၤအဝဲသ့ၣ် မူဒါအသီလၢ အမ့ၢ်ပှၤလဲၤလၢညါလီၤဆီ တၢ်မၤန့ၣ်လီၤ. အဝဲသ့ၣ် မၤဝဲတၢ်မၤအသီအံၤ ပှဲၤဒီးတၢ်သးခု ဒီးယဟိဝၤယွၤဆိၣ်ဂ့ၤ အဝဲသ့ၣ်လီၤ. ပမ့ၢ်ဃ့တၢ်မၤစၢၤ လၢယဟိဝၤယွၤအအိၣ် ဒီးဖဲပဒိးန့ၢ်ဘၣ်မူဒါ တမံၤဂ့ၤတမံၤဂ့ၤ ပမ့ၢ်မၤအီၤလၢ တၢ်သူၣ်အိၣ်သးအိၣ်အပူၤန့ၣ် ပကဒိးန့ၢ်ဘၣ် တၢ်သူၣ်ဖှံသးညီ ဒီးယဟိဝၤယွၤကဆိၣ်ဂ့ၤပှၤလီၤ. (ဖး ကတိၤဒိ ၁၀:၂၂ တက့ၢ်.) လၢဟီၣ်ခိၣ် ပၤရဒံစူးအပူၤန့ၣ် နမ့ၢ်အဲၣ်ဒိးအိၣ်လၢ တၢ်လီၢ်တတီၤတီၤ ဘၣ်ဆၣ် ယဟိဝၤယွၤ အတၢ်ကရၢကရိ မ့ၢ်မၢနသုးလီၢ်သုးကျဲ ဆူတၢ်လီၢ်အဂၤန့ၣ် နသးကမၤသးဒ်လဲၣ်. ဖဲန့ၣ်အဆၢကတီၢ် နမ့ၢ်အိၣ်တၢ်လီၢ် တတီၤဂ့ၤတတီၤဂ့ၤ ဒီးနမ့ၢ်မၤတၢ်မၤ တမံၤဂ့ၤတမံၤဂ့ၤန့ၣ် အရ့တဒိၣ်လၢနဂီၢ်ဘၣ်. ပသးကပှဲၤဒီး တၢ်စံးဘျုးစံးဖှိၣ် လၢပအိၣ်မူဘၣ်လၢ ဟီၣ်ခိၣ်ပၤရဒံစူးအပူၤအဃိန့ၣ်လီၤ.—နဃ့မယၤ ၈:၁၀.
၉, ၁၀. (က) ဘၣ်မနုၤအဃိ ပကလိၣ်ဘၣ်တၢ်ဝံသးစူၤ လၢဟီၣ်ခိၣ် ပၤရဒံစူးအပူၤန့ၣ်လဲၣ်. (ခ) ဆၢကတီၢ်ခဲအံၤ ပပာ်ဖျါထီၣ် ပတၢ်ဝံသးစူၤသ့ဒ်လဲၣ်.
၉ လၢဟီၣ်ခိၣ် ပၤရဒံစူးအပူၤန့ၣ် ပကဘၣ်အိၣ်ဒီး တၢ်ဝံသးစူၤလီၤ. အဒိ ပကနၢ်ဟူဘၣ်လၢ ပှၤအဂၤတဖၣ် အဘူးအတံၢ်ဒီး အတံၤသကိးတဖၣ် ဂဲၤဆၢထၢၣ်သမူထီၣ်က့ၤဝဲလီၤ. ဘၣ်ဆၣ် မ့မ့ၢ်ပဝဲန့ၣ် ပဘူးပတံၢ်ဒီး ပတံၤသကိးတဖၣ် ကဂဲၤဆၢထၢၣ်သမူထီၣ်က့ၤအဂီၢ် ပကဘၣ်အိၣ်ခိးဒံးလီၤ. ပမ့ၢ်ကွၢ်ဆၢၣ်မဲာ်ဘၣ် တၢ်အိၣ်သးဒ်န့ၣ်န့ၣ် မ့ၢ်ပကသးခုဃုာ်ဒီးပှၤအဂၤဧါ. မ့ၢ်ပကအိၣ်ခိး လၢတၢ်သူၣ်စူၤသးစူၤအပူၤဧါ. (ရိမ့ၤ ၁၂:၁၅) ဆၢကတီၢ်ခဲအံၤ ပမ့ၢ်အိၣ်ခိးယဟိဝၤယွၤ အတၢ်စံးပာ်တဖၣ် လၢတၢ်သူၣ်စူၤသးစူၤအပူၤန့ၣ် ကကဲထီၣ်တၢ်မၤစၢၤလၢ ခါဆူညါအဂီၢ်လီၤ.—စံၣ်တဲၤတဲလီၤ ၇:၈.
၁၀ ကျဲအဂၤတဘိလၢ ပကကတဲာ်ကတီၤပသး လၢဟီၣ်ခိၣ် ပၤရဒံစူးအဂီၢ်န့ၣ် မ့ၢ်ပပာ်ဖျါထီၣ် ပတၢ်သးစူၤ ဖဲပတၢ်နၢ်ပၢၢ်ဘၣ်ဃး လံာ်စီဆှံအဂ့ၢ် ဘၣ်တၢ်ဆီတလဲအီၤအခါန့ၣ်လီၤ. မ့ၢ်နဖးဒီးဃုသ့ၣ်ညါ တၢ်ဂ့ၢ်အသီတဖၣ်အံၤ စ့ၢ်ကီးဧါ. ဒီးနမ့ၢ်တနၢ်ပၢၢ်အီၤ လီၤတံၢ်လီၤဆဲးဒံးဘၣ်န့ၣ် မ့ၢ်နပာ်ဖျါထီၣ် တၢ်ဝံသးစူၤစ့ၢ်ကီးဧါ. ပမ့ၢ်မၤဒ်န့ၣ်န့ၣ် ဖဲယဟိဝၤယွၤ ဟ့ၣ်ပှၤ တၢ်ဟံးစုနဲၣ်ကျဲ အသီတဖၣ်လၢဟီၣ်ခိၣ် ပၤရဒံစူးအပူၤန့ၣ် ကညီဝဲလၢ ပကအိၣ်ဒီး တၢ်ဝံသးစူၤန့ၣ်လီၤ.—ကတိၤဒိ ၄:၁၈; ယိၤဟၣ် ၁၆:၁၂.
၁၁. ဘၣ်မနုၤအဃိ ပဘၣ်ပျၢ်ပှၤဂၤအတၢ်ကမၣ်လၢ ဆၢကတီၢ်ခဲအံၤလဲၣ်, ဒီးတၢ်အံၤကမၤစၢၤပှၤလၢ ဟီၣ်ခိၣ်ပၤရဒံစူးအပူၤဒ်လဲၣ်.
၁၁ ကျဲအဂၤတဘိလၢ ပကကတဲာ်ကတီၤပသး လၢဟီၣ်ခိၣ် ပၤရဒံစူးအဂီၢ်န့ၣ် ပကဘၣ်ပျၢ်ကွံာ် ပှၤဂၤအတၢ်ကမၣ်လီၤ. ဖဲခရံာ်ပၢတၢ် အနံၣ်တကထိအတီၢ်ပူၤန့ၣ် ပှၤကိးဂၤဒဲး ကလၢထီၣ်ပှဲၤထီၣ်အဂီၢ် တၢ်ဆၢကတီၢ် ကလိၣ်ဝဲလီၤ. (မၤတၢ် ၂၄:၁၅) မ့ၢ်ပကအဲၣ်လိာ်ပသးဒီး ပျၢ်လိာ်ပတၢ်ကမၣ် တဂၤဒီးတဂၤန့ၣ်ဧါ. ပမ့ၢ်ပျၢ်ပှၤဂၤအတၢ်ကမၣ်ဒီး အိၣ်ဃူအိၣ်ဖိးဒီး အဝဲသ့ၣ်လၢ ဆၢကတီၢ်ခဲအံၤန့ၣ် ဖဲပနုာ်လီၤလၢဟီၣ်ခိၣ် ပၤရဒံစူးပူၤအခါ ပပျၢ်ပှၤဂၤအတၢ်ကမၣ် ကညီဝဲလီၤ.—ဖး ကလီးစဲ ၃:၁၂– ၁၄ တက့ၢ်.
၁၂. ဘၣ်မနုၤအဃိ ပဘၣ်ကတဲာ်ကတီၤပသး လၢဟီၣ်ခိၣ် ပၤရဒံစူးအဂီၢ်န့ၣ်လဲၣ်.
၁၂ လၢဟီၣ်ခိၣ် ပၤရဒံစူးအပူၤ တၢ်လၢပလီကီတဖၣ်န့ၣ် တမ့ၢ်လၢ ပကဒိးန့ၢ်ဘၣ်အီၤထီဘိဘၣ်. မ့တမ့ၢ် ပကဒိးန့ၢ်ဘၣ်အီၤအဂီၢ် ဘၣ်သ့ၣ်သ့ၣ် ပကဘၣ်အိၣ်ခိးလၢ တၢ်ဝံသးစူၤအပူၤလီၤ. ပတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ပကဘၣ်အိၣ်ဒီး တၢ်စံးဘျုးစံးဖှိၣ် ဒီးတၢ်သးမံလီၤ. တၢ်ဂ့ၤတၢ်ဝါသ့ၣ်တဖၣ် လၢယဟိဝၤယွၤသိၣ်လိပှၤလၢ ပကဘၣ်ပာ်ဖျါထီၣ်အီၤ လၢဆၢကတီၢ်ခဲအံၤန့ၣ် ပကလိၣ်ဘၣ်အီၤလၢ ဟီၣ်ခိၣ်ပၤရဒံစူးအပူၤ စ့ၢ်ကီးလီၤ. လၢတၢ်န့ၣ်အဃိ ပမ့ၢ်ဂုာ်ကျဲးစၢး ဒုးအိၣ်ထီၣ် တၢ်ဂ့ၤတၢ်ဝါတဖၣ်လၢ အဆၢကတီၢ်ခဲအံၤန့ၣ် မ့ၢ်ပဒုးနဲၣ်ဖျါထီၣ်လၢ ဟီၣ်ခိၣ်ပၤရဒံစူးန့ၣ် မ့ၢ်တၢ်နီၢ်နီၣ်လၢပဂီၢ် ဒီးပကတဲာ်ကတီၤပသးလၢ တၢ်မူအထူအယိာ်အဂီၢ်လီၤ. (ဧ့ၤဘြံၤ ၂:၅; ၁၁:၁ ) ပမ့ၢ်မၤဒ်န့ၣ်န့ၣ် မ့ၢ်ပပာ်ဖျါထီၣ်လၢ ပအဲၣ်ဒိးအိၣ်မူလၢ ဟီၣ်ခိၣ်ပၤရဒံစူးအပူၤ လၢအကပှဲၤဝဲဒီး ပှၤလၢအဒိကနၣ် ယဟိဝၤယွၤ အကလုၢ်န့ၣ်လီၤ.
သးစၢၢ်ဆၢ ယဟိဝၤယွၤ အတၢ်မၤ
စံၣ်တဲၤတဲလီၤ တၢ်သးခုကစီၣ် လၢတၢ်သူၣ်ဆူၣ်သးဆူၣ်အပူၤ
၁၃. ဖဲပအိၣ်မူဘၣ်လၢ ဟီၣ်ခိၣ် ပၤရဒံစူးအပူၤန့ၣ် ပကဘၣ်ပာ် တၢ်မနုၤလၢ နီၣ်ဂံၢ်တၢလဲၣ်.
၁၃ ဒ်သိးပကအိၣ်ဒီး တၢ်သူၣ်ဖှံသးညီအဂီၢ် ပကဒိးန့ၢ်ဘၣ် တၢ်လၢပလိၣ်ဘၣ်တဖၣ် လၢဟီၣ်ခိၣ်ပၤရဒံစူး အပူၤန့ၣ်လီၤ. ဘၣ်ဆၣ် တၢ်သူၣ်ဖှံသးညီ အဒိၣ်ကတၢၢ်န့ၣ် ဟဲခီဖျိလၢ ပတၢ်ရ့လိာ်သးဒီး ယဟိဝၤယွၤ ဘူးဘူးတံၢ်တံၢ်န့ၣ်လီၤ. (မးသဲ ၅:၃) လၢတၢ်န့ၣ်အဃိ ပကအိၣ်ဒီးတၢ်သးဆူၣ်လၢ ယဟိဝၤယွၤ အတၢ်မၤအဂီၢ်လီၤ. ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်သူၣ်ဖှံသးညီ လၢအတၢ်မၤအဃိလီၤ. (စံးထီၣ်ပတြၢၤ ၃၇:၄) ခဲအံၤ ပမ့ၢ်ပာ်ယဟိဝၤယွၤလၢ နီၣ်ဂံၢ်တၢ လၢပတၢ်အိၣ်မူပူၤန့ၣ် မ့ၢ်ပကတဲာ်ကတီၤပသးလၢ ပကအိၣ်မူဘၣ်လၢ ဟီၣ်ခိၣ်ပၤရဒံစူး အပူၤန့ၣ်လီၤ.—ဖး မးသဲ ၆:၁၉–၂၁ တက့ၢ်.
၁၄. လၢယဟိဝၤယွၤ အတၢ်မၤပူၤ ပှၤသးစၢ်တဖၣ် ပာ်လီၤဖီတၢၣ်မနုၤသ့လဲၣ်.
၁၄ ပဒိးန့ၢ်ဘၣ်အါထီၣ် တၢ်သူၣ်ဖှံသးညီ လၢယွၤအတၢ်မၤပူၤ ကသ့ဒ်လဲၣ်. ကျဲတဘိန့ၣ်မ့ၢ်ဝဲ ပကဘၣ်ပာ်လီၤ နီၢ်သးဖီတၢၣ် သ့ၣ်တဖၣ်လီၤ. နမ့မ့ၢ် ပှၤသးစၢ်တဂၤဒီး နမ့ၢ်ပာ်လီၤနသးလၢ နကမၤယဟိဝၤယွၤ အတၢ်မၤန့ၣ် နကြၢးမၤဒ်လဲၣ်. နဃုသ့ၣ်ညါတၢ်လၢ ပလံာ်လဲၢ်တဖၣ်အပူၤ ဘၣ်ဃးဒီး တၢ်မၤကစၢ်ယွၤအတၢ်မၤလၢ ဆၢကတီၢ်အလၢအပှဲၤ အကလုာ်ကလုာ်သ့ဝဲလီၤ. နပာ်လီၤဖီတၢၣ်လၢ နကမၤတၢ်မၤလၢ ဆၢကတီၢ်အလၢအပှဲၤ တခါခါသ့ဝဲလီၤ. *(ကွၢ် တၢ်ဂ့ၢ်အဘျဲၣ်တက့ၢ်.) တၢၣ်ပီၣ်သကိးဒီး ပှၤတနီၤလၢ အမၤယဟိဝၤယွၤ အတၢ်မၤလၢ ဆၢကတီၢ်လၢပှဲၤ ယံာ်တ့ၢ်လံန့ၣ်တက့ၢ်. နမ့ၢ်ဒိးသူနသးလၢ ယဟိဝၤယွၤ အတၢ်ဖံးတၢ်မၤအပူၤန့ၣ် နကဒိးန့ၢ်ဘၣ် တၢ်မၤလိလၢ အလုၢ်ဒိၣ်ပှ့ၤဒိၣ်လီၤ. တၢ်လၢနမၤလိဘၣ်တဖၣ်န့ၣ် ကမၤစၢၤနၤလၢ နကမၤ ယဟိဝၤယွၤအတၢ်မၤလၢ ဟီၣ်ခိၣ်ပၤရဒံစူး အပူၤန့ၣ်လီၤ.
ပာ်လီၤဖီတၢၢ်တဖၣ် လၢယဟိဝၤယွၤအတၢ်ဖံးတၢ်မၤအပူၤ
၁၅. လၢယဟိဝၤယွၤအတၢ်မၤပူၤ နပာ်လီၤဖီတၢၣ်အဂၤ မနုၤတဖၣ်သ့လဲၣ်.
၁၅ လၢယဟိဝၤယွၤ အတၢ်မၤအပူၤ ဖီတၢၣ်လၢ ပပာ်လီၤအီၤသ့န့ၣ် အိၣ်ဝဲအါမးလီၤ. အဒိ ပပာ်လီၤဖီတၢၣ် လၢပကမၤလိ တၢ်သ့တၢ်ဘၣ်အသီ လၢတၢ်စံၣ်တဲၤတဲလီၤတၢ်မၤအဂီၢ် သ့ဝဲလီၤ. မ့တမ့ၢ် ပဂုာ်ကျဲးစၢး ဃုသ့ၣ်ညါအါထီၣ် လံာ်စီဆှံအတၢ်ဘျၢတဖၣ် ဒီးပကဘၣ်မၤထွဲအီၤလၢ ပတၢ်အိၣ်မူပူၤ ဒ်လဲၣ်အဂ့ၢ်သ့န့ၣ်လီၤ. ပဂုာ်ကျဲးစၢးမၤဂ့ၤထီၣ် ပတၢ်ဖးလံာ်လၢ ကမျၢၢ်မဲာ်ညါ မ့တမ့ၢ် ပတၢ်စံၣ်တဲၤတဲလီၤတၢ် ဒီးပတၢ်စံးဆၢ လၢတၢ်အိၣ်ဖှိၣ်ရိဖှိၣ်ပူၤ သ့စ့ၢ်ကီးလီၤ. ပတၢ်ပညိၣ်န့ၣ် မ့ၢ်တၢ်ဝဲအံၤ– ဖဲနပာ်လီၤဖီတၢၣ်လၢ ယဟိဝၤယွၤ အတၢ်မၤပူၤအခါ တၢ်အံၤကမၤစၢၤနၤလၢ နတၢ်သးဆူၣ် ကအါထီၣ်ဒီး နကတဲာ်ကတီၤနသး နကအိၣ်မူဘၣ်လၢ ဟီၣ်ခိၣ်ပၤရဒံစူး အပူၤအဂီၢ်န့ၣ်လီၤ.
တၢ်အိၣ်မူလၢ အဂ့ၤကတၢၢ်
ကယဲၢ်တၢ်လၢ ယဟိဝၤယွၤဟ့ၣ်ပှၤတဖၣ် ပကဘၣ်စံးဘျုးစံးဖှိၣ်အီၤလီၤ
၁၆. ဘၣ်မနုၤအဃိ တၢ်မၤယဟိဝၤယွၤ အတၢ်မၤန့ၣ် မ့ၢ်တၢ်အိၣ်မူလၢ အဂ့ၤကတၢၢ်န့ၣ်လဲၣ်.
၁၆ ဖဲပသူတၢ်ဆၢကတီၢ် ဒ်သိး ပကကတဲာ်ကတီၤပသးလၢ ဟီၣ်ခိၣ် ပၤရဒံစူးအဂီၢ်အခါ မ့ၢ်ပဘၣ်တူၢ်ၡူကွံာ် ပတၢ်ခွဲးတၢ်ယာ်လၢ ပကအိၣ်မူဘၣ်လၢ အဂ့ၤကတၢၢ် ဖဲဆၢကတီၢ်ခဲအံၤဧါ. တမ့ၢ်ဘၣ်. တၢ်မၤယဟိဝၤယွၤ အတၢ်မၤန့ၣ် မ့ၢ်တၢ်အိၣ်မူလၢ အဂ့ၤကတၢၢ်န့ၣ်လီၤ. ပမၤ ယဟိဝၤယွၤအတၢ်မၤန့ၣ် မ့ၢ်လၢပှၤတဂၤဂၤ မၢဆူၣ်ပှၤအဃိ မ့တမ့ၢ် ပအဲၣ်ဒိးပူၤဖျဲးလၢ တၢ်နးတၢ်ဖှီၣ်ဖးဒိၣ်အဃိ တမ့ၢ်ဘၣ်. ပတၢ်ရ့လိာ်သးဒီး ယဟိဝၤယွၤမ့ၢ်ဂ့ၤန့ၣ် ပတၢ်အိၣ်မူကဂ့ၤထီၣ်ဒီး ပကအိၣ်ဒီး တၢ်သူၣ်ခုသးခုစ့ၢ်ကီးလီၤ. ကစၢ်ယွၤတ့လီၤပှၤလၢ ပကအိၣ်မူဒ်န့ၣ်လီၤ. ပမ့ၢ်ဒိးန့ၢ်ဘၣ် ယွၤအတၢ်အဲၣ်ဒီး တၢ်ဟံးစုနဲၣ်ကျဲန့ၣ် တၢ်အိၣ်မူလၢ ကဂ့ၤဒိၣ်န့ၢ်တၢ်အံၤ တအိၣ်ဝဲဘၣ်. (ဖး စံးထီၣ်ပတြၢၤ ၆၃:၁–၃ တက့ၢ်.) ပဒိးန့ၢ်ဘၣ် တၢ်သူၣ်မံသးမုာ် ခီဖျိ တၢ်ဘူၣ်ထီၣ်ဘါထီၣ် ယဟိဝၤယွၤလၢ ပသူၣ်ဒီဖျၢၣ်ပသးဒီဖျၢၣ်န့ၣ်လီၤ. ပှၤတနီၤလၢ အမၤတ့ၢ် ယဟိဝၤယွၤအတၢ်မၤ အါနံၣ်အါလါသ့ၣ်တဖၣ် စံးဝဲလၢ တၢ်အံၤမ့ၢ် တၢ်အိၣ်မူလၢ အဂ့ၤကတၢၢ်န့ၣ်လီၤ.—စံးထီၣ်ပတြၢၤ ၁:၁-၃; ယၡါယၤ ၅၈:၁၃, ၁၄.
ဃုတၢ်ဟ့ၣ်ကူၣ်တဖၣ် လၢလံာ်စီဆှံအပူၤ
၁၇. တၢ်မၤလၢ ပသးအိၣ်မၤအီၤ ဒီးတၢ်လၢ အမၤမုာ်မၤဖှံပသး လၢပၤရဒံစူးအပူၤန့ၣ် အရ့ဒိၣ်ထဲလဲၣ်.
၁၇ လၢပၤရဒံစူးအပူၤန့ၣ် ပကသူပတၢ်ဆၢကတီၢ် တနီၤလၢ တၢ်မၤလၢပသးအိၣ်မၤအီၤ ဒီးတၢ်လၢ အမၤဖှံပသးအဂီၢ်န့ၣ်လီၤ. ယဟိဝၤယွၤ မ့ၢ်ကစၢ်လၢ အတ့လီၤပှၤ ဃုာ်ဒီးသးလၢသူၣ်ဖှံသးညီသ့ ဒီးအဝဲ အၢၣ်လီၤအီလီၤဝဲလၢ ‘ကယဲၢ် တၢ်သးအဆၢတၢ်န့ၣ် ယဟ့ၣ်လီၤလီၤ.’ (စံးထီၣ်ပတြၢၤ ၁၄၅:၁၆; စံၣ်တဲၤတဲလီၤ ၂:၂၄) ပလိၣ်ဘၣ် တၢ်မၤမုာ်မၤဖှံသးဒီး တၢ်အိၣ်ဘှံးအိၣ်သါန့ၣ်လီၤ. ဘၣ်ဆၣ် ပမ့ၢ်ပာ်ပတၢ်ရ့လိာ်သးဒီး ယဟိဝၤယွၤ လၢနီၣ်ဂံၢ်တၢန့ၣ် ပကအိၣ်ဒီးတၢ်သူၣ်ခုသးခု အါန့ၢ်အလီၢ်ဖဲ ပမၤတၢ်သူၣ်ဖှံသးညီ အဆၢကတီၢ်န့ၣ်လီၤ. လၢဟီၣ်ခိၣ်ပၤရဒံစူး အပူၤန့ၣ် တၢ်ကမၤအသး ဒ်န့ၣ်စ့ၢ်ကီးလီၤ. လၢတၢ်န့ၣ်အဃိ ပကြၢး “ဃုဆိယွၤ အဘီအမုၢ်” ထီဘိဒီး သးစၢၢ်ဆၢ ဒီးတၢ်ဆိၣ်ဂ့ၤလၢ ပဒိးန့ၢ်ဘၣ်ဖဲပမၤယွၤအတၢ်မၤ အဆၢကတီၢ်န့ၣ်လီၤ.—မးသဲ ၆:၃၃.
၁၈. ပအိၣ်ကတဲာ်ကတီၤပသးလၢ ပကအိၣ်မူဘၣ်လၢ ပၤရဒံစူးပူၤ လီၤထူလီၤယိာ်န့ၣ် ပပာ်ဖျါထီၣ်ကသ့ဒ်လဲၣ်.
၁၈ လၢဟီၣ်ခိၣ် ပၤရဒံစူးအပူၤန့ၣ် ပတၢ်အိၣ်မူကဂ့ၤဒိၣ်န့ၢ်ဒံး ပထံၣ်တမှံကွၢ်သ့ဝဲလီၤ. ပကပာ်ဖျါထီၣ်လၢ ပအဲၣ်ဒိးအိၣ်လၢ ဟီၣ်ခိၣ် ပၤရဒံစူးအပူၤ ခီဖျိ ပအိၣ်ကတဲာ်ကတီၤပသးလၢ “တၢ်အိၣ်မူအထူအယိာ်” လၢဆၢကတီၢ်ခဲအံၤလီၤ. မ်ပမၤဒိၣ်ထီၣ် တၢ်ဂ့ၤတၢ်ဝါလၢ ယဟိဝၤယွၤ မၢပပာ်ဖျါထီၣ်အီၤတဖၣ် ဒီးအိၣ်ဒီး တၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအပူၤ န့ၣ်တက့ၢ်. မ်ပဒိးန့ၢ်ဘၣ် တၢ်သူၣ်ဖှံသးညီ ခီဖျိလၢ ပပာ်တၢ်ဘူၣ်ထီၣ်ဘါထီၣ် ယဟိဝၤယွၤ လၢနီၣ်ဂံၢ်တၢ လၢပတၢ်အိၣ်မူပူၤန့ၣ်တက့ၢ်. ပနာ်သ့သပှၢ်ကတၢၢ်လၢ ဟီၣ်ခိၣ် ပၤရဒံစူးအပူၤန့ၣ် ယဟိဝၤယွၤ ကမၤလၢထီၣ်ပှဲၤထီၣ် အတၢ်စံးပာ်ခဲလၢာ်န့ၣ်လီၤ. လၢတၢ်န့ၣ်အဃိ မ်ပအိၣ်မူဒ်သိး ပအိၣ်လၢဟီၣ်ခိၣ် ပၤရဒံစူးအပူၤတက့ၢ်.
^ လံာ်အဆၢ. 14 ကွၢ် Young People Ask—Answers That Work Volume 2 (အဲကလံးကျိာ်), pages 311-318 မ့တမ့ၢ် သးစၢ်သ့ၣ်ဧၢ—နကသူနတၢ်အိၣ်မူဒ်လဲၣ် လံာ်ကဘျံးပၤ ၄-၆ တက့ၢ်.
